17.02.2019

17.02.2019, माघॖ ज़ूनॖ पछॖ (शुक्ल पक्ष) बाह (द्वादश), आथवार (रविवार/एतवार), श्री सप्तर्षि सम्वत 5094, राश कर्कट (दुहचि 11.22 बजि प्यठॖ), ऋतु शिशर (चलान)...चूंकि पगाह छि त्रुवाह रावान, त्रुवुश हुन्द वॊहरवोद यी ॳज़्य यानि बऻश द्वह
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**********************
1. मु: हलि ति श्राख तॖ बलि
         ति श्राख
    अ: प्रथ तरफ़ॖ खोफ़ तॖ
         ख़तरॖ आसुन
2. मु: हऺलिस कऺलिस ख्वदा
         दोस्त
    अ: स्यज़रस पज़रस छु नॖ
         ज़वाल/सादगी छि
        लाज़वाल
3. मु: हलि गन्डॖन लायक़
         ज़्यव आसॖन्य
    अ: कथॖगॊर आसुन
4. मु: हम प्यालॖ हम निवालॖ
    अ: इकॖवटॖ ख्यन-च्यन
         करनवऻल्य/सॗत्य सॗत्य
         रोज़नवऻल्य/कुनी कथ
         आसॖन्य
5. मु: हनि प्यठ हन खसॖन्य
    अ: व्यठुन/व्यठुन-पॊठुन
**********************
1. ख्वडॖफेंचल...Mischie-
                        ous
2. ख्वडॖक्यॊम...An insect
              (Wood insect)
3. ख्वडॖमॊंड...Part of the
             tree between
          roots and stump
4. ख्वरॖशोर...From head
                    to foot
5. ख्वर च़ानुन...To enter/
               To make way
6. खुर्यदार...Twisted/
                 Complicated
7. खुर कासुन..To resolve
             complication/
             Untwist
8. खुर युन..To be involv-
            ed in problems/
            To be twist
9. खुलॖ....Open/Wide
10. खुला... Divorce
**********************
      गीता ज्ञान : अध्याय-10
सृष्टियन हुन्द आदि अंत ब्यॆयि दरमियान
विद्यायन मंज़ म्यॆ ब्रह्मॖ विद्या ज़ान
बहस करन वाल्यन हुन्द वाद म्यॆ ज़ान
वॊन भगवानन गीता ज्ञान
**********************
पंडित पोष्कर नाथ रैना जियन युस ज्यॆमि मनोरमा विहारॖ रोज़ान छु, छि पनॖनि ॳकिस किताबि "ह्यंज़े वनवुन हियमाल" मंज़ सान्यन कॆंच़न संस्कारन मुतलक वारियाह कॆंह ल्यूखमुत व्यछ़नऻविथ तॖ कॆंच़न तिमन कथन हुन्द ग्यान छु असि ति मेलान यिम सानि द्यमागॖ मंज़ द्रामच़ॖ छि कुनि न तॖ कुनि कारणॖ। श्री मोहन लाल आश जियन ति छि सान्यन संस्कारन प्यठ स्यठाह कॆंह ल्यूखमुत मगर परन वाल्यन हॖन्ज़ व्यछ़य छि। यॊदवय कांह परान ति छु, अमलि मंज़ अनॖनॖच व्यछ़य छि। म्यॆति वोत मोबायलॖ दऺस्य  वारियाह कॆंह वनान तॖ लूख छि तऻरीफ़ करान म्यानि कामि मगर तऻरीफ़न सॗत्य सॗत्य अगर म्यॆन ब्यॆनि बऻय यिमन कथन प्यठ अमल करन तॆलि क्याज़ि रावि असि काहन गाव। कूशिश छि करान ज़ि ॳस्य गऺछ़्य नॖ पनॖनि वति होरॖ योर डलॖन्य तॖ मऺत्य आबस मंज़ रलॖन्य तवॖ मूजूब छु ज़रूरी ज़ि ॳस्य दिमव पनॖन्यन संस्कारन अकि फिरि फ्युर तॖ छ़ान्डनॖच कूशिश करव तिम चीज़ तिम संस्कार यिम असि निशि दूर ह्यवान छि गछ़ॖन्य। पनॖन्यन शुर्यन छु असि पिह पिह छ़ुनुन तॖ तिमन पनॖन्यन ज़िठ्यन हॖन्ज़ॖन रॖच़न काम्यन कुन कन दिवनावुन ताकि तिमन तरि फिकिरी ज़ि तिम कमि थदि ज़ऻच़ हॖन्द्य अनमोल रत्न छि। संस्कारन रऻछ करॖन्य तॖ रऻछ करनावॖन्य छि सऻन्य ज़िमॖवऻरी तॖ सोन फर्ज़ तॆलि ह्यकव ॳस्य नखॖ वऻलिथ पनॖन्यन ज़िठ्यन हुन्द कर्ज़ न तॖ रोज़ि यि मर्ज़ असि ॳट्य ॳट्य कडान।
**********************
"माता भवानि च पिता  भवानि, बन्धु भवानि सखा भवानि।
विद्या भवानि द्रविनम भवानि
यतो: यतो: यानि ततो भवानि"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
 नऺविव तॖ फॊलिव
  भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)