14.03.2019

14.03.2019, फागुन (फाल्गुन) ज़ूनॖ पछॖ (शुक्ल पक्ष)ॴठम (अष्टमी), ब्रसवार (वीरवार/ब्रहस्पतवार), श्री सप्तार्षि सम्वत 5094, राश मिथुन (दुहचि 4.57 बजि प्यठॖ), ऋतु शिशर (चलान)...
अज़ छि तीलॖ-ॴठम तॖ अज़ छु सौंथ ति
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: नॆन्दरिहऺतिस खश
    अ: दोखॖ द्युन/बुज़दिली
          हावॖन्य
2. मु: न्यॆबरिम प्रॖछ़ान अंद-
         रिम्यन गाश आवा
    अ: ब्याख ज़ऻनिथ-मऻनिथ
         बेवकूफ बनावुन
3. मु: न्यामच़न छु नून शूबान
    अ: बऺड्यसॖय छु बजर
         शूबान
4. मु: नेकन छु ख्वदा ख्वश
    अ: नेकन छु दय ति रऻज़ी
5. मु: न्यॆबॖर्य व्वश अंदॖर्य
         ख्वश
    अ: अपुज़ हमदर्दी/वुठॖ
          हमदर्दी
**********************
1. कुनवुह.... Nineteen
2. कुनत्रॖह.... Twentynine
3. कुनतऻजी...Thirty-nine
4. कुनवनज़ाह..Fortynine
5. कुनहऻठ...Fifty nine
6. कुनसतथ...Sixty nine
7. कुनशीथ..Seventynine
8. कुन्नमथ...Eightynine
9. नव........Nine
10. नमनमथ..Ninetynine
**********************
     गीता ज्ञान  :अध्याय-11
        अर्ज़न दीव वनान
ही दीव छुस वुछान सऻरी ज़ीव
च़्यॆ मंज़ सऻरी दीव रॆश्य तॖ महादीव
पम्पोशस प्यठ ब्रह्मा जी विराजमान
वॊन भगवानन गीता ज्ञान
**********************
अज़ छि तीलॖ ॴठम। कऺशीरि  ओस अज़ शामन यारबलॖ चान्दन प्यठ बीरॖ लगान ल्वक्ट्यन नवजवानन हॖन्ज़ यिम कांगरि-ख्वर हॆय हॆय यिवान तथ मंज़ हॊख गासॖ बरान तॖ गासॖव रज़ बनावान तॖ गन्डान अथ कान्गरि तॖ दिवान च़ॖख तॖ नच़नावान पानस अंद्य-अंद्य तॖ वनान रोज़ान जतॗंतॗं, जतॗंतॗ। शामन श्यॆयि सति बजि प्यठॖ ओस यि नज़ारॖ चलान तालाकि रऻच़हॖन्ज़ि  काहन-बाहन बजन ताम। दऺरियाव जॆहलमस अपारि यपोर ओस नारॖय नार  बोज़नॖ यिवान। यिमन गरन आंगन बऺड्य ॴस आसान, तिम ॴस पनॖन्यन पनॖन्यन आंगन मंज़ यि जतॗंतॗ रोज़ान करान। योताम म्यॆ याद छु अज़ ॴस्य सऻन्य गरिक्य च़ऻन्ग्य ज़ऻलिथ दऺर्यावस मंज़ गासॖ आर्यन प्यठ त्रावान। हॆरऺच़ हुन्द अंद ओस असली ॳज़्य वातान।
अज़ सुबहऻय नॆन्दरि व्वथवुनॖय छु राथ शामन बऺर्यमॖतिस थालस बुथ ति वुछुन आसान तॖ भगवानस मंगान ज़ि यिनॖ वोल समय नीरिन ह्रच़ तॖ फ्रूच़ प्रथ रंग्य।
सौंथ माने बहार युन। अज़ छु विक्रमी सम्वत हिसाब च़ित्थर रयतुक ग्वडन्युक द्वह मगर सप्तार्षि सम्वत हिसाबॖ गछ़ि च़ित्थॖर वुनि अकि हफ्तॖ पतॖ शुरु तॖ चित्थर गटॖ पछॖ माविसि यानि पॗंच़मि अप्रील छु ब्यॆयि थाल बरुन तॖ च़ित्थरॖ ज़ूनॖ पछॖ ऒक्दॊह द्वह ब्यॆयि थालस बुथ वुछुन तॖ नवरॆह ति मनावुन। नवरॆह यानि नॊव वऺरी गछ़ि शुरु तमि द्वह प्यठॖ।
**********************
"प्रहलादिनी महामाता दुर्गा दुर्गति नाशिनी।अघोर व्याधिनाशी च घोर दु:ख निवारिणी"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
 नऺविव तॖ फॊलिव
  भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)