18.04.2019

18.04.2019, च़ित्थॖर (चैत्र)
ज़ूनॖ पछॖ (शुक्ल पक्ष) च़्वदह (चतुर्दशी), ब्रसवार (वीरवार/ ब्रहस्पतवार),श्री सप्तार्षि सम्वत 5095, राश कन्या (चलान), ऋतु (बसन्त)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: लरि लब लागॖन्य
    अ: दोस्ती लागॖन्य/दॊस्ती
         हुन्द अथॖ ज़्येठरावुन
2. मु: लर्यन बऻच़ तॖ बऻच़न
         बतॖ
    अ: लरि गऺयि तॆलि यॆलि
         बऻच़ आसनस तॖ बऻच़न
         गछ़ि बतॖ आसुन
3. मु: लरि तल नॖ गासॖ न्यॆबरॖ
         वननि फ़रि
    अ: छ़र्यन मच्यन ठसॖय
         योत/छ़ऺरी हॊखी दम
         दिन्य
4. मु: लडऻय मऺल्य ह्यॆन्य
    अ: हन्गॖ तॖ मन्गॖ तनाज़न
         मंज़ पान आवरावुन/
         लडायि-गॊर आसुन
5. मु: लऺड्य लऺड्य ह्यॊन
    अ: ताक़तॖकि ज़ोरॖ कांह
         चीज़ हऻसिल करुन
**********************
1. तक़सीम....Division/
           Partition/Circu-
           lation/Distribu-
           tion
2. तक़सीर....Mistake/
           Short-coming/
           Error/Omission/
           Defect/Fault
3. तक़लीद....Following
           in the footsteps
           of/Conform/
           Follow/Emulate
4. तिक्याज़ि....Reason/
           Cause/Basis/
           Means
5. तक़लीफ़.... Trouble/
             Torment/Pain
6. तक़लुफ....Formality
7. तक़रार.....Clash
8. तक़बुर.....Pride
9. तऺकयि....Pillow/Re-
          liance/Support
10. तऺकयि कलाम...Exple-
                             tive
**********************
     गीता ज्ञान :अध्याय-11
पिता प्वत्र सुन्द म्यॆथॖर म्यॆथरॖ सुन्द या पति पनॖनि टऻठ पत्नी हुन्द
छिवॖ च़ालान तॖ च़ऻलिथ माफ़ करान
वॊन भगवानन गीता ज्ञान
**********************
कति तिम पांछ़ शॆ ॴठ नव शुर्य, अज़ यिमन अख ज़ॖय तिमन ति खुर्य। फ़ीस-वीस बऺर्य-बऺर्य पेरैंट बरहम। लऺर म्यॆ खारेयम मंज़ मऻदानस, तॆलि ओस यकुत, अज़ पानस पानस। राथ ओस च्युरग्यॊश अज़ ना शोरुय। लरि गऺयि तॆलि यॆलि बऻच़ आसनस तॖ बऻच़न बतॖ आसि। याद करव अगर तॖ हऻरान गछ़व ज़ि कमि जायि प्यठॖ कथ जायि वऻत्य। सान्यन ज़िठ्यन कऻछ़ाह ह्यमथ ॴस ज़ि प्रथ गरस मंज़ ॴस्य शुर्य पंगथा आसान, शोर-ओ-गुल ओस आसान। तिम किथ पऻठ्य ॴस्य पलान-बडान, परान-लेखान, ख्यवान-च्यवान, अनान-ज़ेनान, लरि तॖ बंगलॖ बनावान। अहलस-मऺहलस मंज़ नामदार आसान। वनान ॴस्य यि गव फलऻन्य सुन्द न्यॆचुव, यि गऺयि फ़लऻन्य सॖन्ज़ कूर। अख बोय ओस आसान प्रॊफॆसर, ब्याख बोय ओस आसान डाक्टर, त्रॆयिम बोय ओस आसान प्रिन्सॖपुल तॖ च़ूरिम बोय ओस आसान सरकऻर्य अफ़सर मगर अज़ छु सोरुय फ़िरिथ। म्यॆ छु याद प्यवान ज़ि कऺशीरि मंज़ यॆलि दऺर्यायि जॆहल्मस या व्यतस्तायि मंज़ हऻन्ज़ ओस पनॖन्य बऺरिथ बहच़ फ़तॆकऺदलॖ प्यठॖ हब्बॖकऺदल कुन खारान तॖ अथ बहच़ि ॴस्य रज़व सॗत्य लमान हऻन्ज़। यिमन हऻन्ज़न ति आसान शुर्य तन्दल तॖ कुन्यर ओसुख नॖ बासान। ॳकिसॖय रज़ि ॴस्य लमान तॖ बहच़ ॴस वातान मुकामस प्यठ। मगर अज़ छु इन्सान गोमुत परॖ छ़्यॊन, शुर्य छिनॖ अकि या दॊयि अलावॖ नज़रि यिवान। तिम ति नॖ समिथ। तिम मंदोरि हिशॖ लरि नॖ कुनी। रज़ि लमन वऻल्य नॖ अथि यिवान। प्रथ कांह छु अंदर्य अंदर्य च़न्द्रहोम वोतमुत। कुस कथ वाठ दिनस लॊगमुत यि छु नॖ असि ति पता लगान यानि असि कऻशिर्य बटन। मगर पकान छि तॖ पकनावुन छु पनुन पान। छ़ॊकान छि द्वह ख्वतॖ द्वह। शुर्य ॴस्य मऻलिस माजि वख्तॖ अकि दऺछिन तॖ खोवॖर्य आसान मगर अज़ कल छु मोल-मऻज्य न्यथनॊन गछ़ान याम शुर छुस बऺहिम जमऻच़ अपोर तरान।
**********************
"अचिन्त्य-रूपचरिते सर्व-शत्रु-विनाशिनी, रूपं देहि जयं देहि यशो देहि दिशो जह्वि।।"
पऺरिव यि मंत्र ति दॊहय
**********************"
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
 नऺविव तॖ फॊलिव
  भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)