04.02.2019

04.02.2019, माघॖ गटॖ पछॖ (कृष्ण पक्ष), मावस (अमावस्या), च़ऺन्दॖरवार (सोमवार), श्री सप्तर्षि सम्वत 5094, राश मकर (चलान), ऋतु शिशर (चलान)...अज़ छि सुमरी मावस (सोमामावसी)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**********************
1. मु: च़ॊट छय दॊयव अथव
         बनान
    अ: इतिफाकस छु ताक़त/
         अख तॖ अख गव काह
2. मु: च़ॊर अयाल गव बॊड
         जंजाल
   अ: बऺडिस अयालस छि
        बऺडी ख़र्चॖ आसान
3. मु: च़ॊर गव ज़ि खॊर गव
    अ: ज़्यादॖ आसनस छॆ नॖ
         शूब कॆंह
4. मु: छ़ॊटिस फ़ेल वॊटिस
         सॊम्ब
   अ: छ़ॊटिस इन्सानस छि
        खॊडॖफ्यॆचि ज़्यादॖ
        आसान
5. मु: छ़्वपॖ छय रॊपॖसॖन्ज़
         करखय तॖ स्वनॖसॖन्ज़
    अ: छ़ॊपि छु वारियाह
         फ़ऻयदॖ तॖ ज़्यव गिल-
         वनस छु लांज/ज़्यादॖ
         कथॖ करनॖ सॗत्य ह्यकन
        ग़लती तॖ ज़्यादॖ ॴसिथ
**********************
1. गाड.....Fish
2. गऻड्य.... Vehicle
3. गॗड...... Rigid
4. ग्वड...... Ankle
5. ग्वफ.....Cave/Cavern
6. गूज...... Kernel
7. ग्वडॖ.....At first base
8. ग्वडॖ कथ....Foreword
9. ग्वड ह्यॊन...To begin
10. गूड..... Difficult/
                  Hard
**********************
      गीता ज्ञान : अध्याय-10
ही ज़नारदन पनॖन्य यूगॖ शक्ती
व्यस्तारॖ सान वऺनिव सऻरॖय विबूती
अमृत वचनव छुस बॖ त्रफतान
वॊन भगवानन गीता ज्ञान
**********************
हालात असि कऻशिर बट्टन छि अज़कल नोज़ुक मोडस प्यठ। कॆंह छि ख्वश, कॆंह छि त्रावान व्वश, कॆंह छि च़्रंगान तॖ कॆंह छि लाचार, कॆंह छि वऻरान तॖ कॆंह छि हालि हऻरान, कॆंच़न मीज्य सऺही वथ कॆंच़न छि रऻवमॖच़ वथ। कॆंह छि शोलान तॖ कॆंह छि डोलान। पंडित सऻबा अख गोम नज़रि जॆमिस मंज़ अख ल्वकुट मोसूम शुरा पनॖनिस नखस प्यठ ह्यथ। म्यॆ निश आव तॖ छुम दपान ज़ि हॆ माहरा बॖ क्याह करॖ। बॖ ठहरियोस प्रुछ़मस ज़ि कथ क्याह छु म्यॆ करुन। दॊपनम ॳमिस म्यानि आशिनि माहरा  स्व छॆ नॖ म्यॆ सॗत्य पऺत्यम्यव त्रॆयव वऺरियव प्यठॖ म्यॆ सॗत्य रोज़ानॖय। न रोज़नुक वजह प्रुछ़मस तॖ दॊपनम तमि माहरा ओस म्यॆ सॗत्य खांदर करनॖ ब्रौंठॖय अख खांदर कऺमिस ताम सॗत्य कॊरमुत।प्रुछ़मस यि च्यऻनिस नखस प्यठ कऺम्यसुन्द शुर छुय दॊपनम ज़ि यि माहरा छुम ब्यॆनि हुन्द न्यॆचुव। म्यॆ माहरा छु नॖ कॖन्हॖय शुर। म्यऻन आश्यन माहरा छि रिलीफ कऺमिशनरस निश लटॖ-पॊंज़ करान तॖ छि तरलॖ तमिस करान ज़ि शोठ खऻर्यतोन म्यऻनिस खातस। रिलीफ कऺमिशनरन न्यूनस बॖ नाद दिथ तॖ छुम वनान ज़ि यि खारोनया च्यऻनिस खातस। बॖ छुसख वनान माहरा खऻर्यून म्यऻनिस खातस मगर तॆलि छु ॳमिस म्यॆ सॗत्य रोज़ुन ति। मगर दपान छि बॖ रोज़य नॖ च़्यॆ सॗत्य। बॖ छुस सख परेशान। म्यॆ वऺन्यतव बॖ क्याह करॖ। कथ छि जऻरी।
**********************
"या देवी सर्वभूतेषु कान्ति रूपेण संस्थिता नमस्तस्यै नमस्तस्यै नमस्तस्यै नमोनम:"
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
 नऺविव तॖ फॊलिव
   भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)