28.02.2019

28.02.2019, फागुन (फाल्गुन) गटॖ पछॖ (कृष्ण पक्ष) दऺहम (दशमी) ब्रसवार (वीरवार/ब्रहस्पतवार),श्री सप्तार्षि सम्वत 5094, राश धनु (चलान), ऋतु शिशर (चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: वूंठ बुड्यव तॖ मॖथॖर
         करुन ह्यॆछुन नॖ
    अ: वऻन्सि बुडिथ ति युस
         नॖ रब्द तॖ ज़बॖत ह्यॆछि
2. मु: वोन्य गव सु युस
         पानस ति बोज़ि हिसाब
    अ: कारॖबारॖ वऻलिस पज़ि
         प्रथ कुनि हिसाब थवुन
3. मु: वोन्य गव सु युस मऺछ
         च़ॖहि
    अ: कऺन्जूस/वऻनिस छु
          फ़ऻयदॖ सौंचुन
4. मु: वोरॖ मऻलिस तोरि दब
         ज़ंगि
    अ: वोरॖ मऻलिस छि नॖ शुर्य
          रुत करान
5. मु: व्वथु निकॖ कऻम कर,
         न्युक छुस तॖ ह्यकॖ नॖ,
         व्वथु निकॖ बतॖ ख्यॆ,डुल
         म्योन कति छु
   अ: कामि च़ूर लागुन।मगर
         ख्यनस क्युथ तेज़
         आसुन
**********************
1. कोन...One eyed man
2. क्वंड...A big vessel
3. कॊंथुल...A long stick
4. कॊंतल...Decorated
                 horse
5. कॊतॖल्य...New buds/
          Sprouting shoot
6. कोंठ मऻज्य.... Queen
7. कोंद.... Furnace/A
          kiln/Forge/Stove
8. कोंदॖ बल....A place of
                     kiln
9. कोंद लागॖन्य...To light
              fire in furnace
10. कॊंजि करॖन्य.....To
                   waste time
**********************
      गीता ज्ञान  :अध्याय-11
        अर्ज़न दीव वनान
अर्ज़न वनान तुहॖन्दि अनुग्रह सॗत्य
गुप्त अध्यात्मॖ ज्ञानॖ उपदेशि सॗत्य
नष्ट सपद्यव म्यॆ सोरुय अज्ञान
वॊन भगवानन गीता ज्ञान
**********************
अज़ छि हुर्य दऺहम। यथ दॊहस छि वनान द्यारॖ दऺहम ति। असवॖनि तॖ मखोल बुथि किन्य ॴस ॳज़्यकिस दॊहस वनान बुनिल्य दऺहम ति। ॳज़्यकिस दॊहस ओस वख्तॖ अकि कऺशीरि मंज़ अलगॖय महत्व। यिम न्वशि माल्युन आसॖ आसान गऻमच़ॖ ज़ंगि मूजूब सतम या ॴठम दॊह तिम आसॖ अज़ वापस वऻरिव यिवान। सॗत्य ओसुख आसान शुर्यन हॖन्दि बापथ हारॖ बऺरिथ ग्वच़ॖर, शीरिन्य, कचॖ जलगोज़ॖ, ह्वख्य खज़ॗर, ट्वाफी, कान्दॖर्य वानॖचि च़्वचि तॖ डून्य तॖ अतॖगथ। कऺशीरि मंज़ वैसे ति यॆलि न्वश मालिनि प्यठॖ वऻरिव आसॖ गछ़ान, अक्सर आसॖ तिम दॊह लूस्यथॖय गछ़ान। ॳज़्यकि दॊह ति हिस्बि मामूल यॆलि न्वश शामन वऻरिव आसॖ वातान, तिहिन्द्य खांदार ॴस्य नॖ व्यच़ान कुनि। दपान ॴस्य न्वश आयि गरॖ यानि वऻरिव अज़ अनन बुन्युल यॆलि कमरस मंज़ अच़न श्वंगनॖ बापथ। तवय ओस नाव प्यॊमुत ॳज़्यकिस दॊहस बुनिल दऺहम। ॳस्य आयि ती बोज़ान यॊतान कऺशीरि प्यठॖ द्रायि। ब्यॆयि ति मा आसिहे कुनि वजह किन्य अज़ वनान बुनिल्य दऺहम सु ह्यकन कॆंह ज़ानकारॖय वऺनिथ। ब्याख चीज़ ओस ज़ि अज़ शामन ओस यिवान खुलॖ डुलॖ पऻठ्य हारन गिन्दनॖ पानॖवुन्य तॖ नव्यन न्वश्यन सॗत्य ति तिक्याज़ि तमि ति आस आसान मालिनि प्यठॖ हारॖ अनिमच़ॖ। अज़ ओस गिन्दिथ कऺरिथ पतॖ हना थख लगान हारन ति। गऺयि तिम द्वह। गऺयि स्व कऺशीर। गऺयि तिम हारॖ अज़ गऻमॖत्य रंगॖ रंगॖ मारॖ तॖ पारॖ पारॖ। बॖ कति यारॖ लबख तिम द्वह।
**********************
"ओम् नम: शम्भवाय च, मयोभवाय च, नम: शंकराय च, मयस्कराय च, नम: शिवाय च, शिवतराय च।।"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
 नऺविव तॖ फॊलिव
   भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)