19.03.2019

19.03.2019, फागुन (फाल्गुन) ज़ूनॖ पछॖ (शुक्ल पक्ष) त्रुवाह (त्रयोदशी), बॊम्वार (मंगलवार),श्री सप्तार्षि सम्वत 5094, राश सिंह (चलान), ऋतु बसन्त (चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: ननॖवोर पकुन जान
         मगर पऻज़ारॖ नॖ तंग
    अ: प्यतॖरावॖनॖ ख्वतॖ छु न
         आसुन जान
2. मु: नंगस न्यॆन्दॖर प्रंगस
         प्यठ सऻविस न्यॆन्दॖर
         पऻविस प्यठ
    अ: आसनवऻलिस छि दऺह
          परेशऻनी तॖ न आसन-
          वऻलिस छॆ नॖ अख ति
3. मु:  ननि नानि हुन्द च़ॖनि
          ॴशनाव
    अ: स्यठा दूर्युक  रिश्तॗ
4. मु: नूनॖ गुर्य तॖ तेलि तलाव
    अ: अपुज़ थ्यकुन
5. मु: नऺनिस तॗर आयि तॖ
         द्रायि वऺल्यतिस तॗर
         वलनॖ आयि
    अ: मालदारस छि आसान
       परेशऻनी, छ़ऺरिस नॖ किंहीं
**********************
1. च़ोर....Four
2. च़्वदाह...Fourteen
3. च़ॊवुह...Twenty-four
4. च़ॊयत्रॖह...Thirty-four
5. च़ॊयतऻजी...Fortyfour
6. च़ुवनज़ाह...Fiftyfour
7. च़ूहऻठ......Sixtyfour
8. च़ुसत्तथ...Seventyfour
9. च़ुशीथ.....Eightyfour
10. च़ुनमथ...Ninetyfour
**********************
      गीता ज्ञान  :अध्याय-11
आदि अंत रॊस सर्वॖशक्तिमान
सिर्यि च़न्द्रमॖ नेत्र म्वख ॳग्न प्रज़लान
ज़गत सोरुय तुहुन्द तीज़ तपान
वॊन भगवानन गीता ज्ञान
**********************
ॳकिस छिनॖ वातान कुन ब्याख छु कलॖ कडान। असि वोत यी वुछान यिमव त्रॖहव वऺरियव प्यठॖ। वुनि रूद जंत्री हुन्द मसलॖ ॳती तॖ यपऻर्य आव कशमीर समति दिल्लि हुन्द मसलॖ व्वतॖलिथ। ततिकिस चुनावस क्याह बनि, कर यी करनॖ, किथपऻठ्य यी करनॖ, कुस करि तॖ कुस करनावि। करनाव्या ति किनॖ न। यि छु संजीदॖ मसलॖ। म्यॆ वोत यि मसलॖ वुछान पऺतिम्यव पाच़व शॆयव वऺरियव प्यठॖ। असुनाह छुस करान पानस सॗत्य यि वुछिथ ज़ि असि कऻशिर्य बटन क्वस छलॖ-छांगॖर छि गऻमॖच़ रंगॖ-रंगॖ। अकि फिरि कॆंच़न संस्थायन मंज़ ॳच़िथ कुनि पदस प्यठ रूज़िथ छि नॖ पतॖ अमि पदॖ प्यठॖ ब्वन वसनुक नावॖय ह्यवान। साफ़ छु बासान ज़ि अथ जायि छु क्याहताम माछ लऻरिथ युस नॖ त्रावनस व्वंदॖ यिवान छु तिमन महानुबावन यिम अमि पदॖ बापथ अकि फिरि च़ारनॖ छि यिवान। कम कम नाटक छि करान, छ़ौंम्बॖ करान, ॳपुज़ पॊज़ वऺन्य वऺन्य वख गुसावान। ॳकिस ब्यॆयिस सॗत्य दोंखॖ दोंख करान रोज़ान, ल्यकॖ-ल्यख करान रोज़ान, पनुन तहज़ीब तॖ तऺमीज़ मऺशरऻविथ कलामॖ करान रोज़ान। कॆंह छि यिमन कथन मौज तुलान तॖ कॆंह छि हऻरान यि वुछिथ ज़ि कथ हालस आयि वलनॖ कऺशीरि न्यबर नीरिथ। कऻतिहान गऺयि ॳछ फीरिथ। कऻतिहाव थऺव्य अरमान कूरिथ, कऻत्याह गऺयि कऻतिहान निश दूरिथ।
**********************
"श्वेतवस्त्र परीधानं नानाsलंकार भूषितं।
आनन्द मुदितं देवं ध्यायेत्पंकज विष्टरं।।"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
नऺविव तॖ फॊलिव
  भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)