23.03.2019

23.03.2019, च़ित्थॖर (चैत्र) गटॖ पछॖ (कृष्ण पक्ष), त्रय (तृतीय), बटॖवार (शनिवार/ शनिश्चरवार),श्री सप्तार्षि सम्वत 5094, राश तुला (चलान), ऋतु बसन्त (चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: नच़ान ति पानय तॖ
         वायान ति पानय
    अ: सऻरॖय ज़िम्वऻरी पानस
         प्यठ ह्यॆन्य
2. मु: नसिति च़ॊद तॖ नाव
         थॊद
    अ: छ़ॊरुय बजर
3. मु: नस म्वछि मंज़ ह्यथ
    अ: पनॖनि जायि शर्मंदॖ
         आसुन/पनुन यज़थ
         पानस अथि
4. मु: नस रठ तॖ वगुव च़ठ
    अ: सादॖ बुथ बदकार
5. मु: निशि ज़ॖर्विथ नॖ दूरि
        पुशॖरिथ नॖ
    अ: कुनि नॖ वार आसुन/
         न दूरिरिस न नऺज़दीकी
**********************
1. ॴठ....Eight
2. अरदाह....Eighteen
3. अठोवुह......Twenty-
                       eight
4. अरत्रॖह....Thirtyeight
5. अरतऻजी...Fortyeight
6. अरवंज़ाह...Fiftyeight
7. अरहऻठ....Sixtyeight
8. अरसत्तथ...Seventy-
                     eight
9. अरशीथ....Eightyeight
10. अरनमथ...Ninety-
                      eight
**********************
      गीता ज्ञान  :अध्याय-11
चऻन्य वारियाह म्वख नरि ज़ंगॖ वुछिथ, दंद अरमॖ तॖ खॊफ़नाक रूप डींशिथ
सऻरी ह्यथ बॖ छुस व्याकुल गछ़ान, वॊन भगवानन गीता ज्ञान
**********************
राथ कऺर म्यॆ होलि-त्यौहारस प्यठ पनॖन्य कथबात तॖ ॳथ्य सिल्सिलस मुतलक ल्यूख कऻन्सि ॳक्य बऻय ज़ि म्यॆ क्याज़ि कऺर नॖ पनॖनि कथि बाति मंज़ नाडीग्राम कऺशीरि मंज़ गऻमतिस क़तलॖगऻर्तस प्यठ कॆंह कथबात।तम्यसुन्द इशारॖ ओस म्यॆ बासान 23 मार्च 2003-हस कुन यानि तथ आतंकवाद हमलस कुन यथ मंज़ सऻन्य च़ॊवुह बऻय-ब्यॆनि आयि क़तॖल करनॖ कऺशीरि हॖन्दिस नाडीग्राम गामस मंज़। तिमन शऺहीदन वोत असि श्रद्दांजलि दिवान अज़ ताम बलिदान दिवसस प्यठ। तवय शायद छीड नॖ म्यॆ अमिच कथ राथ होली हॖन्दिस पावन मॊकस प्यठ। ज़ख्मन क्रऻल्य तुलनॖ सॗत्य छि दग़ व्वतलिथॖय यिवान कम छॆ नॖ गछ़ान कॆंह। विज़ि विज़ि युस असि ज़ख वातनोव दहशथगर्दव कऺशीरि मंज़ सु  गछ़ि नॖ असि ता उम्रि मऺशिथ। कस क्याह रोव अम्युक ज़िकॖर करनॖ करनॖ सॗत्य छु त्वतुर व्वथान वऻन्लिजि मगर वननॖ वनॖनॖ नेरि क्याह। यिम असि निश छ़्यनॖ गऺयि तिम वापस यिन नॖ कॆंह। च़ालॖन्य छि तिम दऻद्य असि पानय। बाकय छि सऻरी सम्बंद अख बहानय।
नाडीग्राम प्यव अज़ ब्यॆयि याद तॖ याद रोज़ि हालॖ हालय पुलवाम्युक चतजि-पांच़तऻजी नवजवानन हुन्द ति नर-संहार
**********************
"सर्वज्ञे सर्ववरदे सर्वदुष्ट भयंकरी। सर्वदुख हरे देवि
महालक्ष्मि नमोsस्तुते।।"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
नऺविव तॖ फॊलिव
  भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)