14.02.2019

14.02.2019, माघॖ ज़ूनॖ पछॖ (शुक्ल पक्ष) नवम (नवमी), ब्रसवार (वीरवार/ ब्रहस्पतवार), श्री सप्तर्षि सम्वत 5094, राश वृष (चलान), ऋतु शिशर (चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**********************
1. मु: हून्य ख्यॆयि बस्तॖ खलर
    अ: बे-सूद कऻम
2. मु: हूनिस म्वख्तॖ हार
    अ: बे-क़दरस क़दॖर
3. मु: हॊल गऺन्डिथ बतख़
         नच़ॖन्य
    अ: लडऻय करॖन्य
4. मु: हॊल गऺन्डिथ हर करॖन्य
    अ: हर करनॖ बापथ प्रथ
         विज़ि तयार
5.मु: हॊल क्याह करि स्यॆदिस
    अ: स्यॆदिस सादस छु नॖ
         कऻन्सि हुन्द हजर कॆंह
         करान
**********************
1. ख्वर....Feet
2. खोवुर...Left side
3. होवुर...In-laws
4. ख्वठ... Defective/
       Useless/Adverse
5. ख्वठ नियथ...Evil wish
        Evil intention/Bad
        intention
6. खॊपॖर....Hut/Cottage
7. ख्वड......Ditch
8. ख्वन...Lap/Adoption
9. ख्वनि रटुन...To hold in
                       lap
10. ख्वनि ख्वनि रछुन..To
            rear/Cherish/
           To bring up/
           With affection
**********************
     गीता ज्ञान  :अध्याय-10
नागन मंज़ शीशनाग ज़ल राज़ॖ वरुन दीवता
पॆत्रन मंज़ प्यॆत्र नावॖ अरीयमा
हुकुम दिनॖ वाल्यन मंज़ यमराज़ॖ ज़ान
वॊन भगवानन गीता ज्ञान
**********************
यिमन शंख वायुन पज़ि तिम छि आसान नच़नस सॗत्य मस्तॖ। शंख छि करान हवालॖ बड्यन बुज़र्गन यिम नॖ ह्यकान छि शेंकॖ शब्द दिथ। खालॖय कऻन्सि छु अज़कल संख पानस सॗत्य आसान म्यॆ बासान। बैंड-बाजॖ छु चलान बे रोक-टोक। कोरि वऻल्य बिचऻर्य छ़ॊपॖ दम कऺरिथ वुछान प्रारान अथन मंज़ पोशॖमालॖ या रॊपियि हार ह्यॆय ह्यॆय ज़ि कर गछ़ि बैंडस थख तॖ माहराज़ॖ अच़ि अंदर। जंगॖ छि थकान व्वदनी रूज़्य रूज़्य। अज़कल छॆ नॖ तीच़ त्वछ़ ति ज़ि वारिहास कालस प्रारन खड़ा रूज़िथ। यि प्रथा ति प्रऻव असि टनलि यपारीय। कऺशिरि मंज़ ओस नॖ बैंड बाजुक रिवाज कॆंह। कोचस अच़वुनुय ओस यिवान शेंकॖ शब्द दिनॖ तॖ छग ॴस लगान कोरि वाल्यन ज़ि माहराज़ॖ हऻय आव। अंदर ॳछ़िथॖय आसॖ ज़नानॖ वनवन हुर त्रावान मगर व्वंय छु खालॖय कांह वनवान। वनवनस कोताह महत्व ओस आसान यि ह्यॆकि सुय वऺनिथ युस अमि तारॖ तॊरमुत आसि। वनवनस मंज़ छि सिरिफ ॴही आसान यॊस माहराज़स तॖ माहरॆनि यिवान छि करनॖ वीद मंत्र पऺर्य पऺर्य। ह्यॆंज़े वनवुन छु सान्यन सारिनॖय संस्कारन सॗत्य सॗत्य पॊतकालॖ प्यठॖ आमुत चलान मगर यि प्रथा ह्यॆच़ॖन्य ज़न छ़्वकॖन्य। ह्यॆंज़े वनवुन ओस सान्यन माज्यन ज़्येवि पॆतिस प्यठ याद आसान मगर तिम बुडॆयि अजि तॖ वाच़ॖ स्वर्गस अजि। व्वंय छु ह्यॆंज़ॆ वनवुन किताबन मंज़ लीखित मगर कऻशुर परनवऻल्य छि कति तॖ कऻत्याह। इस्लिये रोज़ॖ तिम किताबॖ ति ताकस। वनॖ च्यन यार्यन ख्वदाय सुन्द सग। अज़कल छु माहराज़स तॖ माहर्यॆनि दय सॖन्ज़ ॴही पकान रोज़ान शंखॖ नादॖ रॊस तॖ ह्यॆंज़ॆ वनवनॖ रॊस्तुय। यथ खांदरस मंज़ वुनि अमिच प्रथा नज़र यी या यिवान छि तथ गरस छु म्योन नमन।
**********************
नन्दणतु साधका  सर्वे विनष्यन्तु विदूषिका
अवस्थाम् शामभ्वीमsस्तु
प्रसन्नस्तु गुरु सदा
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
 नऺविव तॖ फॊलिव
   भूषण कौल "दीप"
(बूज़िव अज़्युक सबक़ म्यानि ज़्यॆवि ति)
( koshursabak.blogspot.com ति वुछिव)