24.03.2019

24.03.2019, च़ित्थॖर (चैत्र) गटॖ पछॖ (कृष्ण पक्ष),च़ोरम (चतुर्थी)आथवार (एतवार/ रविवार),श्री सप्तार्षि सम्वत 5094,राश वृश्चिक (रऻच़ हॖन्ज़ॖ 1.7 बजि प्यठॖ), ऋतु बसन्त (चलान)..अज़ छि संकट च़ोरम ति
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: नच़ॖहऻ आंगुन छु छ़ॊट
         ग्यवॖहऻ तॖ ग्यव ख्यव
         ब्रऻर्य वनॖहऻ तॖ वन छुम
         दूर
    अ: न तगनॖक्य छ़्रठ
2. मु: नऺट्य फुटान तॖ यारबल
         छि रोज़ान ॳती
    अ: लूख छि यिवान गछ़ान
       तॖ जायि छि रोज़ान ॳती
3. मु: नटिच दिमय नॖ त्रेश
         हट्युक वंदय रथ
    अ: अपुज़ लोल बरुन
4. मु: नबॖ दुब तॖ प्यॆन्जि छम्ब
    अ: बे-मोत मरुन/हंगॖ
         मंगॖ मरुन
5. मु: नबॖचि तारॖ च़टनि
    अ: लायक़ ग्यवुन
**********************
1. ताअबद.....For the
           whole life/Ever
           lasting
2. ताब....Patience/
              Endurance
3. ताब अनुन....To show
              patience/
           Suffer silently/
           Endure
4. ताब करुन....To be
                        patient
5. ताब नॖ अनुन...To be
            impatient/Be
         unable to endure
6. ताब नॖ आसुन...To be
         impatient
7.  ताबवुन/ताबान...Shin-
                              ing
8. ताबेदार.... Obedient/
           Loyal/Servant
9. ताफ़.....Sunshine/
                 Sunlight
10. तापस थवुन..To keep
            in sun/To keep
            pending/To
            keep in sunlight
**********************
      गीता ज्ञान :अध्याय-11
आकाशस ताम च्योन रूप तेज़वान, वाहरऻविथ ॴस ॳछ ज़ोतान
छुस कऻन्पान सबॖर छुम रावान
वॊन भगवानन गीता ज्ञान
**********************
दपान कऻशिर्य बटन हॖन्द्य संस्कार छि हऻविथ लोगा‌क्षि गृहसूत्र किताबि मंज़। यि किताब छि तक़रीबन ज़ॖ सास वऺरी ब्रौंठ आमॖच़ लेखनॖ तॖ अज़कल यि किताब मेलॖन छि हना मुश्किल अलबतॖ अथ किताबि मंज़क्यन कॆंच़न संस्कारन हुन्द ज़िकिर छु आमुत करनॖ ब्यॊन ब्यॊन  कॆंच़न किताबन मंज़ तॖ ॳस्य कऻशिर्य बटॖ छि तिमनॖय संस्कारन प्यठ पकनॖच कूशिश करान। संस्कार गव क्याह। वारिहायि लटि वॊथ यि ख़याल म्यऻनिस मनस मंज़ तॖ म्यॆ ह्यॆच़ छ़ऻन्ड दिन्य होरॖ योर, कॆंच़न किताबन मंज़, कॆंच़न ज़िठ्यन प्रुछ़ुम, कॆंच़न ज़ऻन्यकारन वोतुम प्रॖछ़ान तॖ अज़ ताम वोत म्यॆ ह्यॆछान ज़ि संस्कार गऺयि क्याह। छ़ॊट्यन लफ़ज़न मंज़ नन्यव म्यॆ ज़ि संस्कार ॳकिस समाजस मंज़ गयि तिम यिमव सॗत्य सानि समाजिच प्रज़नथ रोज़ि बरक़रार। सुबॖ प्यठॖ शाम ताम अख आम इन्सान यिम यिम कामि करान छु सु छु पनॖनि समाजिकि संस्कृति हॖन्दिस दायरस मंज़ रूज़िथॖय करान रोज़ान मगर कुनि सातॖ कांह इन्सान तमि दायिरॖ न्यबर नीरिथ कॆंह कामि छु यॆलि करान दपान छि ज़ि सु डॊल पनॖन्यव संस्कारव निशि। ॳस्य योदवय पनॖन्यन संस्कारन कुन अख नज़र त्रावव, असि छु बासान ज़ि ॳस्य छि कुनि कुनि जायि पनॖनि हेनि निशि वारियाह हदस ताम डऺल्यमॖत्य। क्याज़ि डऺल्य, कर डऺल्य, कति डऺल्य, यिमन सारिनी कथन हुन्द जवाब छु मेलान ज़ि हालऻतव कऺर्य ॳस्य मजबूर कुनि हदस ताम तॖ कुनि हदस ताम छि ॳस्य पानॖ ति ज़िम्वार यमुक असर नज़रि छु यिवान असि पनॖनि नवि पुयि मंज़। कथ छि जऻरी
**********************
"सिद्धिबुद्धिप्रदे देवि भुक्तिमुक्तिप्रदायनि।
मंत्रमूर्ते सदा देवि महालक्ष्मि नमोsस्तुते।।"
पऺरिव यि मंत्र ति दॊहय
**********************
 नऺविव तॖ फॊलिव
  भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)