02.03.2019

02.03.2019, फागुन (फाल्गुन) गटॖ पछॖ (कृष्ण पक्ष), काह (एकादशी) बटॖवार (शनिवार/ शनिश्चरवार), श्री सप्तार्षि सम्वत 5094, राश मकर (दुहचि 12.39 बजि प्यठॖ), ऋतु शिशर (चलान)...अज़ छि गाडॖ-काह
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: वनि यूत तॖ रनि नॖ कॆंह
    अ: हॊछी माज़रथ
2. मु: वऺन्य वऺन्य गॊय कऺन्य
         पऺत्य
    अ: वऺन्य वऺन्य ति नॖ कॆंह
          व्यच़ुन
3. मु: वनि रावुख शुर
    अ: सु शुर यॆम्य ख़राब वथ
         आसि रऺटमॖच़/वति वति
         फेरन वोल
4. मु: वनॖ हऻ तॖ वन छुम दूरि
    अ: कऻम करनस हीथ
          ह्यॆन्य
5. मु: वनॖ रऻच़न तावन प्यॊन
    अ: कुडॖरिस समयस मंज़
          ब्यॆयि मुसीबत युन
**********************
1. कसॖब....Craft/Tech-
                 nique
2. कसॖबदार...Workman-
           ship/Skillful/
           Artistic
3. कसुन...To fry/To
                tighten
4. कुसतामथ....Someone
5. कसतामथ....To some-
                        one
6. कऺशिश..... Attraction
7. कष्ट...Distress/Pain/
        Hardship/Trouble
8.  कशुन....Itching/To
                  scratch
9. कऺशीद कऻरी... Embroi-,
                          dery
10. कशुन....To scratch/
                   Itching
**********************
     गीता ज्ञान   :अध्याय-11
युथ तॊह्य पानस वनान छिवॖ ठीख त्युथुय, तुहुंद ज्ञानॖ बल
ईश्वर्यी शक्ती यि रूप छुस प्रॆत्यख वुछुन यछ़ान
वॊन भगवानन गीता ज्ञान
**********************
अज़ छि गाडॖ काह। ॳज़्यकि द्वह ॴस कऺशीरि कऻशिर्य बटन अख रीथ आसान ज़ि शामन ख्यनॖ वख्तॖ ॴस बतस सॗत्य गाडॖ यिवान रनॖन।
स्व रीथ छा यॆति ति चलान किनॖ नॖ, म्यॆ छॆ नॖ अमिच ज़्यादॖ ख़बर।मगर बासान छुम ज़ि यि रीथ छि म्वकल्येमॖच़ व्वंय। मुम्किन छु कुनि कुनि गरस मा आसि वुनि यि रीथ बरक़रार। मकानन लिविनॖ डुवनॖ पतॖ ॴस कऺशीरि मंज़ व्वंय ठोकुर कुठिस कुन पनुन ध्यान यिवान दिनॖ माने पूज़ायि कमरस मंज़ या ठोकुर कुठिस मंज़क्यन चीज़न हॖन्ज़ साफ सफऻयी ॴस यिवान करनॖ।क्रालस निशि ओस यिवान वटुक सामान यानि नऺट्य,डुलिज, टऻक्य, सनिवारि, वगैरा वगैरा अनॖनॖ।व्वंय ॴस्य नॖ क्रालस निशि अनान बऺल्कि व्वंय ॴस प्रथा ज़ि स्टीलुक सामान ओस यिवान अनॖनि। पूज़ायि हॖन्द्य बानॖ, मूर्ति वैरा आसि ॳज़्यकि द्वह यिवान नावनॖ सावनॖ। वटख मसालॖ यानि डून्य, कंद, नाबद, स्यॆन्दॖर, वगैरॖ ओस यिवान अनॖनॖ तॖ ठोकुर कुठिस मंज़ यिवान थावनॖ।वॊसॖ-द्रॊसॖ ॴस रोज़ान दुह्यकिस दॊहस तॖ रोज़ान ॴस्य मश्गूल पनुन पान सजावनस मंज़, गरच्यन मूर्तियन साफ-सफऻयि करनस मंज़। हारन खुलॖ डुलु यिवान ओस गिन्दनॖ यि ज़ऻनिथ ज़ि कऻशर्यन छु अख पऺतिम मॊकॖ यि ति।
कथ ज़ि जऻरी।
**********************
"आपदामपहतार्रं दातारं सर्वसम्पदाम।
लोकाभिरामं श्री रामं भूयो भूयो नमाम्यहम।"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
 नऺविव तॖ फॊलिव
   भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)