09.04.2019

09.04.2019, च़ित्थॖर (चैत्र) ज़ूनॖ पछॖ (शुक्ल पक्ष), च़ोरम (चतुर्थी),बॊम्वार (मंगलवार),श्री सप्तार्षि सम्वत 5095, राश वृष (चलान),ऋतु बसन्त (चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: माहराज़ॖ सऺन्द्य ति द्वह
         तारॖ माहर्यिनि हॖन्द्य ति
         द्वह तारॖ
    अ: प्रथ कऻन्सि पनॖन्य द्वह
         सारिनी विज़ि विज़ि
2. मु: मऻलिस राज तॖ मॊह-
         ताज, बऻयिस राज तॖ
         मॊहताज रॗनिस राज
         तॖ शेरि ताज
   अ: ख्वदग़र्ज़ी हॖन्दिस आल
         मस मंज़ रिशतन हुन्द
         इज़ॖहार/रॗनिस प्यठ छु
      ज़्यादॖ यख्तियार आसान
 3. मु: मऻज्य माम हय आव
          पॊत्रॖ म्यॆ गव बोय
    अ: कुनि कथि हॖन्ज़ जान
         ज़ान आसॖन्य
4. मु: मऻज्य ति बऺडेयि तॖ
         थऻज्य ति बडेयि
    अ: नफ़र बडनॖ सॗत्य छि
         अख़राजात ति बडान
5. मु: मऻज्य च़ॖ थव कांगॖर
         फुकिथ बॖ यिमय व्वस-
         तस द्वह ठुकिथ
   अ: कामि च़ूरॖ सॖन्द्य अला-
        मथ/कामि बदलॖ ज़ड
        नखॖ वालॖन्य
**********************
1. त्रॆ....Three
2. त्रॆयिम....Third
3. त्रॊगुन....Three fold
4. त्रेल.....A kind of fruit
               A small apple
               like
5. त्रेश....Drinking water
6. त्रेशिहॊत... Thirsty
7. त्रेशुन....To strive/To
                crave
8. तरसुन....To strive/
          Desire anxiously
        Long for/Compas
        sion
9. त्रकॖर.....Scale
10. त्रकुर.... Stiff/Hard
**********************
       गीता ज्ञान :अध्याय-11
ब्रह्मा जियुन आदि कर्ता च़ॖय
च़ॖय बॊड सारिनॖय सऻरी नमान छिय
सत चित आनन्द ब्रह्म ज़ानान
वॊन भगवानन गीता ज्ञान
**********************
ज़ंग त्रय ति म्वकॖलॆयि मगर ॳज़्यकि दुहुक महत्व छि दपान छु स्यठाह बॊड। दपान नीलमत पुराणस मंज़ छु ॳज़्यकिस दॊहस नाव आमुत दिनॖ "ज़ान गोरॖत्रय" युस नाव फुटान फुटान बन्यॊमुत छु ज़ंगॖ त्रय। दॊयिम वनुन छु ज़ि ॳज़्यकि द्वह ॴस पार्वती माल्युन गऻमॖच़ तॖ आमॖच़ पतॖ वऻरिव कॆंह शॊगुन ह्यथ। सु शॊगुन छु अज़कल नूनकिस रूपस मंज़ यिवान दिनॖ तॖ सॗत्य सॗत्य ॴस्य अतगथ ति अनान। यि प्रथा ॴस कऺशीरि मंज़ चलान। सारॆय ज़नानॖ आसॖ पनुन पनुन माल्युन गछ़िथ वऻरिव वापस यिवान नून तय अतगथ ह्यथ तॖ अथ रसमस या यथ रीच़ि ॴस वनान जंगॖ त्रय। चूंकि कऺशीरि न्यबर आयि सऻरीय बटॖ छऺकरावनॖ अख होर तॖ अख योर सानि न्वशि कोरि छॆ नॖ ह्यकान वऻतिथ पनॖन्यन पनॖन्यन मालिन गरन ताम अमि मूजूब छु ॳज़्युक यि ज़ंग-त्रय द्वह मनावॖनॖ यिवान कॆंच़व संस्थायव दऺस्य तॖ न्यमंत्रण छि दिवान तिमन सारिनी माज्यन ब्यॆन्यन न्वश्यन कोर्यन तॖ छिख दिवान नूनॖ पैक्यट तॖ अतॖगथ तॖ छि वुन्युखताम यि रीथ पऻलिथ। नून छु जान शॊगुन यिवान मानॖनॖ तॖ अतॖगथ लऺक्ष्मी हॖन्दिस रूपस मंज़ यिवान मानॖन तॖ यिम द्वनवय चीज़ छि दिवान ॴशिर्वादकिस रूपस मंज़ ताकि यिनॖवोल समय नेर्यख हृव्च़ तय फ्रूच़।
**********************
"सरस्वती प्रिया वाणी गीर्देवी गीतनादिनी। अक्षमालाधरा ब्राह्मी वीणा-पुस्तकभूषणी।"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
 नऺविव तॖ फॊलिव
  भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)