18.02.2019

18.02.2019,माघॖ ज़ूनॖ पछॖ (शुक्ल पक्ष), च़्वदाह (चतुर्दशी), च़ऺन्दॖरवार (सोमवार), श्री सप्तर्षि सम्वत
5094, राश कर्कट (चलान), ऋतु शिशर (चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**********************
1. मु: हल्यन बानन वुकॖर्य
         ठानॖ
    अ: हिविस ह्यु समखान
2. मु: हलय नो डलय नो
         पनॖनि हेनि च़लय नो
    अ: ॳक्यसॖय कथि प्यठ
         डाड करुन
 3. मु: हऺस्य यॆड गासॖ गॆड
     अ: स्यठा ज़रूरथ आसुन
         मगर स्यठा कम बनुन/
          कम ख्यनॖ सॗत्य छॆ नॖ
          यड खसान
 4. मु: हकस तॖ हाकस कुनुय
          करुन
     अ: सारिनॖय चीज़न कुनुय
          करुन
 5. मु:हऺस्यतिस खऺसिथ बेछुन
     अ: थदि पायि रोज़ुन तॖ
           कऻम करॖन्य लॊति
           पायि
**********************
1. खोच़ॖबुड.... Coward/
                   Timid/Shy
2. खूच़्य खूच़्य...Fearfully
3. खोच़ुन....To be fright-
              ened/To dread
4. खॊंद.....Wound/Sore
5. खॊश खॊवुर....Improp-
             er/Unsuitable/
             Unfit
6. खॊश....Left handed
7. खॊच..A kind of open
              boat
8. खॊट...Faulty/Defec-
             tive/Adulterat-
             ed/False
9. खॊटमुत...Hidden/
                   Concealed
10. खॊत.....Nook/A
              Corner/Secret
              place
**********************
      गीता ज्ञान :अध्याय-10
अछरन मंज़ ओम् काल सुन्द महाकाल
सारिनॖय उदार करन वोल तॖ रक्षिपाल
च़्वपऻर्य म्वख वोल विराट म्यॆ ज़ान
वॊन भगवानन गीता ज्ञान
**********************
राथ यानि सदऻहिमि फरवऺरी ज़ॖ सास कुनवुह तॖ आथवारि द्वह ओस दिलशाद गार्डॖनॖ हवन युस ततिचि कशमीरी  पंडित सभायि दऺस्य आव करनॖ बडॖ धूम धाम सान। संस्थायि हुन्द प्रॆज़िडैंट श्री रमेश ज़ाडू सऻब तॖ तऺम्यसॖन्द्य बाकय सदस्य ॴस्य व्यवस्था करनस मंज़ लऺगिथ ज़ुव जानॖ सान। व्यवस्था ॴस नफीस तॖ मुकमल। लूख यानि भक्त-गण ॴस्य आमॖत्य दूरि-दूरि जायि प्यठॖ। रोहनी, गाज़ियाबाद, साकेत, शालामार गार्डॖन, वैशाली वगैरा वगैरा। मगर अख चीज़ युस म्यॆ नज़र आव ज़ि कम उम्र वऻल्य भक्त ॴस्य न आसनस बराबर। यानि द्वन त्रॆन हतन लूकन मंज़ ॴस्य मसा सथ ॴठ बच्चॖ त्रॆ च़ोर कोरि तॖ त्रॆ च़ोर लऺडकॖ यिहॖन्ज़ वऻन्स ॴस वुह वॖहरिस ताम।
बाकॖय ॴस्य सऻरी चतजी ह्यॊर ह्यॊरॖय ब्वन नॖ कांह। म्यॆ छु बासान सान्यन शुर्यन छु ज़्यादॖ ज़रूरथ यिमन हवनन मंज़ शिरकत करनुक ति क्याज़ि यिम छि धार्मिक काम्यन निशि स्यठाह दूरेमॖत्य तॖ यिमन छि आस्था वारॖ वारॖ कम ह्यवान गछ़ॖन्य। मऻलिस माजि छु पनॖनि ख्वतॖ पनॖनिस शुरिस या शुर्य सॖन्दिस शुरिस यिमन जायन वथ हावनॖच ज़रूरथ। तिहॖन्दि कॗमति समयि मंज़ थोडा समय अध्यात्मक काम्यन बापथ कडुन छु त्यूतुय ज़रूरी यूताह तिमन ख्यनुक-च्यनुक छु।
**********************
"अपन्नोस्मि शरण्योस्मि सर्वास्था च सर्वदा।
भगवन्तम् प्रपोन्नोस्मि
रक्षमाम् शरनागतम"
पऺरिव यि मंत्र ति दॊहय
*********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
 नऺविव तॖ फॊलिव
   भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)