10.02.2019

10.02.2019, माघॖ ज़ूनॖ पछॖ (शुक्ल पक्ष),पऻन्च़म (पन्चमी), आथवार (एतवार/ रविवार), श्री सप्तर्षि सम्वत 5094,राश मेष (रऻच़ हॖन्ज़ॖ 7.36 बजि प्यठॖ), ऋतु शिशर (चलान)...द्रठॖपऻन्च़ुक (पंचक) ति समाप्त अज़,..अज़ छि बसंत पऻन्च़म (बसंत पंचमी) ति तॖ कुमार शॆयम (षष्ठी) ति
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**********************
1. मु: या पूर न तॖ दूर
    अ: कऻम अंद वातॖनावॖन्य
         न तॖ मटि ह्यॆन्य
2. मु: या च़लुन या च़ालुन
    अ: यॆमिस नॖ त्वछ़ आसि
       तऺमिस पज़ि नॖ मऻदानस
       मंज़ वसुन
3. मु: यार ज़िन्दॖ सॆहतयऻबी
    अ: ज़िन्दॖ ज़ुवय छि प्रॖछ़-
         गऻर
4. मु: ह्यनॖ आव तॖ ख्यनॖ आव
    अ: खुर्य काम्यन मंज़ ह्यनॖ
         युन
5. मु: ह्यडुन गेलुन पानस
         मेलुन
    अ: युस यस ह्यॆडि तस यी
         पानस ह्यडनॖ/ह्यडनस
         गेलनस परिहेज़ करुन
**********************
1. गेरुन....To surround
2. ग्यॆन्य.... Wrinkle/
           Breaking crease
3. ग्यूर...Revolvingness
             Giddy
4. ग्यऻनी..Scholar/Sage
5. ग्यान...Spiritual/
                Knowledge/
                Wisdom
6. ग्यवुन....To sing
7. ग्यवन बऻथ... Lyric/
                        Song
8. ग्यवन वोल...Singer
9. ग्यव....Sing/Ghee
         (Clarified butter)
10. गीरुन....To pour/To
          scatter/To throw
          down
**********************
     गीता ज्ञान :अध्याय-10
बॖ शंकर छुस काहन रुद्रन मंज़
वसवन मंज़ ॳग्न सुमेर पर्वतन मंज़
यछ़न मंज़ धनुक स्वामी कबीर ज़ान
वॊन भगवानन गीता ज्ञान
**********************
अज़ छि बसंत पऻन्च़म। यिम ज़ॖ त्रॆ द्वह ॴस्य यिवान मानॖनॖ बऺड्य द्वह यानि रंगॖ द्वय, गोरॖ त्रय, तिक्य च़ोरम, बसंत पऻन्च़म तॖ क्वमार शॆयम। लगातार यिम बऺड्य द्वह तॖ माघुन यि रयथ यि छु यिवान मानॖनॖ स्यठाह पवित्र रयथ वऺरियुक। कॆंह लूख छि पूरॖ माघुक माघ दरान यानि माघॖकिस रयतस फ़ाकॖ थवान। ब्यॊन ब्यॊन दॊहन ब्यॊन ब्यॊन आहार ख्यवान तॖ कॆंह द्वह निराहार थवान। मगर म्यॆ छु नॖ बासान अज़कल आसि सानि ज़ऻच़ मंज़ वुनि यिम द्वह दरान। यॊदवय कांह वुनि छु यथ माघॖ रयतस मंज़ सॊय यछ़ तॖ पछ़ ह्यथ थऺविथ पकान म्योन नमन छु तस। सान्यन ज़िठ्यन ओस कऺशीरि मंज़ धर्म कर्म ज़बर्दस्त मगर यॆति आम नॖ त्युथ नज़रि कॆंह। आसि मा कांह कांह वुनि ति करान तॖ शायद छि ॳस्य ति तिहॖन्ज़ी ॴही सॗत्य द्वह द्वह कडान। असि ॴस्य सुबॖ प्यठॖ शाम ताम ह्यॆछनावान।बूठ गछ़ि नॖ कमरस मंज़ च़ानुन, न्यॆबरॖ गछ़ि वुज़स मंज़ दवुन, ख्यनॖ च्यनॖ ब्रौंठ गछ़ि म्यॆच़ि सॗत्य अथॖ छलुन, बतॖ ख्यनॖ ब्रौंठ हून्य-म्यॆबट त्रावॖन्य, चोकि प्यठ या पीरि प्यठ पथर बिहिथ बतॖ ख्यॊन।वगैरा वगैरा। मगर यिम चीज़ रूद्य नॖ व्वंय म्यॆ बासान। वुज़ रूद्य नॖ, चूक्य या पीर छे नॖ कुनी, हून्यम्यॆट खालॖय कांह आसि त्रावान तॖ त्रऻविथ हूनिस ताम वातनावान। फ्लैटन मंज़ छि नॖ यिमन चीज़न हॖन्ज़ व्यवस्था। असि मंज़ नॖ कांह वननवोल तॖ नॖ कांह करनवोल। कथ छि जऻरी।
**********************
"या देवी सर्वभूतेषु मात्र रूपेण संस्थिता नमस्तस्यै नमस्तस्यै नमस्तस्यै नमोनम:"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
 नऺविव तॖ फॊलिव
   भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)