30.03.2019

30.03.2019, च़ित्थॖर (चैत्र) गटॖ पछॖ (कृष्ण पक्ष) दऺहम (दशमी) बटॖवार (शनिवार/ शनिश्चरवार),श्री सप्तार्षि सम्वत 5094, राश मकर (चलान), ऋतु बसन्त (चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: नार छा थवान सार
    अ: नार छु अकॖल डालान
2. मु: नार छु मार
    अ: नारॖ सॗत्य छि तबऻही
         गछ़ान
3. मु: नारॖ द्राव स्वन
    अ: स्यठाह प्वख्तॖ आसुन
4. मु: नारॖ विज़ि क्रूर खनुन
    अ: गऻर वख्तॖ या नामुनऻ-
         सिब वख्तॖ कऻम करॖन्य
5. मु: नारॖय छु जन्नत नारॖय
         छु जहन्नम
    अ: नारॖक्य ज़ॖ बुथ्य तॊत
          ति तॖ तुरुन ति
**********************
1. तऻव....Pan
2. तऻश... Provocation/
              Excessive/Dis-
          order/Fickleness
3. ताखुच....Shelf in a
                   wall/Niche
4. ताख...Window/Case
           ment/Shutter/
           Odd number
5. ताकि....So that
6. तान्य....For the time
                being
7. तार....Telegram/
            Wire, Steel wire
8. तारॖ....Three
9. तारकोल... Coal tar
10. तार घर ....Telegraph
                       office
**********************
     गीता ज्ञान :अध्याय-11
छिवॖ दज़वॖनि ॴसॖ लूकन ग्रास करान, सारिवॖय तरफव छिवॖ फेशान।
सोरुय ज़गत तेज़ॖ च्यानि गरमान
वॊन भगवानन गीता ज्ञान
**********************
द्वद वातुन ॴस सानि ज़ाच़ मंज़ अख रिवायत। यि रिवायत छि म्यॆ बासान व्वंय बिल्कुल ख़तम गऻमॖच़। दपान सानि ज़ऻच़ मंज़ ॴस वख्तॖ अकि सान्यन न्वश्यन वऻरिव गरस मंज़ शर्म हय्या ज़बर्दस्त। ज़िठ्यन ब्रौंह कनि आसॖ नॖ नॊर यानि गूंगट तुलान, बडि हटि नॖ कथ करान तॖ ॳथ्य सिल्सिलस मंज़ यॆलि यि न्वश ज़ुवॖ ॴस आसान यानि बऺरॖच़ ॴस्य आसान यि ॴस नॖ शर्मो हय्या मूजूब ह्यकान रॗनिस बगऻर ब्यॆयि कऻन्सि निश अमि कथ्यहुन्द ज़िकिर कऺरिथ यानि हशि हॆहरस निश या द्रॖयिस दॖरॖकाकनि निश। यि न्वश दपान ॴस पनॖनि माजि अमि कथि हुन्द ज़िकिर करान तॖ यि न्वश ॴस माल्युन गऺछ़िथ ज़ामुत द्वद वऻरिव सोज़नावान यॆमि सॗत्य तिमन पताह ओस लगान ज़ि न्वश छि ज़ुवॖ या गरस मंज़ छु शुर ज़्यवन-वोल। द्वद छु असि कऻशिर्यन मंज़ जान शॊगुन मानॗनॖ यिवान तॖ दपान द्वदस ज़ॖ गऺडवॗ ॴस्य हशि हॆहरस ब्रौंहकनि थवान यॆमुक माने ओस आसान ज़ि तुहॖन्ज़ न्वश छि शुरिस ज़न्म दिनॖ वाज्यन।तिम ॴस्य ख्वश गऺछ़िथ यि द्वद बऻगरावान ओरॖ योर। मगर वखॖत गव नेरान हालात गऺयि बदलान तॖ द्वद सोज़नॖच प्रथा गऺयि शायद म्वकलान तिथय पऻठ्य यिथॖ पऻठ्य अतगथ अनॖनॖच प्रथा रूज़ नॖ
कुनि। वुनि मा आसि कुनि कुनि गरस  मंज़ द्वद अनॖनॖच या द्वद सोज़नॖच रस्म चलान,म्यॆ छु नॖ बासान।
**********************
"महालक्ष्मि नमस्तुभ्यं नमस्तुभ्यं सुरेश्वरि। हरिप्रियं नमस्तुभ्यं नमस्तुभ्यं  दयानिधे।।"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
  नऺविव तॖ फॊलिव
    भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)