27.02.2019

27.02.2019, फागुन (फाल्गुन), गटॖ पछॖ (कृष्ण पक्ष) नवम (नवमी), ब्वदवार (बुधवार),श्री सप्तार्षि सम्वत 5094, राश धनु (रऻच़हॖन्ज़ॖ 12.44 बजि प्यठॖ), ऋतु शिशर (चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: व्वथ न्वश कुठ खस
         आयस क्याह करॖनि
  अ: पनुन फ़र्ज़ अंजाम अनुन
2. मु: व्वज़लि कनि च़ॊप
         कडुन
    अ: ख्वद ग़र्ज़ी हॖन्ज़
         अलामथ
3. मु: व्वपर मुल्क गव
         क्वकर च़ूर
    अ: व्वपरस छि हांछ़
         खसान
4. मु: व्वडि च़न्जि कूर
    अ: यस ॴड-ज़ऻड विज़ि
         विज़ि प्यॆयि/बेज़ती
         लद
5. मु: व्वडि तॖ वछ वायुन
    अ: द्वखस मंज़ वछ च़टॖन्य
         तॖ मस कडुन
**********************
1. कॆल्य फम्ब...A kind of
                       fine wool
2. क्यॊम...... Insect
3. क्याज़ि.....Why
4. कऻहज़बान...A herb/
             Primal/Ox lip
         
5. कऺहवट..Touch stone
6. कॊहसतानी....Hilly/
              Mountainious
7. कॊंड...Thorn/Misery
              A fishing hook
              A nail
8. क्वंग... Saffron
9. क्वंगॖ पोश... Saffron
                       flower
10. क्वंगॖ तिहिज..Saffron
               piece/Saffron
               mane
**********************
        गीता ज्ञान :अध्याय-10
हे अर्ज़न यऺच़ ज़ानुन क्याह प्रयोजन
यि ज़गत म्यॆ सॗत्य छु परिपूर्ण
यि म्यानि यूग शक्ती हॖन्ज़ रछ़ा ज़ान
वॊन भगवानन गीता ज्ञान
**********************
हुर्य ॴठम ति म्वकलॆयि। कऺशीरि मंज़ ओस हुर्य ॴठम द्वह शामॖ प्यठय हारी पर्वतॖ यानि  च़ऺक्रीश्वरॖ बीरॖ ह्यवान समॖन्य ति क्याज़ि रऻत्य रातस ओस बजन-कीर्तन चलान रोज़ान। पहाडस प्यठ माईक ॴस ग्रज़ान तॖ सु ग्रज़ुन ओस पहाडकिस दामनस ताम वातान तॖ तमि ग्रज़नॖ सॗत्य ॴस यिनॖ वाल्यन भक्तन ह्यमथ मेलान। क़दम ॴस्य तेज़ व्वथान, द्वन डायन हतन हेरॖ पाव्यन ॴस्य दवान तॖ दौरान खसान। मान मान ॴस खसनस लगान। रऻत्य रातस ओस तबल, चुमटॖ, छनकॖ, नॊट, तुम्बकनऻर, तॖ अथॖबाजि वज़ान रोज़ान तॖ मातायि शारिकायि पनुन पान मऺशरऻविथ तॖ तमिस माजि पनुन पान पुशरऻविथ लीलायि ग्यवान रोज़ान रऻत्य रातस। म्वगॖल्य चाय ॴस चलान रोज़ान। अख अदभुत नज़ारा ओस नज़र यिवान। व्वंय छि यॆति ति कॆंच़न आश्रमन मंज़ ब्यॊन ब्यॊन जायन प्यठ भजन कीर्तन यिवान करनॖ। मगर कऺशीरि हॖन्दिस कीर्तनस ओस पनुन अख अलग अंदाज़। हॆरच़ हॖन्द्य द्वह ह्यॆतिन नऺज़दीक वातॖन्य वुनि छे नॖ ख़बर असि बटन ज़ि हेरथ छा त्रॆयमि मार्च किनॖ च़ूरिमि मार्च मनावॖन। कऻशिर्य बटॖ आयि ह्यनॖ त्र्यन पंचान्गन मंज़ॖ। अख गव ओंकार नाथ जीयुन विजयेश्वर, दॊयिम गव स्वर्गियि मनमॊहन जीयुन पंचान्ग युस तऺम्यसुन्द सुपुत्र पुनीत जी छु चलावान। यिति छु विजयेश्वर पंचान्ग ह्यथ पकान तॖ त्रॆयिम छु सतीसर फौंडेशन वाल्यन हुन्द पंचान्ग। येमि लटि छि यिमन ब्यॊन ब्यॊन वनन गऻमॖच़ तॖ तमि मूजूब कऻशिर्य बटन बिचार्यन बखऻलन वथ रऻवमॖच़ ज़ि गछ़व हय तॖ गछ़व कमि वति। म्यॆ वॊनमख हा मति च़ॖ पख पनॖनि वति यानि य्यॊस जंत्री च़्यॆ गरस मंज़ छय च़ॖ पख तमीय वति। अज़ छि व्वंय हुर्य नवम तॖ पगाह गऺयि हुर्य दऺहम।
**********************
"सर्वस्वरूपे-सर्वेशे सर्वशक्ति-समन्विते भयेभ्य: त्राहि नो देवी। दुर्गे देवि नमस्तुते।"
 पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
  नऺविव तॖ फॊलिव
   भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)