20.03.2019

20.03.2019, फागुन (फाल्गुन), ज़ूनॖ पछॖ (शुक्ल पक्ष), च़्वदाह (चतुर्दशी), ब्वदवार, श्री सप्तार्षि सम्वत
5094, राश कन्या (रऻच़ हॖन्ज़ॖ 9.34 बजि प्यठॖ), ऋतु बसन्त (चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: न तॖ कस छु नॖ पय
         श्रानॖ-पटस तल क्याह
         छु
   अ: राज़स छि आसान सऻरी
        वऻकॖफ़
2. मु: नमस तॖ माज़स छु नॖ
          दूर्यॆर
    अ: नऺज़दीक रिश्तॖ
3. मु: नम हय व्वथ माज़स
         छि दग़
    अ: नम तॖ माज़ छु कुनुय/
         ॳक्यसॖन्दि सॗत्य छि
         ब्यॆयिस शूब
4. मु: नमरूदॖन्य दम
    अ: लाफ़ दिन्य
5. मु: नमन मऻन्ज़ कमन
         किछ़
    अ: हुसुन छु यछ़न वाल्यव
         सॗत्य
**********************
1. पांछ़.....Five
2. पंदाह....Fifteen
3. पॖन्च़ॗह...Twentyfive
4. पान्च़ॖत्रॖह...Thirtyfive
5. पान्च़ॖतऻजी...Fortyfive
6. पान्च़ॖवनज़ाह...Fiftyfive
7. पान्च़ॖहऻठ...Sixtyfive
8. पान्च़ॖसतथ...Seventy-
                        five
9. पान्च़ॖशीथ....Eightyfive
10. पान्च़ॖनमथ...Ninety-
                         five
**********************
     गीता ज्ञान :अध्याय-11
स्वर्ग पृथ्वी आकाश हन हन,
सारी तर्फॖ च्यानि सॗत्य परिपूर्ण
अमि भयंकर रूपॖ त्रबवन लरज़ान
वॊन भगवानन गीता ज्ञान
**********************
कश्मीर समति छि दिल्लि मंज़ अख संस्था बन्यॆमॖच़ कुनवुहशथ तॖ त्रुवनज़ाहस मंज़ यानि स्यठा प्रऻन्य संस्था कऻशिर्य बटन हॖन्दि बापथ। दपान छि ज़ि तमिसात यानि कुनवुहशथ तॖ त्रुवनज़ाहस मंज़ यिम बटॖ दिल्लि मंज़ रोज़ान ॴस्य तिमन हॖन्ज़ि बॆहबूदी बापथ ॴस यि अख संस्था आमॖच़ बनावनॖ तॖ अमि संस्थायि दऺस्य आव अख मैग़ज़ीन "कऻशुर समाचार" ति कडनॖ यॆमि दऺस्य कऻशिर्य समाजस मंज़ ॴस ख़बर अतर ति ओरॖ-योर वातान। अमि संस्थियि छि जान जान कामि करिमच़ॖ वख्तॖ वख्तॗ यॆमि सॗत्य सऻनिस समाजस कऻफी फऻयदॖ मेलान रूद। अज़कल छि अथ संस्थायि मंज़ चुनावॖच समस्या खड़ा गऻमॖच़। कुनवुहशथ तॖ नमतॖ पतॖ बड्यॆयि अमि संस्थाहॖन्ज़ ज़िम्वऻरी स्यठाह ज़्यादॖ। मगर  दपान छि ज़ि अज़कलॖच प्रबन्धक कमीटी छॆ नॖ समाजक्यन लूकन हॖन्दि मनॖ मुवऻफिक कऻम करान। तमि म्वखॖ छि यछ़ान बदलाव अनुन मगर तथ कामि छि वारियाह अडचनॖ यिवान अनॖनॖ कॆंच़व सदस्यव दऺस्य तॖ बन्योमुत छु यि मसलॖ तनाव पूर्वक। ईश्वर दीनख स्वबुद्दी तॖ  मीलनख मसलन हल लडायव तॖ जगडव रॊस्तुय।
**********************
"नमस्तेsस्तु महामाये श्रीपीठे सुरपूजिते। शंखचक्रगदाहस्ते महाल‌क्ष्मि नमोsस्तु ते।।"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
नऺविव तॖ फॊलिव
  भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)