22.03.2019

22.03.2019, च़ित्थॖर (चैत्र)   गटॖ पछॖ (कृष्ण पक्ष) द्वय (द्विती) शॊकुरवार (शुक्रवार/ जुम्मा), श्री सप्तार्षि सम्वत 5094, राश तुला (रऻच़ हॖन्ज़ॖ 10.1 बजि प्यठॖ), ऋतु बसन्त (चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: नऺसीबॖ छु हापुथ
    अ: क़ॖस्मत छु स्यठाह
         ज़ोरावार
2. मु: नऺसीबॖ यॆलि डलि
         आमॖच़ क्वकॖर छि पऺत्य
         गछ़ान
   अ: बद-नऺसीबी मंज़ छु प्रथ
        कांह चीज़ रावान
3. मु: नऺसीबॖ वऻलिस छु पनुन
         नसीबॖ सॗत्य सॗत्य
         आसान
   अ: बख्तावरस छु नॖ बखॖत
        त्रावान
4. मु: नफ़स छु सन दीवना-
         वान तॖ च़ूर करनावान
    अ: नफ़सॖ खऻतरॖ छु इन्सा-
         नस प्रथ कांह कार
         प्यवान करुन
5. मु: नफ़ॖहुक छु तसलाहॖय
         गाटॖ मो पाव हांगल्यो
         करॖयो शुपि सॗत्य वाव
    अ: असलस खुर अनुन/
         कॆंह हऻसिल सपदनॖच
         व्वमेद न करॖन्य
**********************
1. सथ....Seven
2. सदाह....Seventeen
3. सतोवुह.Twentyseven
4. सत्रॖह.....Thirty-seven
5. सत्तऻजी...Fortyseven
6. सतवन्ज़ाह..Fiftyseven
7. सतहऻठ...Sixtyseven
8. सतसतथ...Seventy-
                     seven
9. सतशीथ..... Eighty-
                       seven
10. सतनमथ...Ninety-
                       seven
**********************
    गीता ज्ञान  :अध्याय-11
काह रुद्र बाह आदित्य तॖ ॴठ वऺसू
गंधर्व प्यॆत्र  राख्यस तॖ स्यॆद्य सादू
हऻरान गऺछ़िथ च़्यॆ कुन वुछान
वॊन भगवानन गीता ज्ञान
**********************
राथ ॴस्य हूल्य। लूकव गिन्ज़ यडबऺरिथ हूल्य। अख ॳकिस सूज़ुख मुबारक मोबाइलॖ दऺस्य यानि व्हाटसापॖ ज़ऺरियि तॖ फोन कऺर्य कऺर्य। ॳज़्यकि द्वह आसॖ कॆंच़व गरव गुजिया बनाविमच़ॖ, नमकीन शकरपारॖ बनावमॖत्य, कॆंच़न जायन बूज़ुम ॴस ठंडऻयी आमॖच़ बनावनॖ तॖ कुनि कुनि जायि बंगॖ ति च्यावनॖ। हालांकि ॳस्य कऻशिर्य छि व्यस्तारॖ सानॖय हूल्य गिन्दान तॖ बंगॖ या ठंडऻयी निशि दूर रोज़ान मगर चूंकि यॊदवय कुनि न्यॆबरिमि महफिलि मंज़ लगान छि तॖ तति छि नॖ ह्यकान नकार कऺरिथ। ॳज़्यकि द्वह छि कुनि कुनि जायि लडऻय जग्डॖ ति गछ़ान रोज़ान गर्मा-गर्मी मंज़। ब्यॊन ब्यॊन जायन छि ब्यॊन ब्यॊन तऺरीकव यिवान हूल्य गिन्दनॖ। वुछवहय तॖ यथ त्यौहारस छु पनुन लुतुफ तॖ ब्यॊन अंदाज़ गिन्दनुक हालांकि रंग छ्यॆक्य छ्यॆक्य छि पलवन ॳदरॖखल गछ़ान।
पिचकार्यन छु भाव बडान।गुलालस छि थफॖ-थफ करान। ब्यॊन ब्यॊन रंगॖक्य गुलाल अख ॳकिस मऺथित छि बुथिस शक्लि बे-शकॖल गछ़ान मगर शूबवुन तॖ ख्वशयुवुन आकार ति छु वुछनस तल यिवान। कानपुरस मंज़ दपान लगान छु गंगा गाठस प्यठ होली मेला या होली मिलन यथ मंज़ लूख छि पानॖवुन्य अथवास करान, नालॖमऺत्य करान तॖ अख ॳकिस यिनॖवाल्युक समय रुत नेरनुक ॴशिर्वाद दिवान।असि सारिनी ति नीरिन्य यि हूल्य हृच़ तॖ फ्रूच़।
**********************
"नमस्ते गरुडारूडे कोलासुर भयंकरि। सर्वपापहरे देवि महालक्ष्मि नमोsस्तुते।।"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
नऺविव तॖ फॊलिव
  भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)