06.02.2019

06.02.2019, माघॖ ज़ूनॖ पछॖ (शुक्लॖ पक्ष) द्वय (द्विती) ब्वदवार (बुधवार),श्री सप्तर्षि सम्वत 5094, राश कुम्भ (चलान), ऋतु शिशर (चलान)...द्रठॖपऻन्च़ुक (पंचक) (चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**********************
1. मु: यथ छ़ॖन चोंचा हुथ छ़ॖन
         बलाय
   अ: ख्वदगर्ज़ी/सिरिफ
        पनुनॖय फऻयदॖ छ़ारुन
2. मु: यथ तीलॖवऻन्य ज़चि
         यि तीलॖफ्यॊर ति
    अ: बऺडिस दाग़स तल छु नॖ
         ल्वकुट दाग़ नॊन नेरान
3. मु: यथ कॊर तोबॖ सुय
         आव रोबॖ
    अ: यि नॖ ज़रूरथ आसि
         ती बुथि प्यॊन
4. मु: यॆति ताफ़ तति शुहुल
    अ: ज़िन्दगी अकि डंजि नॖ
         रोज़ॖन्य/द्वख-स्वख
         सॗत्य सॗत्य
5. मु: यॆति च़ऻन्ग्य तति गाश
    अ: गाटॖजारस छु प्रथ कुनि
         जायि म्वल
**********************
1.गूर.....Milkman
2. गूर्यबाय...Milkwoman
3. ग्वर.....Hindu priest/
        Religious teacher
4. गोर.....Raw sugar/
        Raw dehydrated
        sugar/Monument
        over grave/Tomb
        Hindu priest
5. गोरबल...Graveyard/
          Burial ground/
          Cemetery
6. ग्वरदोल....Sour fruit
7. ग्वरवार..... Thursday
8. ग्वरदॖ........ Kidney
9. ग्वच़ॖर....A small bag/
                A cloth purse
10. ग्वसोन्य....A Hindu
                      saint
**********************
     गीता ज्ञान  :अध्याय-10
       श्री भगवान वनान
श्री भगवान अर्ज़न दीवस वनान
बजि बजि विबूतियि वनय थाव ध्यान
अंतॖ रॊस्तिस छु नॖ व्यस्तार सपदान
वॊन भगवानन गीता ज्ञान
**********************
बॖ छुस आमुत ज्यॊम ति क्याज़ि यॆति ओस हारमोनी इन्डिया तॖ हारमोनी कल्चरल फौन्डेशन, दिल्लि वाल्यव स्वर्गियीय श्री पृथ्वी नाथ कौल 'सायल' सऻबॖन्य अख किताब तॖ अख म्यूज़िक एल्बम शाया करुन च़ूरमि फरवऺरी 2019 द्वह अभिनव थ्यॆटरॖ। प्रोग्रामस वोत अंद शानदार पऻठ्य। अमि संस्थायि बऻगरऻव्य ट्राफी/शाल/गुलदस्तॖ कॆंच़न नामावार शख्सियतन ति अमि द्वह। अभिनव थ्येटर हाल ओस बऺरिथ, रंगारंग प्रोग्राम यानि सऻयल सऻबॖन्य लीख्यमॖत्य बऻथ आयि ग्यवनॖ मशहूर गिलोकारव दऺस्य। सऻयल सऻबस आयि अकि फिरि ब्यॆयि श्रद्दांजलि दिनॖ तॖ तऺम्यसॖन्ज़ि करिमच़ॖ काम्यन आव ब्यॆयि अकि फिरि फ्युर दिनॖ। हारमोनी कल्चरल फौन्डेशन तॖ हारमोनी इन्डिया छि स्यठाह जान करान यॆमि सॗत्य सऻनिस समाजस छु थज़र तॖ बजर मेलान। रमेश जी ज़ाडू तॖ ॳम्यसॖन्द्य सुपुत्र सौरभ ज़ाडू छि थॊद वऺथ्य वऺथ्य समाजिच सीवा करान रोज़ान पनॖनि संस्थायि दऺस्य। ईश्वर हऻव्यनख रॖच़ वथ हर हमॆशि।
**********************
"या देवी सर्वभूतेषु लक्ष्मी रूपेण संस्थिता नमस्तस्यै नमस्तस्यै नमस्तस्यै नमोनम:"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
 नऺविव तॖ फॊलिव
   भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)