22.02.2019

22.02.2019, फागुन (फाल्गुन) गटॖ पछॖ (कृष्ण पक्ष) त्रय (तृतीय),शॊकुरवार (शुक्रवार जुम्मा), श्री सप्तार्षि सम्वत 5094, राश कन्या (चलान), ऋतु शिशर (चलान)....अज़ छि संकट च़ोरम ति
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: हतॖ होनि ख्यतॖ ज़ंग
    अ: हंगतॖ मंगॖच्यन काम्यन
         मंज़ ज़ंग त्रावॖन्य/योरय
         मुसीबतन पान पुशरुन
2. मु: हतस कथन कुनी कथ
    अ: म्वख्तॖसर कथन मंज़
         बावथ करॖन्य
3. मु: हति पावि वऺसिथ गछ़ुन
    ॶ: परेशऻनियन मंज़
          मुब्तुला गछ़ुन/कांह
          बद ख़बर बूज़िथ कम
          ह्यमत गछ़ुन
4. मु: हऺत्य हून्य ख्यॊमुत
    अ: वारिहान खुर्यन मंज़
         ह्यनॖ आमुत/फिकिरन
         तॖ अंदेशन मंज़ गीर
         गोमुत
5. मु: हथ गऺर्य नऻनी कथ गरॖ
         छख
    अ: स्व ज़नान य्यॊस गरॖ
         गरॖ फेरान आसि/य्यॊस
         नॖ ॳकिस जायि क़रार
         करि
**********************
1. खलबऺल्य.......Distur-
         bance/Alarm/
         Commotion
2. खुलरावुन....To widen/
                     To expand
3. खलुर....Stone morter
4. खलुन..To drive away
5. खल वसॖन्य...To be
                        skinned
6. खल...Open place for
              keeping crops
              Barn/Skin/Kip
              Membrane/
              Fell/Hide
7. खल तॖ ख्वदा..All alone
8. खल बरुन...To fill the
         place with crops/
         To fill the granary
9. खशिर्य नाग.... Sulfur
                          spring
10. खशुर....Scab/Skin
                   disease
**********************
       गीता ज्ञान :अध्याय-10
यारन मंज़ च्योन मित्र बॖ पानॖ वासुदीव
पांडवन मंज़ च़ॖय अर्ज़न दीव
मुनियन मंज़ वेद व्यास कऺवियन मंज़ शुक्राचार्य ज़ान
वॊन भगवानन गीता ज्ञान
**********************
राथ यानि अकवुहमि फर्वरी ज़ॖ सास कुनवुह (21.02.2019) तॖ ब्रसवारि द्वह ओस अंतर राष्ट्रीय माजि-ज़्यव द्वह युस असि मनोव नोयडाहस मंज़ कश्यप ऋषि भवनॖकिस हालस मंज़।अमि प्रोग्रामॖच व्यवस्था ॴस कऺरमच़ AIKS तॖ KMWA NOIDA.
अथ प्रोग्रामस मंज़ आव पनॖनि माजि ज़्यव प्यठ व्च़ार करनॖ ज़ि यि ज़बान किथॖ पऻठ्य ह्यकव ॳस्य रऺछ़रऻविथ तॖ ब्रौंहकुन पकनऻविथ। अथ प्रोग्रामस मंज़ आव श्री रहबर सऻबस मान तॖ यज़थ दिनॖ, मुशऻयरॖ सपद्यव, तॖ गोतम जीयनि मॊदुर हटि त शुर्यन हॖन्द्य दऺस्य आयि बऻथ ग्यवनॖ यॆमि सॗत्य माहोल रंगा-रंग बन्यव। ख्यनॖच च्यनॖच व्यवस्था ति ॴस नफीस पऻठ्य आमॖच़ करनॖ KMWA दऺस्य।
असली मुद्दा ओस ज़ि माजि ज़्यव किथ पऻठ्य ह्यकव ॳस्य रऺछ़रऻविथ ति क्याज़ि वुछनस तल छु बासान ज़ि ॳस्य कऻशिर्य बटॖ छि पनॖनि ज़बऻन्य मंज़ कथबात कम करान तॖ पर-ज़बऻन्य हुन्द इस्तिमाल ज़्यादॖ करान ख़ास तौर से यॆनॖ ॳस्य ह्यनॖ आयि कऺशीरि न्यबर नीरिथ। माजि ज़्यॆवि प्यठ करव कथ पगाह ति
**********************
"करचर्ण कृतं वाक्कायजं कर्मजंवा, श्रवण नयनजं वा मानसं वा अपराधम्।विहितम् अविहितम् वा सर्वमेतत क्षमस्व, जय जय करुणाब्धे श्री महादेव शम्भो।"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबात करव
**********************
  नऺविव तॖ फॊलिव
   भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)