0202.2019

02.02.2019, माघॖ गटॖ पछॖ (कृष्ण पक्ष), त्रुवाह (त्रयोदशी) बटॖवार (शनिवार/ शनिश्चरवार),श्री सप्तर्षि सम्वत 5094, राश धनु (चलान), ऋतु शिशर (चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**********************
1. मु: च़ॊट गऺयि कॊलि तॖ
         राहि ख्वदा
    अ: रोवमुत चीज़ खऻरात
         करुन
2. मु: च़ूंठ छु च़ूंठिस वुछिथ
         रंग रटान
    अ: इन्सानस छु ब्यॆयि सुन्द
       असर प्यवान/सोहबतस
        छु असर
3. मु: च़ूरव नी ज़नान तॖ ठगव
         ख्यव म्वख्तॖहार
    अ: च़ूरस ति छु ठग पतय
4. मु: च़ूरस फुट ख्वर तॖ
         पीरस मोरुख मुरीद
    अ: बेग्वनाहन सज़ा प्यॊन/
          बे-बूज हालाथ
5. मु: च़ूरस तॖ रऻछस बऻज्य
         वऺट
   अ: यॆति प्रथ कांह बे-ईमान
        आसि
**********************
1. गॊबुर.....Son
2. गॊबॖर.....Daughter
3. गॊब.....  Heavy/Big/
                 Fat/Weighty
4. गॊब बोज़ुन...To be
            hard of hearing
5. गॊब गछ़ुन....To be
            heavy/To find it
       difficult/Tiresome
6. गॊबि बारि....Plump/
          Heavy/Pregnant
7. गवऻही.... Evidence/
                   Testimony
8. गवाह...... Witness
9. गंवार.....Rustic/Clown
         Uncultured/Rude
         Unmannerly
10. गुनफचि....Violet
**********************
      गीता ज्ञान : अध्याय-10
ही कीशव कमि प्रकऻर्य दारॖ ध्यान
बॖ किथ ज़ऻनिथ ह्यकॖ भगवान
कमि बावॖ रोज़ॖ चऻन्य सुमरन करान
वॊन भगवानन गीता ज्ञान
**********************
पृथ्वी नाथ कौल "सायल" छु रुदमुत अख नामावार कऻशिर ज़बऻन्य हुन्द शऻयिर। ॳम्यसॖन्द्य कऻशिर ज़बऻन्य मंज़ लीख्यमॖत्य बऻथ छि यिवान ग्यवनॖ जायि जायि। अख ख़ास बऻथ छु आमुत लेखनॖ सऻयल सऻबनि क़लमॖ "ॴही"।यि ॴही वुछ म्यॆ छि ग्यवान खांदरन व्वछ़बन मंज़ सऻरी गिन्दनगऺर्य। अथ मुतलक छु म्यॆ वनुन ज़ि अमि बऻतॖच ग्वडनिच लऻनि हॖन्द्य श़ब्द छि "प्रखटनय तॖ पऺज़ नीर्यनय, म्यऻन ॴही च़्यॆ पूशनय", ग़लती सान छि यिम शब्द यिवान परनॖ ग्यवनवाल्यन हॖन्दि दऺस्य यिथ पऻठ्य "प्रॊखटुय पॊज़ नीर्यनय म्यऻन ॴही ...."। च़ूंकि ग्वडनिक ग्यवनवऻल्य छु ग़लती सान यि बऻथ ग्यॊवमुत तॖ ॳज़ ताम आयि नॖ अथ बऻतस तर्मीम करनॖ यानि सही शब्द परनॖ। सऻयल सऻबस ॴसॖन स्वर्गॖय तऺमिस ति छि ख़बर ज़ि यि फलऻन्य ईन्सानन ग़लत ग्यॊवमुत मगर सऻयल सऻब ओस हमेशि दपान ज़ि सान्यन बायन ब्यॆन्यन छु नॖ स्यॊद कऻशुर परुन या लेखुन तगान तॖ शॊद अशॊद शब्द समजिनॖच छि नॖ ज़हमत ह्यवान तॖ तवय छि गछ़ान यिरवॖन्य नाव सानि ज़बऻन्य। बॖ छुस कूशिश करान ज़ि यथ जायि ति बॖ यि बऻथ बोज़ान छुस बॖ छुस तऺमिस ग्यवनवऻलिस समजावान ज़ि च़ॖ छुख ग़लत परान तॖ सऺही शब्द छु यिथ पऻठ्य। तिम ति छि बोज़नहऻना करान तॖ पकान ब्रौंहकुन तिथय पऻठ्य ग़लत परान मगर वनॖनस छुख नॖ कांह। ॳथ्य छि वनान ऒन दांद छु सासस दांदन वथ रावरावान। च़ूंकि यि छु हॆन्दी शब्द तॖ मुसलमान ग्यनवऻल्य छि नॖ ॳम्युक असली उच्चारन ज़ानान तॖ यॆलि नॖ कुनि महफिलि मंज़ कऻन्सि वॊन ति तऺमिस छु बासान ज़ि सु छु ठीखॖय ग्यवान। बॖ गछ़ॖ वनान रोज़ान तोह्य ति अगर रूज़िव वनान ग्यवनवऻलिस सम्भव छु ज़ि तिम शेरन पनॖनि किताबि मंज़ यि ग़लती।
**********************
"या देवी सर्वभूतेषु श्रद्दा रूपेन संस्थिता नमस्तस्यै नमस्तस्यै नमस्तस्यै नमोनम:"
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
नऺविव तॖ फॊलिव
   भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)