01.03.2019

01.03.2019, फागुन (फाल्गुन) गटॖ पछॖ (कृष्ण पक्ष), दऺहम (दशमी) शॊकुरवार (शुक्रवार/जुम्मा), श्री सप्तार्षि सम्वत 5094, राश धनु (चलान), ऋतु शिशर (चलान)...दऺहम हुन्द वॊहरवोद यी अज़..चिल्लॖ बचॖ ति म्वकॖल्यव अज़
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: वॊछ़ रटुन छा सऺहल
         किनॖ गाव च्यावॖन्य
    अ: प्रथ कुनि कामि छु
         पनुन पनुन म्वल
2. मु: व्वज़िम्यो क्वत गोख
         हुर्यॆर रावरावने
   अ: व्वज़ॖमिस छॆ नॖ बरकथ
3. मु: वॊथिव कॊठ्यव बिहिव
       कॊठ्यव ख्यॆयिव शिकार
       माज़, वॊथिव नय बिहिव
       नय ख्यॆयिव पनुन मांज़
   अ: युस करि हर्कत सु प्रावि
        फल
4. मु: वव बा वव तॖ लोन बा
         लोन
   अ: युथ ववख त्युथ लोनख
5. मु: वूंटॖ नच़ुन तॖ ख़रॖ ह्यंग
         छु मशहूर
    अ: वुचापॖगी छि बे-असर
         आसान
**********************
1. कॊन.... Messenger
2. कून्स... Younger/
                Junior
3. कूनस...In a corner
4. कूनल... Angular
5. कून...... Corner/Side
6. कून्ज.... Corner
7. कुन्ज़.....Key
8. क्वम्ब....Small pot for
              water/Festival
9. कॊम..... Embrace
10.कॊम करॖन्य...To emb-
                         race
**********************
     गीता ज्ञान  :अध्याय-11
बूज़ुम ज़ीवन हॖन्ज़ उत्पती तॖ प्रलय
तुहॖन्दि नाशॖ रॊस आसॖनॖच वखनय
यि रूप बूज़ म्यॆ व्यस्तारॖ सान
वॊन भगवानन गीता ज्ञान
**********************
चिल्लॖय कलान, चिल्लॖ ख्वरुद तॖ चिल्लॖ बच्चॖ यानि चतजिह, वुह तॖ दऺह द्वह यानि कुल सतथ द्वह ॴस्य कऺशीरि मंज़ सख़ सर्दी-हॖन्द्य आसान तॖ ॳज़्यकि प्यठॖ ॴस ह्यवान तॗर हमॖन्य वारॖ वारॖ तालाकि तीलॖ ॴठम ताम यॆमि द्वह कऻशिर्य बटॖ ॴस्य ज़ालान तॗर कांग्रिख्वरव दऺस्य, क्रॆंजिलि ख्वरव दऺस्य यारबलनक्यन चांदन प्यठ। गासॖव रज़ गऺन्डिथ तॖ गासॖ मंज़ बऺरिथ ओस यिवान यिमन कांग्रि या क्रॆंजलि ख्वरन नार दिनॖ तॖ यिवान नच़नावनॖ तॖ सॗत्य सॗत्य ॴस्य वनान जतॗं तॗं, जतॗं तॗं। दपान ॴस्य ज़ि वंदॖ म्वकॖल्यव। हेरच़ पतॖ य्यॊस ॴठम यी स्व गऺयि तीलॖ ॴठम। युहुस आयि हेरथ ज़न शऺगनावनॖ।ॳड्य छि वनान त्रॆयिमि मार्चॖ तॖ ॳड्य छि वनान च़ूरिमि मारचॖ। यि छि ग़लती सरासर ग़लती सान्यन ज्योतिष्यि आचार्यन हॖन्ज़ यिम नॖ ह्यकान छि  वऺर्युक पंचान्ग कडनॖ ब्रौंठॖय इकॖवटॖ मीलिथ तॖ तय कऺरिथ ज़ि कुस बॊड द्वह कमि द्वह यी। पतॖ छि शाल च़ऺलिथ बठ्यन लोरि दिवान। पनॖन्यन यॆज़मनन द्वन तॖ च़्वन मंज़ त्रावान। अख दिवान अख तरक तॖ ब्याख दिवान ब्याख तरक। तॖ खामॖखा परेशान करान कऻशिर्य बटन। असि पज़ि यिमन ज्योतिष जियन साफ़ पऻठ्य वनुन ज़ि यॊदवय तिम ह्यकान छि नॖ यिथ्यन मोकन फऻसलॖ कऺरिथ, तिमन पज़ि जंत्री छापनी बंद करॖन्य। म्यंगॖ दगॖय म्वकलि। न तॖ पज़ि तिमन छापनॖ ब्रौंठ पानॖवॖन्य मशवरॖ कऺरिथ कुनी वनन करॖन्य तॖ असि यिमव अज़ाबव तलॖ म्वकजार द्युन।
कथ जि जऻरी
**********************
"नन्दणतु साधका सर्वे विनष्यन्तु विदूषका, अवस्थाम् शामभ्वीमsस्तु प्रसन्नस्तु गुरु सदा।"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
******************* ***
  नऺविव तॖ फॊलिव
   भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(kashursabak.blogspot.com ति वुछिव)