26.04.2019

26.04.2019, वह्यक (वैशाख), गटॖ पछॖ (कृष्ण पक्ष) सतम (सप्तमी) शॊकुरवार (शुक्रवार/जुम्मा)श्री सप्तार्षि सम्वत 5095, राश मकर (चलान) ऋतु बसन्त (चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: गगर सऻर
    अ: रच़ि रच़ि च़ूरि निनुक
         अमल
2. मु: गगरायन छु नॖ रूद
         आसान
   अ: युस क्रख करि सु छु नॖ
         कऻम कॊट करनस
         पोशान
3. मु:गगुर वॊथ ब्रऻरिस ख्यॆनि
   अ:कमज़ोर सुन्द ज़ोरावरस
        सॗत्य मुक़ाबलॖ करुन
 4. मु: गगुर छु करान ब्रऻरिस
          लार
     अ: यि ख़लाफ क्क्दरयथ
          या ख़लाफ़ तवक़ॖ
          आसि ती सपदुन
5. मु: गगुर च़ाव लऺकरि बनि
         ह्यथ क्या च़ाव तॖ ख्यथ
         क्या द्राव
   अ: फ़ज़ूल कांह कऻम करनॖ
        सॗत्य छु नॖ कॆंह नेरान/
        फ़ज़ूल कऻम
**********************
       गीता ज्ञान :अध्याय-11
         अर्ज़नॖ दीव वनान
अर्ज़न दीव वनान ही मदॖसॗदन
डंजि दिल म्यॆ ब्यूठ कऺरिथ च्योन दर्शुन
मनशि रूप वुछिथ छुस शाद सपदान
वॊन भगवानन गीता ज्ञान
**********************
हटकेश्वर भैरवसॖन्दि सतव भैरवव मंज़ॖ ओस विताल भैरव दपान युस सऻर्यसॖय रॗन्यवऻरिस नज़र गुज़़र थविथ ओस आसान पनॖनि वख्तॖ। वनॖनॖ छु यिवान ज़ि हटकेश्व भैरव ओस रॗन्यवऻरकिस मलखाह अलाकस अंद्य-पऺख्य आसान तॖ बाकय ॳम्यसॖन्द्य सथ भैरव ॴस्य अमि अलाकॖक्यन बसकीनन हन्द्य रऻछदऺरी करान रोज़ान। बोज़नस तल छु यिवान ज़ि वैताल भैरव ओसमुत छु स्यठाह थ्वद भैरव। ॳम्यसॖन्दि नावुक छु ओसमुत अख मंदर ति बनावनॖ आमुत युस रॗन्यवारि मूत्यार महलस मंज़ छु मूजूद वुन्युखताम ति। दपान योदवय कऻन्सि ति तफ तॗर ॴस आसान तऺमिसॖन्दि नावॖ ॴस तऺहर च़रवन बनावानॖ तॖ वैताल या विताल भैरवस च़ॊट खारान तॖ फलस्वरूप ॴस्य वुछान ज़ि ब्यमार ओस ठीख गछ़ान। मानॖनॖ छु यिवान ज़ि विताल भैरव ओसमुत छु बडॖ त्रॊश भैरव तॖ लूख ॴस्य न्यॆत्य ॳम्यसॖन्ज़ पाठ पूज़ा करान रोज़ान तॖ स्व प्रथा छि वुन्युख ताम चलान। राथ आव पम्पोश एनक्लेवस दिल्लि मंज़ वैताल शॆयम द्वह पाठ पूज़ायि सान मनावनॖ यथ पाठ पूज़ायि मंज़ रॗन्यवऻरिस मंज़ रोज़नवऻल्य आमॖत्य ॴस्य शिरकत करिनि तॖ ब्येयि तिम यिमन भैरव सऻबस मंज़ यछ़ तॖ पछ़ रूज़िथ छि। कऺशीरि मंज़ दपान ॴस्यमॖत्य छि कुल च़ुहऻठ भैरव यिहन्द्य ॴठ लीडर रूद्यमॖत्य छि। यिमन ॴठन हॖन्द्य नाव ॴस्यमॖत्य छि यिथकऺन्य - आनन्देश्वर, मंगलेश्वर, पूर्णराज़ॖ, तुश्कॖराज़, विशवाकसिन, ज़याकसिन तॖ महाकाल। तॖ ॷठिम ओस हटकेश्वर भैरव।यिमन भैरवन ओस मयसूम, बानॖमहलॖ, सॊथ, नरसिंहगड, नमचिबल तॖ सोपोर अलाकॖ आमुत दपान हवालॖ करनॖ।हटकेश्वरस ओस मलखाह यानि रॗन्यवोर हवालॖ। कॆंह मंदर छि वुनि कशीरि मंज़ मूजूद यिम सान्यन कथन प्रमानित करान छि।
*********************
"यज्ञस्वरूपाय जटाधराय पिनाकहस्ताय सनातनाय।नित्याय शुद्धाय निरंजनाय तस्मै यकाराय नम: शिवाय।।"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
नऺविव तॖ फॊलिव
  भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)