21.04.2019

21.04.2019, वह्यकॖ (वैशाख), गटॖ पछॖ (कृष्ण पक्ष) द्वय (द्विती), आथवार (एतवार/रविवार),श्री सप्तार्षि सम्वत 5095, राश वृश्चिक (दुहचि 11.12 बजि प्यठॖ), ऋतु बसन्त (चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
*********************
1. मु: ग्वलाबॖ रॊय
    अ: गुलऻब्य बुथ/माशूक/
         ख्वश बोन
2. मु: ग्वनॖ ख्वतॖ ग्वनॖ दूष
    अ: नीकी करान करान
          वॖल्टॖ गछ़ुन
3. मु: ग्यव ख्यवान तॖ गर्दनि
         कुन अथॖ लागान
    अ: वुतावली हावॖन्य/कुनि
         तर नेरनस ति गछ़ि
         वख्त द्युन
4. मु: ग्यव हऻ तॖ ग्यव ख्यव
         ब्रार्यॆव
    अ: बहानॖ बऻज़ी कऺरिथ
         कामि च़ूर बनुन
5. मु: ग्यवस तॖ कनॖहऻपिनि
         रॖश
    अ: पानॖवॖन्य सख़ वऻर
**********************
1. तम....Rest/Ease/Re-
             pose/Truce/
             Stop/Relaxa-
             tion
2. तमीज़..Sense/Good/
             Judgement/
            Etiquette/Good
            manners
3. तमोक.....Tobacco
4. तमदुन.....Culture/
            Civilisation/
            Urbanization
5. तमाशॖ...Spactacle
           Show/Entertain
           ment/Show
           business
6. तमी....That is why
7. तमाशॖ गीर.....Specta-
          tors/On lookers
8. तमुन करुन...To black-
             en something/
             To defame
9. तमाशॖ वुछुन...To wit-
           ness a show or
           happening/To
           enjoy others
           misfortune
10. तमाशि करॖन्य...To
           make a fun/Put
           on a show/
           Stage a play
**********************
      गीता ज्ञान :अध्याय-11
         श्री भगवान वनान
भगवान वनान छुस हे अर्ज़नॖ अनुग्रह कऺरिथ हावय दर्शुन
यि विराट रूप म्योन स्यठाह तीज़वान
वॊन भगवानन गीता ज्ञान
**********************
बॖ छुस वाकॖयी कॆंच़न बायन तॖ ब्यॆन्यन नमन करान यिम पनुन कॗमती वखॖत कऺडिथ करान छि रोज़ान समाज सीवा कुनि ति रंग्य। त्यूतुय योत नॖ बऺल्कि वातान छि अकि जायि प्यठॖ ब्यॆयिस जायि पान्यन काम्यन अंद वातॖनावनॖ बापथ। कऺशीरि मंज़ अज़ त्रॖह वऺरी ब्रौंठ ओस नॖ यिमन चीज़न हुन्द ज़रूरथॖय मगर योर यानि कऺशीरि न्यबर यिथ ह्यॆतिन ॳस्य तॖ सऻन्य शुर्य पनॖनि तहज़ीब तॖ तमदुनॖ निश दूरॖन्य, पनॖनि माजि ज़्यॆवि निशॖ दूरॖन्य। युथ नॖ ॳस्य बिल्कुलॖय रावव, युथ नॖ सान्यन शुर्यन मऺशिथ गछ़ि त्युहुन्द प्वतकाल, सु ज़िन्दॖ थावनॖ बापथ छि सऻन्य बऻय ब्यॆनि कमर कऺसिथ पनॖनिस समाजस पनॖन्य प्रज़नथ दिनॖ म्वखॖ कऻम करान। म्योन नमन तिमन ब्यॆयि अकि फिरि। गुडगांवॖ प्यठॖ दिल्लि युन तॖ दिल्लि प्यठॖ फ़रीदाबाद वातुन तॖ फ़रीदाबादॖ प्यठॖ गुडगांव वातुन ॳक्यसॖय दॊहस मंज़ तॖ पनुन गरॖबार ति करुन छॆ नॖ मोमूली कथा। मगर करान छि, वातान छि, हावान छि, समाजुक च़ुक छुख। मुफ्त सीवा। निषकाम बावॖ सान। कुनि लालचि रॊस करान छि रोज़ान यि सीवा। ज़रूरथ ति छु यिछ़ि सीवायि हुन्द तॆली छि व्वमॆद ज़ि सऻन्य शुर्य यिम पगहॖक्य वतॖहावक बनन रोज़न कामयाब पनॖन्य संस्कृति बरक़रार थवनस मंज़
**********************
"प्रणतानां प्रसीद त्वं देवि विश्वार्तिहारिणि, त्रैलोक्यवासिनामीड्ये लोकानां वरदाभव"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
   नऺविव तॖ फॊलिव
    भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)