11.03.2019

11.03.2019 फागुन (फाल्गुन) ज़ूनॖ पछॖ (शुक्ल पक्ष) पऻन्च़म (पन्चमी) च़ऺन्दॖरवार (सोमवार),श्री सप्तार्षि सम्वत 5094,राश मेष (चलान), ऋतु शिशर (चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: वाज़ गव लूकन क्युत
    अ: दॊयम्यन परुन पानस
         पॖर पॖर/अमल नॖ करॖन्य
2. मु: वाक वादिनी भैरवी
    अ: वन-वन कऺरिथ छु ती
         सपदान
3. मु: वारिनि निश शुर थवुन
         खऺटिथ
    अ: राज़दारस निश राज़
         खटुन
4. मु: वादस वाद न्यालस
         न्याय
    अ: वाद-वाद करुन/बे-
         लिहाज़ॖ पऻठ्य वर्ताव
         करुन
5. मु: वाजि सान अथॖ प्यठ
         थावुन
    अ: कऻन्सि रुत करनॖ वरऻय
         मिनथ खारॖन्य
**********************
1. कॊत....Where
2. कूत....How much
3. कूत काल...How long
4. कॊठ....Knee
5. कोठॖ....Hut/Small
               house
6. कुठ....Room
7. कॖठ....Fault
8. कॖठ कडॖन्य...To find
                         fault
9. कूठॖर...Hut type room
10. कोतुर... Pigeon
**********************
       गीता ज्ञान :अध्याय-11
अगर यिकॖवटॖ सासॖ बऺद्य सिर्यि खसन, सु प्रकाश कोताह आसि सपदन
विश्व रूपी ब्रह्म प्रकाशस नॖ वातान
वॊन भगवानन गीता ज्ञान
**********************
राथ सपुद बॊड बारॖ प्रोग्राम हॆन्दी बवनॖ, दिल्लि मंज़। यि प्रोग्राम आव करनॖ जॊम्मू कश्मीर विचार मंचॖ दऺस्य यथ मंज़ कऻशिर्य भजन कीर्तन आयि करनॖ फऺरीदाबादॖ तॖ रोहिनी प्यठॖ आमच़ॖ भजन मंडलियव दऺस्य। गाशॖ तारकस मंज़ हिसॖ निनॖवऻल्य ल्वकट्यव-ल्वकट्यव शुर्यव दऺस्य तॖ बनोवुख माहोल रंगीन। अमि अलाव आव अथ प्रोग्रामस मंज़ कऻशिर्य ज़बऻन्य मंज़ शुर्यन हॖन्दि दऺस्य यि वुछन ज़ि कुस कोताह छु ह्यकान पनॖनि माजि ज़्यॆवि मंज़ कथॖ कऺरिथ तॖ आव नक़द यॆनामॖ दिनॖ तॖ तमि अलावॖ अख सर्टिफिकेट तॖ शील्ड दिनॖ। पेंटिंग मंज़ आव मुकाबल करनॖ तॖ जान पेंटिंग करन वाल्यन आव यॆनामॖ दिनॖ। अमि मऺज़ीद आव फैंसी ड्रसस मंज़ मुकाबलॖ करनॖ तॖ तिमन ति आव यॆनामॖ दिनॖ। ब्यॆयि आव यॆनामॖ दिनॖ यिमव वारिहाव करामाच़व दऺस्य पनुन नाव छु कमोवमुत पनॖनिस समाजस मंज़। श्री प्रुभु चावला जी अख नामावार शख्सियत ॴस्य मॆहमानि ख़ास। ख्यनॖ-च्यनॖच व्यवस्था ति ॴस आमॖच़ करनॖ। अथ प्रोमस मंज़ आयि कॆंह स्क्यट ति हावनॖ येमि दऺस्य समाजिक्यन कॆंच़न त्रुटियन कुन ति आव इशारॖ दिनॖ। प्रोग्राम रूद बेहतरीन। आडिटोरियम ओस खचाखच बऺरिथ। लूख ॴस्य आमॖत्य ब्यॊन ब्यॊन जायव प्यठॖ तॖ तुलुख लुत्फा प्रोग्रामुक। जे के विचार मंचॖ दऺस्य रूद यि अख कामयाब प्रोग्राम पनॖनि समाजि बापथ।
**********************
"शरणागत दीनार्त परित्राण परायणे। सर्वस्यार्तिहरे देवि
नारायणि नमोस्तु ते।।"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
  नऺविव तॖ फॊलिव
    भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)