16.03.2019

16.03.2019, फागुन (फाल्गुन) ज़ूनॖ पछॖ (शुक्ल पक्ष) दऺहम (दशमी), बटॖवार (शनिवार/शनिश्चरवार),श्री सप्तार्षि सम्वत 5094, राश कर्कट (रऻच़ हॖन्ज़ि 8.38 बजि प्यठॖ), ऋतु बसन्त (चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: नऺव कथ नवन दॊहन
    अ: प्रथ कुनि छि म्वखसरॖ
          वऻन्स/नव्यर छु प्रानान
2. मु: नूनॖ फऺलिस नॖ जाय,
         नाबद फऺलिस शाय
    अ: आमदनी ख्वतॖ ज़्यादॖ
          ख़र्च करुन
3. मु: नूनॖ फॊलुय छु गलान
    अ: तबऻही छि ग़रीबसॖय
         नाल वलान
4. मु: नॊव नवान तॖ प्रोन
         प्रानान
    अ: नऺव्य रिश्तॖ छि ब्रौंह
         ब्रौंह पकान तॖ पऺतिम
         छि मशान
5. मु: न्वशी वॊनमय कूर्य
         बोज़
    अ: कथ पिलनावॖन्य/
        ॳकिस वऺनिथ ब्यॆयिस
**********************
ज़ॖ.....Two
बाह.... Twelve
ज़ॖतोवुह...Twentytwo
दॊयत्रॖह....Thirty-two
दॊयतऻजी...Fortytwo
दुवनज़ाह.....Fiftytwo
दूहऻठ.........Sixtytwo
दुस्सतथ.....Seventytwo
दुशीथ.......Eightytwo
दुनमथ......Ninetytwo
**********************
     गीता ज्ञान :अध्याय-11
मुकट दऻरी गदा च़ऺक्र ह्यथ शूबान, प्रज़लवुन अगॖन तॖ सिर्यि ह्यु तेज़वान
च़्वपोर चमकॖवुन रूप छुस
वुछान
वॊन भगवानन गीता ज्ञान
**********************
व्वंय गऺयि असि कऺशीरि प्यठॖ द्रामतिस क़रीबन त्रॖह वऺरी मगर सु आसि नॖ कांह द्वह या कांह विज़ यॆमि सातॖ नॖ असि आसि कशीरि हॖन्ज़ कथ कऺरमॖच़ कुनि न तॖ कुनि रऺन्ग्य। किताबॖ आयि लेखनॖ, नाटक आयि बनावनॖ, बऻथ आयि ग्यवनॖ,
व्यथा आयि बोज़नावनॖ, कऺशीरि मंज़ युस ग़दॖर मच्यऻव असि बटन 1989 प्यठॖ तति आतंकवाद्यव दऺस्य, यिमव पान छॆपि द्युत पनॖनि समाजि बापथ, यिम नाहकस ह्यनॖ आयि सु सितम गछ़ि नॖ मऺशिथ असि ता उमरन। यिमन त्रॖहन वऺरियन मंज़ य्यॊस फुलय कऺशीरि न्यबर आयि सऻनिस समाजस मंज़ शुर्यन-कट्यन हॖन्दिस रूपस मंज़, यिमव नॖ सु गटॖकार वुछ तिम छि व्वंय किताबव दऺस्य परान, नाटकव दऺस्य वुछान, बऻतव दऺस्य बोज़ान। ॳस्य छि कूशिश करान ज़ि तिमन ज़ख्मन तुलॖहऻव नॖ क्रऻल्य मगर फीर्य फीर्य छि असि कऺशीर याद यिवान यॆलि यॆलि कांह बॊड द्वह लूक द्वह छु यिवान। याद छि प्यवान स्व खुलॖ-डुलॖ जायाह, वॊफूर ओस प्रथ कांह चीज़, क़दमन क़दमन प्यठ ॴस्य मन्दर, यारबल, बाग़ यिमन चीज़न हॖन्ज़ व्यछ़य छि यॆति ॳस्य मॊहसूस करान तॖ सूंच सूंच छि ॳछ्य-टऻर्य यिवान।तंग कमरन मंज़, छ़ॊछ्यन जायन मंज़, मंदरन निशि दूर, यारबल नॖ कुनि नज़र यिवान, बाग़ बगीचि नॖ कुनि अथि यिवान, हक़-हमसायि नॖ अंद्य-पऺख्य नज़र यिवान, सुबॖ प्यठॖ शाम ताम छि अज़कल ॳस्य कऻशिर्य बटॖ  सिरिफ मसलन हल छ़ान्डनस लऺग्यमॖत्य, यकुत थावनॖच कूशिश करान, पनॖन्य संस्कृति रऺछ़रावनॖच कूशिश करान यि दपज़ि ति पनॖन्य प्रज़नथ ज़िन्दॖ थावनॖच कूशिश करान। कऺशीरि वापस गछ़नुक संज़ करान, कुस गछ़ि, कर गछ़ि, कॊत गछ़ि किथ पऻठ्य गछ़ि कऺमिस निश गछ़ि क्याज़ि गछ़ि, यिमन सवालन हुन्द जवाब छ़ान्डान छ़ान्डान नेरन म्यॆ बासान अख ज़ॖ त्रे पीरि ब्यॆयि यॆमि ब्रौंह कुन। मगर कऺशीरि मंज़ गुज़ऻर्यमॖत्य द्वह रोज़व ॳस्य याद करान तॊत ताम यॊत ताम ॳसि शाह छु। कशीर्य छि असि रुमन रुमन मंज़ बऺसिथ ति क्याज़ि ॳस्य छि कऻशिर्य तॖ कऺशीरि छि सऻन्य।
**********************
"नास्ति मातृसमं तीर्थं पुत्राणां तारणाय च हितायात्र परत्रार्थं यस्तु माता प्रपूजिता।"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
  नऺविव तॖ फॊलिव
    भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)