12.03.2019

12.03.2019, फागुन (फाल्गुन), ज़ूनॖ पछॖ (शुक्ल पक्ष) शॆयम (षष्ठी) बॊम्वार (मंगलवार), श्री सप्तार्षि सम्वत 5094, राश वृष (दुहचि 10.22 बजि प्यठॖ), ऋतु शिशर (चलान)....अज़ छि कुमार शॆयम ति
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: वातल बटॖवार
    अ: अपुज़ वादॖ करुन/
         अज़ तॖ पगाह करुन
2. मु: वातलस दिच़ेयोख
         डायन गर्यन राज, तऺम्य
         कॊड दालुव ज़रॖब
    अ: थज़र प्रऻविथ ति नज़र
         छ़ॊट आसॖन्य/पनॖन्य
         ख़स्लथ नेशनावॖन्य
3. मु: वान्या मठस नय छु
         वुठस ति छुय ना
    अ: युस नॖ अथॖ रऺन्ग्य या
         कथि रऺन्ग्य मदद करि
4. मु: नेकनऻमी छि गछ़ान
         यॆच़कऻल्य बदनऻमी
         जलॖद
    अ: नाव कमावनस छु वख
          लगान, बदनऻमी नॖ
5. मु:नेकनऻमी छि बऺड दौलत
    अ: नेकनऻमी छु बजर
**********************
1. कऻन्य..One eyed lady
2. कुन्य...Single lady
3. कुन.....Single man
4. कून..... Corner
5. कुनि रऺन्ग्य..Some how
6. कुन्यर... Loneliness
7. कुंज़.....Key
8. कुन्ज़ि बरदार.....Key
                            keeper
9. कुन्ज़ कुलुफ...Key and
                          lock
10. कूत......How much
**********************
      गीता ज्ञान  :अध्याय-11
कॗत्य प्रकऻर्य अर्ज़न दीवन
वुछ ब्यॊन ब्यॊन ज़गत सम्पूर्नॖ
श्री कृष्णस मंज़ सोरुय वुछान
वॊन भगवानन गीता ज्ञान
**********************
अज़ गव म्यॆ यॆकीन ज़ि वनन वाल्यव छि कॆंह दपिथ कऻशुर यानि मुहावरॖ बनऻव्यमॖत्य या वऺन्यमॖत्य  सूंचिथ समजिथ, वाव वुछिथ या भाव बूज़िथ तॖ तजरुबॖ हऻसिल कऺरिथ। मुहावरॖ छु हून्य लॊट लज़्यॆयोख कन्द्यलस सु द्राव तति ति त्युथय यानि हॊलुय। ॳस्य कऻशिर्य बटॖ छि सऻरी पऺर्यमॖत्य लीख्यमॖत्य हना ज़्यादय पाहऻन तवय छि ॳस्य शायद ग़ल्तियन प्यठ ग़लती करान रोज़ान कुनि न तॖ कुनि चीज़स मंज़ तॖ पकान ब्रौंहकुन ॳछ वऺटिथ तॖ कन बंद कऺरिथ। म्यॆ आव नज़रि ज़ि सान्यन नवि सरॖ छ्यापिमच़ॖ धार्मिक किताबन मंज़ छि लिखऻर्यव पनॖनि पनॖनि त्रायि मंत्र सॊम्बरऻव्यमॖत्य ग्रन्थव प्यठॖ, उपनिषिदव प्यठॖ या ब्रौंह लेछिमच़ॖ किताबव प्यठॖ तॖ  असि ब्रौंह कनि थविमच़ॖ। यि कऻम छि स्यठाह जान आमॖच़ कऺरमॖच़ मगर यिमन किताबन मंज़ छॆ नॖ कुनी कथ आमॖच़ वनॖनॖ यॆमि म्वखॖ ॳज़्युक परनवोल परेशान छु ज़ि परे तॖ परि क्याह। ज़बऻन्य हय याद करि तॖ करि क्याह। लिखार्यव छि बड़ॖ जान मॆहनत कऺरमॖच़ किताबॖ छापनस मंज़ मगर किताबन मंज़ छपिथ अकुय मंत्र छु ब्यॊन ब्यॊन पऻठ्य ब्यॊन ब्यॊन किताबन मंज़ नज़रि यिवान। जंत्री मंज़ॖक्य कॆंह मंत्र छि नॖ वाठ ख्यवान तिमन मंत्रन सॗत्य यिम छापनॖ छि आमॖत्य विविध पूजा संग्रहस मंज़ य्यॊस श्री गिरधारी लाल रैना सऻबन, वैशाली वऻल्य लीछ्यमॖच़ छि। यिथय पऻठ्य छि नॖ कॆंह मंत्र या विधि वाठ ख्यवान तिमन मंत्रन सॗत्य यिम वेदामृत द्रव: मंज़ आमॖत्य छि छापनॖ। कॆंच़न मंत्रन परान परान छु बासान ज़ि ग़लत शब्द छि आमॖत्य छापनॖ यिम नॖ छापनॖ ब्रौंठ ठीख आमॖत्य छि करनॖ।यिछ़ अख किताब गऺयि म्यॆ नज़रि शालॖमऻर गार्डन क्षीर भवऻनी मंदरस मंज़। वनुनक म्योन मुद्दा छु ज़ि कम से कम गऺछ़्य मंत्र यिमन किताबन मंज़ अकी लयी तॖ अकी त्रायि हॖन्द्य आसॖन। कम्प्यूटरुक ज़मानॖ छु, ॳस्य छि संस्कृत पऻठ्य मंत्र परनस मंज़ अज्ञान तॖ अनज़ान तॖ प्यठ यॆलि कुनुय मंत्र आसि ॳकिस किताबि मंज़ अकि रऺन्ग्य तॖ ब्यॆयिस किताबि मंज़ सुय मंत्र ब्यॆयि रऺन्ग्य, सौंचस छु परनवोल प्यवान ज़ि हु परा किनॖ यि। फऻसलॖ छु नॖ ह्यकान कऺरिथ न छु ह्यकान वऺनिथ ज़ि सही कुस छु ति क्याज़ि पनुन पनुन तरक छि दिवान सऻरी, असली वथ हावन वऻल्य सॖन्ज़ छि व्यछ़य। हल छु अथ कथि छ़ान्डुन तॖ यिमन ॳज़्यच्यन धार्मिक किताबन छु फ्युर दिनुक लऻज़्यमी बनान।
**********************
"अचिन्त्य रूप चरिते सर्वशत्रु
विनाशिनि।रूपं देहि जयं देहि यशो देहि दिशो जह्वि"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
 नऺविव तॖ फॊलिव
   भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)