07.02.2019

07.02.2019, माघॖ ज़ूनॖ पछॖ (शुक्लॖ पक्ष) द्वय (द्विती), ब्रसवार (वीरवार/ब्रहस्पतवार),श्री सप्तर्षि सम्वत 5094, राश कुम्भ (चलान), ऋतु शिशर (चलान)...द्रठॖपऻन्च़ुक (पंचक) (चलान)...
द्वय हुन्द वोहरवोद यी अज़
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**********************
1. मु: यॆति आसि मैंगुन सु ति
         हॆयि च़ैंगुन
   अ: माहोलुक असर/अख
        ॳकिस सॗत्य मान मान
2. मु: यॆति पऺहलिस ख्यॊल
         तति शालस ग्वफ़
    अ: मौत छु शाह रगि
         नऺज़दीख/मौत क़रीब
         आसुन
3. मु: यॆति नॖ कुनि बलवीर
         तति क्याह करि वुगरॖ
         टीर
   अ: ताक़तुक इज़हार/कम-
        ज़ोर हॆकि नॖ कऻम
        अंजाम दिथ
4. मु: युथ व्वस्ताद त्युथ च़ाठ
    अ: हिविस ह्यु आसुन
5. मु: युथ वुछख त्युथ वुछय
    अ: अमलि मुताबिक़ सज़ा
         तॖ जज़ा/वरताव हिशर
**********************
1. गॊश....Shirk/Slow
2. गॊश द्युन..To pretend
          not to hear what
          is said/Not to be
          attentive
3. ग्वशताबॖ...A kind of
          meat dish pre-
          pared in milk
4. गॊशॖ बॊब...Soft pear
5. गॊगॖज....Turnip
6. गूल्य.... Bullet/Gun
          shot/Pill marble
7. गूल्य दिन्य...To shoot
        (some one)down/
         To bombard
8. गूल्य लायिन्य...To fire/
                To fire a gun
9. गूल्य यिन्य...To be
                      shot at
10. गोल....Round/Goal
**********************
     गीता ज्ञान : अध्याय-10
बॖ सारिनॖय हृदयस मंज़ रोज़ान
सारिनॖय हुन्द आत्मा म्यॆ ज़ान
ज़ीवन हुन्द आदि अंत तॖ वर्तमान
वॊन भगवानन गीता ज्ञान
**********************
प्रथ ज़ऻच़ मंज़ छि कॆंह तिथ्य ति मेलान यिमन नॖ ख्वश यिवान छु ब्यॆयिसॖन्ज़ तरक़ी वुछिन। सानि ज़ऻच़ मंज़ ति छि यिथ्य कॆंह आदम यिमन अज़रवुन यिवान छु वुछिथ ब्यॆयिसॖन्ज़ बॆहबूदी। यिम छि नकारात्मक आसान। यिहॖन्ज़ सौंच छि गन्दॖ आसान। यिम न करन पानॖ कॆंह न दिन ब्यॆयिस करनॖ कॆंह। यिमन छु बासान हुम्य ख्यव बुय क्याज़ि रूदुस पथ। हुम्य हे ओन तॖ कति ओनुन तॖ क्याज़ि ओनुन। यिम छि आसान अख ॳकिस ज़ंगॖ कडॖनस प्यठ। यिथ्यन नफ़रन छु नॖ क़रार यिवान ब्यॆयिसॖन्ज़ खुशी वुछिथ। यिथ्य ही नफ़र छि आसान तामसी। जान छु अगर तिम पनुन यि रवैया बदलावन। तऺथ्य मंज़ छि तिहिन्ज़ बजऻयी। तिमन ति मेलि पनॖनि वख्तॖ स्वख तॖ शऻन्ती यॊदवय तिम ख्वश रोज़न बॆययिसॖन्ज़ खुशी वुछिथ। ज़ंगॖ कडनॖ बजायि अगर तिम अख ॳकिस अथॖरॊट करन तिमन ति करि भगवान अथॖ रॊट गरि गरि तॖ विज़ि विज़ि। तिमन पज़ि हमेशॖ सकारात्मक सौंच थावॖन। म्यॊन इशारॖ छु तिमन बायन ब्यॆन्यन कुन यिम ब्यॆयिसॖन्ज़ बॆहबूदी वुछिथ अंदॖर्य अंदॖर्य दज़ान रोज़ान छि।
**********************
"या देवी सर्वभूतेषु स्मृति रूपेण संस्थिता नमस्तस्यै नमस्तस्यै नमस्तस्यै नमोनम:"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
 नऺविव तॖ फॊलिव
  भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com  ति वुछिव)