08.02.2019

08.02.2019, माघॖ ज़ूनॖ पछॖ (शुक्लॖ पक्ष) त्रय (तृतीय) शॊकुरवार (शुक्रवार/जुम्मा),श्री सप्तर्षि सम्वत 5094, राश मीन (दुहचि 8.17 बजि प्यठॖ), ऋतु शिशर (चलान)..द्रठॖपऻन्च़ुक (पंचक) (चलान)...अज़ छि गोरॖ त्रय(गुरु तृतीया) ति
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**********************
1. मु: यथ कलस नॖ ग़ऻरत सॊ
         गऺयि अल
    अ: इन्सानस गछ़ि ग़ऻरत
         आसुन/ग़ऻरत रॊस
         इन्सान क्याह लवि
2. मु: यथ गामस नॖ गछ़ुन
         तमि गामुक नाव क्याह
         ह्यॊन
    अ: यॊसय कऻम ह्यकव नॖ
        कऺरिथ तथ क्याह अथय
         लागुन
3. मु: यथ नम अच़ि तथ
         क्याह छु शॆशतॖर लागुन
    अ: आसान कऻम क्याज़ि
          छि मुश्किल बनावॖन्य
4. मु: यथ लछस ति चरसॖय
    अ: ख़र्चॖ कऺरिथ ब्यॆहऻन
         ख़र्चनस नॖ खोच़ुन
5. मु: युथ कॊर तऺम्य त्युथ
         करस बॖ ति
   अ: नखॖ वालुन/बदलॖ ह्यॊन
**********************
1. ग्वलाब....Rose
2. ग्वलाब रुवय..Red face
                        like rose
3. ग्वलऻब्य....Rosy/Per-
            taining to rose/
        Of light red colour
4. ग्वलाब थऺर..Rose bush
5. ग्वलाब जामुन...A kind
              of sweetmeat
6. ग्वलाब ॳतॖर...Rose
           perfume/Rose
           scent
7. ग्वलुर....Crust/Bark
8. ग्वलॖरावुन...To hull/To
                      peel
9. ग्वनाह...Sin/Wicked-
        ness/Crime/Guilt
        Evil
10. ग्वनाहगार...Sinner/
         Criminal/Sinful/
         Wicked
**********************
      गीता ज्ञान :अध्याय-10
बाहन आदितियि पॊत्रन मंज़ विष्णु ज़ान
ज़ॖच़ॖ वोल सिर्यि तॖ वायू तेज़ ज़ान
नक्षर हुन्द आदि पऻती च़न्द्रमॖ ज़ान
वॊन भगवानन गीता ज्ञान
**********************
अज़ छि गोरॖ त्रय। बॊड द्वह। वख्तॖ अकि कऺशीरि मंज़ ॴस्य सुबहऻय क्वल-गुरु (ब्रह्मन) पनॖन्यन पनॖन्यन यज़मनन हुन्द गर गछ़ान गोरॖ त्रय ह्यथ तॖ ॴस्य रटान दक्षणा तॖ नेरान। चाय च्यनस सॊम्ब ति ॴस नॖ आसान तिमन फुर्सत। यि गोरॖ त्रय गऺछ़ वातॖन्य यज़मनस सुबहऻय सुबहऻय। अथ गोरॖ त्रयि मंज़ ओस आसान सरस्वती हुन्द फोटू बनऻविथ।
यज़मन ओस यि गोरॖ त्रय ॳछन लागान तॖ लबि प्यठ लागान। कॆंह बच्चॖ ॴस्य यि फोटू पनॖन्यन पनॖन्यन किताबॖ सॊन्दकन प्यठ मायि सॗत्य चिपकावान। ॳज़्यकि द्वह ॴस्य शुर्यन च़ाटॖहालॖ दऻखॖल करान विद्या प्राप्त करनॖ बापथ। राथ यॊस द्वय गऺयि अथ द्वयि ॴस्य वनान रंगॖ द्वय। दपान यिम ब्रह्मन ॴस्य पानय बनावान फोटू सरस्वती हुन्द अथॖ सॗत्य स्यॆन्दॖरि मीलि सॗत्य अमि द्वय द्वह तॖ वातनावान पनॖन्यन यज़मनन त्रय द्वह। गुरु जियन हुन्द रस्तॖ ओस लगान ॳज़्यकि द्वह। यिमन ॴस्य नॖ पऺन्य यिवान अथि कुनि। बॊड ब्वखचि नखस प्यठ ह्यथ ॴस्य नज़रि यिवान कऺशीरि मंज़। गऺयि तिम द्वह ति।यॆति रूद नॖ व्वंय क्वलॖ ब्रहमुन ति म्यॆ बासान। विरिहाव ब्रह्मनव त्रोव पनुन कार करुन तॖ गऺयि ॳस्य हवालॖ हिमाचलक्यन गुरु जियन यिम दावा करान छि ज़ि तिम छि कऻशिर-विद्याय मंज़ॖय सान्यन बड्यन दॊहन प्यठ पूज़ा करान। असि ति कॊर ॳछ वऺटिथ तिहन्दिस वनॖनस विश्वास तॖ थऺव यछ़ तॖ पछ़ तिमनॖय प्यठ। ॳज़्यकिस शुरिस कुस तारि फिकिरी ज़ि गोरॖ त्रय क्याह गऺयि।
**********************
"या देवी सर्वभूतेषु दया रूपेण संस्थिता नमस्तस्यै नमस्तस्यै नमस्तस्यै नमोनम:"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
 नऺविव तॖ फॊलिव
  भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)