24.02.2019

24.02.2019, फागुन (फाल्गुन) गटॖ पछॖ (कृष्ण पक्ष) शॆयम (षष्ठी) आथवार (एतवार/रविवार), श्री सप्तार्षि सम्वत 5094, राश तुला (चलान), ऋतु शिशर (चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: हारि टंग तॖ ज़ॖलनय
         मॊहरि च़ूंठ तॖ च़ॖलिथ
    अ: टंग छु द्यलॖ सान श्रपान
     च़ूंठ्य द्यल छु नॖ हऻज़्यमस
      क्युत ठीक
2. मु: हारॖच ग्वगॖज तॖ लारॖच
         गुनस गऺयि बराबर
    अ: हारॖच ग्वगॖज गऺयि
         ज़हरस बराबर
3. मु: हापत यारज़
    अ: मुडॖ संज़ यारज़/
         जऻहिल सॖन्ज़ दोस्ती
4. मु: हऻन्ज़स यॆलि दऺर्यावस
         अंदर वाव छु यिवान
         पथ नम छु ब्रौंह नम
         करान तॖ ब्रौंह नम छु
         पथ नम करान
   अ: द्वलाबन मंज़ छु आदम
        पानस गतॖ-ग्यूर तुलान/
        परेशऻनी मंज़ ओरॖ योर
        करान
5. मु: हऻन्ज़स गॊब्यॆयि ल्वलि
         दिच़ॖन दऻरिथ क्वलि
    अ: पनॖन्य कूर स्यठाह
          वऺसिथ गरस मंज़ दिन्य
**********************
1. क्युथ....Of what kind
                What sort of
2. क्युत....For the sake
        of/On account of/ 
         For the purpose
         of/In order to
3. क्युथ ताम ह्यु...To feel
         ashamed of/Sad
4. क्युल.....Nail/A pin/A
                  peg/Wedge
5. कत्यन... Where
6. कत्यथ... Where
7. केरन..... Condition/
           Circumstances/
           Ideas/Thoughts
8. क्युल लगुन...To have
                   acute pain
9. कॆंज़ि खोस...A cup
                     with stand
10. केंछ़ा-मेछ़ा...Some-
               thing good
**********************
     गीता ज्ञान :अध्याय-10
हे अर्ज़न सारिनॖय ज़ीवन हॖन्ज़ उत्पती, अम्युक मूल कारन ति छुस बॖय।
म्यॆ सिवा च़र अच़र नॖ आसान
वॊन भगवानन गीता ज्ञान
**********************
माजि ज़्यॆवि प्यठ छि कथ चलान। राथ वॊन म्यानि अकि कोरि के ई सी एस एस-सस मंज़ ज़ि बॖ छस कऻशिर्य गरस मंज़ ज़ामॖच़ मगर छस ज़ामॖच़ कऺशीरि न्यबर तॖ तवय छुम नॖ तगान कऻशुर या कऻशिर्य पऻठ्य कथ करॖन्य। ॳमिस कोरि हुन्द वनुन छु सरासर ग़लत। यि छु नॖ ज़रूरी ज़ि कऻशिर्य ज़बऻन्य बापथ गछ़ि आसुन कऺशीरी ज़न्म ह्यॊतॖमुत। वुछुन छु ज़न्म कथ गरस मंज़ तॖ कथ माहोलस मंज़ छु आमुत ह्यनॖ। जाय छॆ नॖ ज़रूरी। ज़रूरी छि वुछिन्य माजि हॖन्ज़ ज़्यव। सऻन्य माजि ज़्यव छॆ नॖ ॳज़िच। यि छि स्यठा प्रऻन्य तॖ बागॖ बऺरॖच़।नामवर तॖ ॳदीब शऻयिर तॖ लिखऻर्य गयि विज़ि विज़ि पऻदॖ यिमव यि ज़बान पनॖन्यव तखलीफातव सॗत्य माला माल कऺर। ज़मानॖ गव ब्रौंह पकान। ज़बान ति छि पकान।
ॳज़्यकिस दोरस मंज़ छि सारेयि ज़बानॖ बोहरानस मंज़ ह्यनॖ आमच़ॖ तॖ सऻन्य कऻशिर ज़बान किथ रोज़ि बे-असर। मगर चूंकि सऻन्य ज़बान छि रॖच़ ज़बान, परि पूर्णॖ ज़बान, प्रऻन्य ज़बान तॖ मॊदुर ज़बान। यि ज़बान मरि नॖ सहल सहल। अल्बतॖ अथ ज़बऻन्य छि असि पानय रऻछ करॖन्य। चूंकि स्कूलन मंज़ छॆ नॖ आमॖच़ अथ ज़बऻन्य जाय दिनॖ तमि मूजूब छु स्यठाह ज़रूरी ज़ि ॳस्य ह्यॆछनावोन पनुन शुर पनॖनिसॖय गरस मंज़ पनॖन्य यि माजि ज़्यव। मऻलि माजि प्यठ छि यि ख़ास ज़िम्मॖवऻरी। कथ छि जऻरी।
**********************
"माया कुण्डलिनी क्रिया मधुमती काली कलामालिनी मातन्गी विजया जया भगवती देवी शिवा शम्भवी।शक्ति शंकर वल्लभा त्रिनयना वाक-वादिनी भैरवी।। ह्रींकऻरी त्रिपुरा पराअपरमयी माता कुमारी-इति-असि।।"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
 नऺविव तॖ फॊलिव
 भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)