03.03.2019

03.03.2019, फागुन (फाल्गुन) गटॖ पछॖ (कृष्ण पक्ष) बाह (द्वादशी) आथवार (एतवार/रविवार), श्री सप्तार्षि सम्वत 5094, राश मकर (चलान), ऋतु शिशर (चलान)...अज़ छि वागॖर्य-बाह
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: वंदस फा जंदस तल
    अ: कुनि चीज़स छु पनॖनि
         विज़ि म्वल तॖ तऻसीर
2. मु: वनॖचन यार्यन दय सुन्द
         सग
    अ: बे वसीलस छु दय मदॖ-
         तस आसान
3. मु: वनन वालि च़्यॆ छय नॖ
         अकॖल तॖ बोज़न वालि
         च़्यॆ ति छय ना
    अ: बद-रद तॖ बे-फऻयदॖ
         कथॖ लगन नॖ बोज़ॖनि
4. मु: वननॖ वननॖ छु कॊह
         नशान
    अ: बद-रद वननॖ किन्य छि
       थऺद्य किरदार ति बदनाम
         गछ़ान
5. मु: वुमॖर छि ह्यॆछनॖच
   अ: वऻन्सि छु ह्यॆछुन प्यवान
**********************
1. कुशती.... Wrestling/
            Duel/Struggle
2. कश....... Throw
3. कश लायुन...To throw
                     with force
4. कशमकश... Struggle/
                       Effort
5. कशमकश करॖन्य...To
                 Struggle/To
                 attempt
6. किशमिश....Raisin
7. कुशादॖ..Broad/Open/
            Spacious/Wide
8. कुशादगी...Breadth/
            Exhilaration/
            Expansion
9. किफायत....Economy
10.कुकिल/कुकू..Cuckoo
**********************
      गीता ज्ञान  अध्याय-11
ही प्रभू छुस बॖ यछ़ान करुन
अमि अविनाशी रूपुक दर्शुन
अगर छिवॖ अथ लायक म्यॆ ज़ानान
वॊन भगवानन गीता ज्ञान
**********************
गाडॖ काह म्वकलॆयि राथ तॖ त्रोव अज़ क़दम असि वागॖर्य-बऻश्य मंज़। अज़ छि बरान वागुर तॖ सज्जावान ठोकुर कुठ या कमरस मंज़ स्व जाय यॆतिनस असि वटक-राज़ बॆहनावुन छु। जंत्री मंज़ छि हॆरच़ॖ पूज़ायि हॖन्ज़ विधि दिथ तॖ तमि मुतऻबिक छु असि ब्रौंहकुन पकुन। पगाह गऺयि पतॖ वटक-पूज़ा।
यॆमि लटि रूद तनाव ज़बर्दस्त ज़ि हॆरथ छा अज़ किनॖ पगाह। ब्यॊन ब्यॊन लूकन हॖन्ज़ ब्यॊन ब्यॊन राय। कुस करि फऻसलॖ कऺम्य दिच़ कऺमिस रॖच़ राय। त्रॆ पंचान्ग छि असि ब्रौंहकनि यानि ...विजयेशवर सॖन्ज़ॖ ज़ॖ, ॳकिस प्यठ विष्णु सुन्द फोटू तॖ दॊयिमिस प्यठ कृष्ण जीयुन फोटू तॖ त्रॆयिम पंचान्ग छु सतीसर फौंडेशनुक...कस प्यठ करव पछ़ तॖ कस प्यठ करव नॖ, यि छु अख बॊडबारॖ सवाल। वुछनस मंज़ आव व्वंय ज़ि असि बटन गऺयि ज़ॖ दऺर्य खड़ा...ॳड्य मनावन अज़ तॖ ॳड्य मनावन पगाह। म्योन अख सुझाव छु ज़ि असि पज़ि त्र्यन पंचान्गन बदलॖ कुनुय पंचान्ग थवुन तॖ पनॖन्यन गरन मंज़। सिरिफ अख पंचान्ग माने कुनी किताब। या नॖ मानुन ओंकार नाथ जीयुन न तॖ मानुन डाक्टर स्वर्गीय मनमोहन जी सॖन्दिस न्यॆचवि सुन्द। मगर फऻसलॖ प्यॆयि यिमन ज्योतषणॖय करुन ज़ि क्वस हिश अख जंत्री पज़ि असि थवॖन्य। बाकय गछ़न नॖ बाज़रस मंज़ रोज़नॆय। ॳज़्यकि लटि यि गव ति गव।
मज़य गव किर-किरॖ। सानि समाजिक लूख गऺयि परेशान खामॖखाहस प्यठ। फसाद तुलनोवुख अख ॳकिस सॗत्य। अख ॳकिस दिवान बारव। अनज़ऻनी मंज़ ज़ऻन्यकऻर्य तॖ सलाहकार सऻरी बनान। यस कोरि खांदर स्व कूर ल्वबरन। ओंकार नाथ जी या पुनीत जी फसाद पऻदॖ करनऻविथ लूकन मंज़ गरि बिहित मौज च़टान। ॳकिस दज़ान दऻर ब्याख वुशनावान अथॖ। तिम छ़्वपॖ कऺरिथ ॳसीय करान कथॖ।
**********************
"वन्देहं सच्चिदानन्दं भेदातीतं जगद्गुरुम।
नित्यं पूर्णं निराकारं निर्गुणं सर्व-संस्थितम् ।।"
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
नऺविव तॖ फॊलिव
  भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)