18.03.2019

18.03.2019, फागुन (फाल्गुन), ज़ूनॖ पछॖ (शुक्ल पक्ष), बाह (द्वादऺशी), च़ऺन्दॖरवार (सोमवार), श्री सप्तार्षि सम्वत 5094, राश सिंह (रऻच़ हॖन्ज़ॖ 9.45 बजि प्यठॖ), ऋतु बसन्त (चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: न्वश बनिनॖ कूर हश
         बनिनॖ मऻज्य
    अ: असलस तॖ फरहऻस
          छि वारियाह फरॖख
          आसान
2. मु: न्वश आयि रयॆत्य ज़न
         ॴस यॆत्य
    अ: न्वशि हुन्द दूर्यॆर नॖ
         बासुन
3. मु: निनॖ वऻलिस अकुय
         ग्वनाह रावन वऻलिस
         सास ग्वनाह
    अ: यस कांह चीज़ रावि सु
         छु वारिहान प्यठ शक़
         करान
4. मु: नऺनिस वुरुन छु सॊदुर
         पुरुन
    अ: ग़रीब व्वतलावुन छु
         मुश्किल
5. मु: नऺनिस दॊब क्या छलि
    अ: यॆमिस नॖ किंही आसि
         नॖ तस क्या कऺर्यज़ि
**********************
1. त्रॆ...... Three
2. त्रुवाह..Thirteen
3. त्रॊवुह...Twentythree
4. तॆयत्रॖह... Thirty-three
5. तॆयतऻजी...Fortythree
6. त्रुवनज़ाह...Fiftythree
7. त्रुहऻठ......Sixtythree
8. त्रुसत्तथ..Seventythree
9. त्रुशीथ....Eightythree
10. त्रुनमथ...Ninetythree
**********************
      गीता ज्ञान  :अध्याय-11
च़ॖ पर्म ब्रह्म परमात्मा छुख,परम आदार सारी ज़गतुक
सनातन प्वरुश धर्मुक निगाहबान
वॊन भगवानन गीता ज्ञान
**********************
युहुस ति छि असि द्वन ख्रावन प्यठ ख्वर ति ज़न गव ज़ि यिनॖवाज्यन हेरथमऻज्य छि सान्यव ज्योतिष माहराजव पनॖनि पनॖनि गणित हिसाब ब्यॊन ब्यॊन तिथियन प्यठ हऻवमॖच़। ओंकार नाथ जीयनि जंत्री मंज़ छि हऻविथ अकवुह फरवऺरी ज़ॖ सास वुह (21.02.2020) तॖ स्व डाक्टर मनमोहनॖन स्वपूतनि पुनीत जीयनि जंत्री मंज़ छि हेरथ हऻवमॖच़ वुहमि फरवऺरी ज़ॖ सास वुह (20.02.2020)  ॳथ्य छि वनान यीरनॖन्य नाव। नॖ प्रॖछ़नस कांह तॖ नॖ वनॖनस कांह। असि कऻशिर्य बटन छुख वऺनिथ थॊवमुत ज़ि नऺव जंत्री गछ़ि नॖ अंदर वुछिन तॊत ताम यॊत ताम नॖ अथ बुथ वुछ्यव थालस बुथ वुछिनिकॖ द्वह यानि नवॖरॆहस प्यठ। म्यॆ छु बासान तमि मूजूब मा आसि नॖ वारिहाव नऺव जंत्री वुनि ॳन्दरॖ वुछमॖच़ॖय। मगर म्यॆ रूद नॖ ताब , म्यॆ वुछ द्वनवय जंत्री तॖ पऺरिम ब्यॊन-ब्यॊन तिथि हेरऺच़ हॖन्द्य तॖ गोस हऻरान यि वुछिथ। म्यऻन राय छि ज़ि असि पज़ि ॳकिस जंत्री रोक लगावॖन्य। कथ जंत्री लगावव सु करव इकॖवटॖ बिहिथ मशवरॖ। दॊयिम राय म्यऻन्य छि ज़ि ॳस्य दिमव नाद यिमन दॊनवऺन्य ज्यॊतषियन तॖ पानस ब्रौंह कनि करव यिमन प्रॖछ़गऻर तॖ वातनोवोख कुनि ॳकिस तिथियस प्यठ तॖ ब्यॆयि ह्यमोख लीखित ज़ि ब्रौंहकुन नॖ दुबारॖ यिछ़ हरकथ करॖन्य तॖ असि ख्वामॖखा परेशान करुन। यिहॖन्ज़ दुकानदऻरी छि चलान, यिमन क्वस फिकिर छि, लूखॖय मूद्ययो ख्वदायो। जंत्री छि द्वनवय बाज़रस मंज़ आमच़ॖ, अड्यव छि ह्यच़ॖमच़ॖ तॖ अड्यन छि वुनि ह्यनय। मोकॖ छु वुन्यक्यनस जान। यिमन द्वन ब्रह्मा जियन तॖ बाकय कॆंच़न व्यदवानन नाद दिथ मसलस हल छ़ान्डुन। ब्यॆयि ति यॊदवय कॆंह कथॖ आसन तिमन ति यी समाधान छ़ान्डनॖ। असि गऺछ़ नॖ काहन गाव रावॖन्य। यीरवॖनि नावि रटहऻव नम कुनि जायि।च़ॖ वन ब्यॆनि बॖ वनय बायि, पनॖन्य कथ छय पनॖनि जायि। रामॖ लगय च़्यानि लीलायि।
**********************
"आपदामपहर्तारं दातारं सर्वसम्पदम, लोकाभिरामं श्री रामं भूयो भूयो  नमाम्यहम्।"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
नऺविव तॖ फॊलिव
  भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)