29.03.2019

29.03.2019, च़ित्थॖर (चैत्र) गटॖ पछॖ (कृष्ण पक्ष)नवम (नवमी) शॊकुरवार (शुक्रवार/ जुम्मा),श्री सप्तार्षि सम्वत 5094, राश मकर (शामन 7.22 बजि प्यठॖ), ऋतु बसन्त (चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: नावि दकॖ दिथ च़लुन
   अ: मुसीबतस अंदर त्रऻविथ
        च़लुन/दोखॖ द्युन
2. मु: नऻल्य नॖ ज़ऺट मऻल्य
         नाव
   अ: ह्वखॖय बजर/लूकन
        थ्यकॖनावुन
3.मु: नागॖ गाडॖ वुछनि हलाल
        ख्यॆनि हराम
   अ: तिम चीज़ यिम इन्सान
        ह्यॆकि नॖ वरतऻविथ
4. मु: न करनस त्रॆ करॖन्य
    अ: बॆकारस त्रॆ कार/पानॖ
         नॖ करुन पॖरॖ पॖरॖ करुन
5. मु: नाव थॊद नसिति ज़ॊद
    अ: न्वकुस आसुन/नाव
        बॊड मगर अमल नॖ बऺड
**********************
       गीता ज्ञान  :अध्याय-11
पोंपुर नारॖ गाशस छि लारान
वुछान वुछान छि बस्म सपदान
यिम लूख ति च़्यॆ मंज़ अच़ान तॖ मरान
वॊन भगवानन गीता ज्ञान
**********************
दपान छि ज़ि महर्षि कश्यपस आसॖ त्रुवाह ज़नानॖ यिमव मंज़ॖ त्रॆ ज़नानॖ आसॖ तऺम्यसॖन्ज़ॖ पटरानी यानि बाकयव रानियन ख्वतॖ थदि पायदानचि युहुन्द नाव ओसमुत छु अदिति, दिति, दनु। यिमव पतॖ आसमच़ॖ रानियन हॖन्द्य नाव छि रूद्यमॖत्य सुरभि, कद्रू, वनिता वगैरा वगैरा। मानॖनॖ छु यिवान ज़ि तथ समयस मंज़ ओस शुरिसॖन्ज़ नाव तम्यसन्ज़ि माजि हॖन्दिस नावस सॗत्य जुडिथ आसान तॖ शायद छु यिहऻय वजह रूदमुत ज़ि अदित्य हॖन्दिस शुरिस प्योमुत छु नाव आदित्य, दित्य हॖन्दिस शुरिस ओसमुत नाव छु दैत्य तॖ दनु सॖन्दिस शुरिस ओसमुत छु नाव दानव। चूंकि बाकॖयन शुर्यन हुन्द नाव छु नॖ
जुडिथ तिहन्द्यन माज्यन सॗत्य सुय वजह छु दपान मानॖनॖ यिवान ज़ि यिम त्रॆ रानी मा आसहऻन महर्षि सॖन्ज़ पटरानी। वुछनॖ छु आमुत ज़ि सुरभि हुन्द न्यॆचुव युस ओस तस ओस नाव रुद्र तॖ कद्रू सन्दिस शुरिस ओस नाव नाग। यिम नाव छि नॖ पनॖन्यन माज्यन हॖन्द्यन नावन सॗत्य मेल ख्यवान तवय छि यिम ब्यॊन ग्वडनिक्यव त्र्यन शुर्यन निशि। मानॖनॖ छु यिवान ज़ि यिमन त्रुवहऻन ज़नानन हॗन्द्य शुर्य यॆलि बडान गऺयि यिम गऺयि ब्यॊन ब्यॊन जायन तॖ बनेयि तिमनॖय जायन हॖन्द्य बसकीन। मगर कऺशीरि मंज़ आमॖत्य छि रोज़ान नाग, पिशाच तॖ यक्ष। चूंकि नाग ओसमुत दपान हना ज़ोरावार तॖ ह्यॊतुक राज करुन कऺशीरि मंज़। तवय छु यिवान वनॖनॖ ज़ि कऺशीरि हुन्द ग्वडन्युक राज़ॖ छु रुदमुत नील राज़ या नील नाग।
**********************
"ब्रह्मरूपे सदानन्दे परमानन्द स्वरूपिणी, द्रुत सिद्धि प्रदे देवि, नारायणि नमोस्तुते।।"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
 नऺविव तॖ फॊलिव
   भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com. ति वुछिव)