04.03.2019

04.03.2019, फागुन (फाल्गुन) गटॖ पछॖ (कृष्ण पक्ष), त्रुवाह (त्रयोदशी), च़ऺन्दॖरवार (सोमवार), श्री सप्तार्षि सम्वत 5094, राश कुम्भ (रऻच़ हॖन्ज़ॖ 1.43 बजि प्यठॖ), ऋतु शिशर (चलान)...अज़ छि हेरच़ॖ त्रुवाह
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: वऻन्लिजि प्यठ व्वखुल
    अ: नामुम्किन कऻम करॖन्य
2. मु: वखतुक कार गव
         बखतुक बादशाह
    अ: वख़तस प्यठ छु सोरुय
         शूबान
3. मु: म्वकदमस पतॖ नय फ्वॖ
         दमॖ आसि, गामस तुलि
         शामस ताम
    अ: बद-इन्तिज़ऻमी निशि
         बचनॖ म्वखॖ गछ़ि इन्ति-
         ज़ामॖच लाकम चीरॖ
         आसॖन्य/यिथय कनि
        गछ़ि हऻक्यमस प्यठॖ ति
        कांह आसुन
4. मु: वखतस नॖ यिवान
         म्वछि तॖ वखतस नॖ
         यिवान क्वछि
   अ: कुनि कथि प्यठ न
        रोज़ुन/ॳती अख तॖ
        ॳती ब्याख कथ
5. मु: वुश्यनिहॆनि यूर्य वलॖ
         तॗरिहॆनि ऊर्य गछ़
    अ: ॳमीर रिश्तॖदार छि
         टऻठ्य आसान तॖ ग़रीब
         छि दूर यिवान थवनॖ
**********************
1. क्वलावली....Bio data/
        Family particulars
2. क्वलुर...A kind of bird
              usually seen in
              water
3. क्वलॊंग... Crippled/
                    Lazy
4. कॊल गछ़ुन...To be-
                   come dumb
5. कवॖल्य....A small cup
6. कवॖ ...........For what
                      reason
7. कॊम..Husk/Embrace
8. कॊम-च़्वचि...Husk
                        bread
9. कॊम करुन...To break
        into husk/To beat
        black and blue
10. क्वलॖ मॊत....Hen
          pecked husband
**********************
      गीता ज्ञान  :अध्याय-11
       श्री भगवान वनान
भगवान छुस वनान हे अर्ज़नॖ
म्यऻन्य सासॖ बऺद्य बनावटॖ वऻल्य वरन
नाना प्रकऻर्य गछ़ रूप वुछान
वॊन भगवानन गीता ज्ञान
**********************
अज़ छि हॆरच़ॖ त्रुवाह। कॆंच़व कऻशिर्य बटॖव कऺर राथ हॆरऺच़ हॖन्ज़ पूज़ा तॖ कॆंह करन अज़ ति क्याज़ि युहुस रूद्य सऻरीय बटॖ द्वन तॖ च़्वन मंज़। समॖज आव नॖ लूकन ज़ि त्रॆयमि मार्च करवा किनॖ च़ूर्यमि मार्च करव। येमिस यि व्यच़ार आव तऺम्य कॊर तूर्यकुन रवख। अख ॳकिस रूद्य प्रॖछ़ान तॖ करान ती यी बुथि आख। लॊतिस ग्वबिस छु माफ। मगर मसलॖ गव नॖ हल कॆंह। हल सपदि मसलॖ तॆलि यॆलि यिम त्र्यनॖवय यानि पंडित ओंकार नाथ जी, पुनीत जी तॖ सतीसर फौंडेशनुक ब्रह्मन जी बॆहन इकॖवटॖ तॖ करन मशवरॖ तॖ वातन ॳक्यसॖय कथि प्यठ। त्र्यनवऺनी जंत्रीयन गछ़ि छपाय ब्रौंठ अख सरसऺरी नज़र यिन्य दिन्य तॖ वुछुन वऺर्युक पंचान्ग छा पकान ॳक्यसॖय त्रायि मंज़ किनॖ न। कम से कम गछ़ि नॖ यज़मन परेशान हंगॖ तॖ मंगॖ ।
खऻर व्वंय वुछव ॳज़िच हेरथ। कऻशुर गुरु जी छु नॖ नज़रि यिवान अज़ ति क्यज़ि ज़िठ्य तॖ ज़ऻन्यकार मूद्य तॖ व्वंय यिम कॆंह रूद्य तिमव बडोव पनुन बाव या हऻवॖख वखतॖच व्यछ़य तॖ तमि म्वखॖ यॊदवय कांह यछ़ान ओस ज़ि  सु करॖनावि हे ॳज़ॖच पूज़ा कऻन्सि ब्रहमनॖन दऺस्य तऺमिस बन्यव नॖ गुरु जीयी कांह। कऻशिर्य ब्रहमनॖन्य कऻम छि निभावान व्वंय हिमाचलॖक्य लूख यिमव कऻशिर पऻठ्य कर्मकान्ड ह्यॊछ तॖ म्वकॖलऻवॖख गुरु जियिन व्यछ़य कुनि हदस ताम। मगर स्व यज़मन तॖ क्वलॖ ब्रहमुन अख रिश्तॖ युस कऺशीरि मंज़ सासॖ बद्यव वऺरियव प्यठॖ चलान आमुत ओस सु गव ख़तम। व्वंय गव यि पशॖ प्यॆठ पकुना तॖ ब्यॆयि नॖ कॆंह। यि गव असि हालस बेहाल। सान्यन शुर्यन छॆ नॖ पतहॗय यि रिश्तॖ क्युथ रिश्तॖ ओस वखतॖ अकि कऺशीरि मंज़। यिथॖ पऻठ्य वाति अज़ हेरऺच़ माजि हुन्द द्वह व्वंय अंद। पगाह गऺयि सलाम। कथ जि जऻरी।
**********************
"करोतु सा न: शुभहेतुरीश्वरी
शुभानि भद्राण्यभिहन्तु चापद:"
पऺरिव यि मंत्र ति दॊहय
**********************
 कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
   नऺविव तॖ फॊलिव
     भूषण कौल "दीप"

(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)