16.02.2019

16.02.2019, माघॖ ज़ूनॖ पछॖ (शुक्ल पक्ष) काह (एकादशी), बटॖवार (शनिवार/शनिश्चरवार) श्री सप्तर्षि सम्वत 5094 राश मिथुन (चलान) ऋतु शिशर (चलान)...अज़ छि भीमसेन काह ति
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ॖ अख श्वलूक कऻशिर्य ज़बऻन्य मंज़ तॖ पनॖन कथबात
**********************
1. मु: हन हन गलान पनॖन्य
         हऻन नॖ च़लान
    अ: बऺदी लगातार करॖन्य/
         वऻन्सि नॖ बुरऻई त्रावॖन्य
2. मु: हंगॖनय तॖ रंगॖनय ज़ंगॖ
         ज़ेछि हॖनिनय
    अ: ज़िठ्यन नॖ यज़थ तॖ
         मान करनवोल/वॊहव
3. मु: हूनि मऺशीदि हुन्द जिन
    अ: कुनि मकानस मंज़
         यॆलि कुन्यसॖय ज़ऺनिस
         प्यॆयि रोज़ुन
4. मु: होवमुत गव रोवमुत
    अ: हावुन छु रावरावुन/
         कऻन्सि कॆंह हावुन गव
         रावरावनस बराबर
5. मु: हून्य माज़स वातल
         वाज़ॖ
    अ: कऺमीनस सॗत्य कऺमीन-
          गी करॖन्य
**********************
1. खर.....Donkey/Ass
2. खॖर.....Slip
3. खार.... Blacksmith/
                To raise up/   
          Weight (Approx.
           a quintle)
4. खिर.....A sweet dish
       (Made of rice and
         milk)
5. खुर....Twist/Distor-
               tion
6. खूर.....Razor/Safety
               razor
7. खूर करुन....To have a
                  clean shave
8. ख्वर....Foot
9. ख्वरॖबानॖ...Shoe
10. ख्वरॖ गन्ड..Tied feet/
              Settlement of
              marriage
**********************
     गीता ज्ञान  :अध्याय-10
पवॆत्र करन वाल्यन मंज़ म्यॆ
हवा ज़ान
शस्त्र दारियन मंज़ श्री राम भगवान
नऺदियन मंज़ बागीरऺथी गंगा म्यॆ ज़ान
वॊन भगवानन गीता ज्ञान
**********************
लऺगनॖ चिरि ह्यथ छु यिवान ब्रह्मुन तॖ ब्यॆ यि शेछ वनॖनि ज़ि लऺगनुक समय छु फलऻन्य द्वह फलऻन्य वख्तॖ तॖ बरऻच़ हॖन्ज् संख्या यानि कऻत्या नफ़र आसन बरऻच़ सॗत्य वगैरा वगैरा मगर बासनस तल छु अज़कल यिवान ज़ि यिमन चीज़न प्यठ छि अमल कमॖय पाहन यिवान करनॖ। ग्वडॖ छि नॖ असि कऻशिर ब्रह्मन नज़रीय यिवान। बरऻच़ मंज़ ति छु वुछंनॖ यिवान ज़ि अज़कल छि गंज़रिथॖय नफ़र यिवान यानि पॊतकालॖ पऻठ्य स्व बऺड बरात यथ मंज़ ज़ं, त्रॆ या च़ोर हथ बरऻत्य ॴस्य आसान, तमि हिसाबॖ छि अज़कलॖच बरात मसा हथ शथ या डॊड हथ ज़यादॖ ख्वतॖ ज़्यादॖ आसान। ब्रह्मा जी  यिम मंत्र परान छु लऺगनॖ मंडपस प्यठ तॖ यिम शरायत थवनॖ छि यिवान माहराज़स तॖ माहर्यॆनि बापथ ब्रौंहकुन पूरॖ करनॖ बापथ तिम शर्त ति छि नॖ पूरॖ करान अज़कलुक रून तॖ ज़नान। अख शर्त छु ज़ि ब्रह्मा जी छु नव या काह डून्य दिवान माहर्यॆनि तॖ तमिस छि तिम डून्य आसान त्रावॖन्य पनॖनिस हॆहरॖसॖन्दिस हलमस मंज़ यि वऻदॖ कऺरिथ ज़ि यीत्य यिम डून्य छि तीत्य शुर्य करख बॖ पऻदॖ यॆमि सॗत्य खानदान ओरुत तॗ बॊरुत रोज़ि शुर्य़व-कट्यव सॗत्य तॖ खांदानॖच परंपरा रोज़ि वऺरी बद्यन चलवॖन्य। मगर तिम डून्य कुस कऺमिस दिवान छु, दिवान ति छा, तिम डून्य हॆहरसॖन्दिस हलमस मंज़ त्रावनॖ छा यिवान ति, म्यॆ ज़न छु अथ मुतलक शकॖय बासान। तॖ अगर यि शर्त या यि रसॖम चलान छु वुनि ति तॆलि क्याज़ि छि शुर्य ज़्यॆवरावनस अकिस या दॊन्य प्यठ रोक लगान। तॆलि गऺछ़ शुर्यन हॖन्ज़ संख्या ज़्यादॖ आसॖन्य प्रथ गरस मंज़।अगर तीतीय शुर्य यानि अख या ज़ॖय छि थावॖन्य, तॆलि गछ़न अख या ज़ॖय डून्य ति यिनॖ माहर्यॆनॖ दिनॖ। यिथय पऻठ्य छि ल्वकॖट्य म्वकॖट्य शर्त वारियाह मगर अमलि मंज़ छिनॖ यिवान। मतलब ज़ि अथ लऺगनस क्याह महत्व रूद व्वंय। कथ छि जऻरी
**********************
"त्वमेव माता च पिता त्वमेव
त्वमेव बन्धु: सखा त्वमेव।
त्वमेव विद्या द्रविनम त्वमेव।
त्वमेव सर्वम् मम देव देव।"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
  नऺविव तॖ फॊलिव
   भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)