29.04.2019

29.04.2019 वह्यक (वैशाख) गटॖ पछॖ दऺहम (दशमी) च़ऺन्दॖरवार (सोमवार)
श्री सप्तार्षि सम्वत 5095,राश कुम्भ (चलान) ऋतु बसन्त (चलान)..द्रठॖपऻन्च़ुक (पंचक) (चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: गाटॖ छा नाटॖ बाज़रॖ
         ह्यॆयज़ि मऺल्य
    अ: अकॖलमन्दी छि दय
          सुन्द द्युत
2. मु: गाम छु ख़ाम
    अ: गऻमी ज़िन्दगी छि क्रॗठ
         आसान
3. मु: गाव ति चावॖन्य वॊछ़
         ति रन्ज़नावुन
    अ: स्व कऻम करॖन्य यॆमि
         सॗत्य पानस ति फ़ऻयदॖ
         वाति तॖ ब्यॆयिस ति
         न्वकसान गछ़ि नॖ
4. मु: गाव दी नॖ वॊछ़ ति
         ह्यॆयि नॖ
    अ: न करि ब्यॆयिस मदद
       तॖ न तुलि पानस फ़ऻयदॖ
5. मु: गाडॖ हऻन्ज़ बापार
    अ: क्रख लागॖन्य/यथ नॖ
         कॆंह हऻसिल यी
**********************
1. ज़ऻबितॖ..... Genuine/
          Order in good
          taste/Regula-
          tion/Rule
2. ज़ाफल......A dry nut-
                     meg
3. ज़ातुक......Horoscope
4. ज़ाथ......Caste/Tribe
5. ज़ार....Gambling/Re-
          quest/Petition/
          Any game of
        chance with stake 
6. ज़ऻर्य....Gambler
7. ज़ोर......Strength
8. ज़ीर......To touch/
                  To move
9. ज़ार ज़ार...To weep
                  bitterly
10. ज़ारॖ पार..To beg/
             Request/
             Entreaty/Supp-
             lication
**********************
      गीता ज्ञान :अध्याय-11
च़ॊतुर ब्वज़ रूप च़्यॆ दर्शुन दिथ, ब्यॆयि कांह यिथॖ पऻठ्य ह्यॆकि नॖ वुछिथ। न ज़प तप
कऺरिथ न यगॖन्य तॖ दान।
वॊन भगवानन गीता ज्ञान
**********************
कऺशीरि मंज़ अज़ त्रॖह वऺरी ब्रौंठ ॴस्य ॳस्य कऻशिर बटॖ  दपान ज़ि फलऻन्य छि परबथ कुन या फलऻन्य छि तुलमुल कुन। मगर खालॖय कऻन्सि ॴस पता ज़ि अम्युक मतलब क्या ओस। इष्ट दीवी या इष्ट देव आसुन गव क्याह यि छे नॖ म्यॆ बासान वुनि ति वारिहान म्यान्यन बायन या ब्यॆन्यन पता ज़ि यिमन चीज़न हुन्द मतलब क्याह छु। ॳड्य ॴस ज़ीठ्य-यऻर यानि जिष्टा दीवी कुन तॖ ॳड्य ॴस्य ज़्वाला दीवी, ख्रॖव कुन। मगर यिम गामन मंज़ ॴस्य रोज़ान तिम कोर कुन ॴस्य आसान ति आसिहे तिमनॖय पताह। यि योरकुन या होरकुन आसुन क्याह मतलब ओस थावान यि छु नॖ पताह वारियाहान मगर परम्परा ॴस चलान। परबथ ॴस्य गछ़ान न्यॆनि ख्यथ मगर तुलॖमुल ॴस्य गछ़ान न्यॆनि ख्यनय। देव ग्वन यानि दिवॖगोन यॆलि आसान छु तॖ वऺर छि बनावान, वरि मंज़ छिछर यानि कटॖ माज़ मिलावान मगर यॊदवय अमि द्वह बॊम्वार या ब्रसवार प्यवान आसि तॆलि छि डून्य गोजि मिलऻविथॖय ज़ड कडान। यिथय पऻठ्य हेरच़ॖक्यन दॊहन छि कॆंह गरॖ गुरॖट्य आसान यिम ॴस्य नॖ ॳकिस हफ्तस न कऻन्सि हुन्द गरॖ गछ़ान या न ओस युहुन्द गरॖ कांह ह्यकान गऺछ़िथ। कॆंह रीति रिवाज छि अज़कल याद प्यवान तॖ पानस सॗत्य छु असुनाह यिवान। मतलब न पताह आसनॖ म्वखॖ पतॖ ति ॴस्य रसॖम निबावान। बालॖ यपोर लगिथॖय डॊल असि पनुन वऺतीरॖ तॖ व्यस्तार। गामस तॖ शहरस गव म्युल योर लगनॖ पतॖ। कारकुन कमिस ॴस्य वनान तॖ क्याज़ि ॴसिस वनान यि ह्यॆछनावन वोल छु नॖ अज़कल नज़रि यिवान।
म्यॆ छु बासान असि पज़ि यिमन कथन पर्दॖ तुलुन तॖ ज़ानुन ज़ि यिमन पऺत्यकिन क्याह कथॖ छि आसमच़ॖ तॖ क्वत ताम ॴस्य ॳस्य यिमन सॗत्य जुडिथ।
**********************
"प्रणतोsस्मि महादेव प्रपन्नोsस्मि सदाशिव, निवारय महामृत्युं मृत्युंजय नमोस्तुते।।"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
 नऺविव तॖ फॊलिव
  भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)