02.09.2018

02.09.2018, बऻद्रप्यथ (भाद्र), गटॖ पछॖ (कृष्ण पक्ष), सतम (सप्तमी), आथवार (रविवार/ एतवार),श्री सप्तार्षि सम्वत 5094, राश वृष (चलान), ऋतु वर्षा (चलान)...अज़ छि ज़रमॖसतम (जन्माष्टमी) फ़ाकॖ ति
*************************
जे के विचार मंचॖ तरफॖ छुस बॖ त्वहि सारिनीय यछ़ान
     ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: ॳथ्य बानस ख्यॊन तॖ ॳथ्य
         बानस छरुन
   अ: यॆमिस निशॖ कांह फऻयदॖ
         वाति तऺम्यसॖन्ज़ि गऻबथ
         करॖन्य
2. मु: बतॖ न तॖ बतास च़्वचि न तॖ
         लवास
   अ: हदॖ निशि ज़्यादॖ तमाह
        करुन/यदॖ ख्वतॖ ज़्यादॖ
        यछ़ुन
3. मु: बतॖ पावि तल ॴबॖ ख़ार
        व्यपान
   अ: ख्यावन-च्यावनॖ सॗत्य छय 
        वारियाह ख़राब कामि पर्द-
        पूशीद रोज़ान
4. मु: बतॖ ब्यॊन गव रतॖ ब्यॊन
    अ: ब्यॊन नीरिथ छॆ नॖ माय
         रोज़ान
5.मु: बतॖ गर्दन गऺयि बऺड गर्दन
   अ: बतॖ ख्यावुन गऺयि बऺड
        सुफऻरिश
*************************
1. शाहतूस....A special wool
                   Pashmena
2. शाहतुल.... Mulberry
3. शायद...... Perhaps/Pro-
                 bably/Possible
4. शाहिद...... Witness
5. शायान......  Suitable (for)
          Worthy (of)/Fit(for)
6. शहद/माछ   Honey
7. शहीद........Martyr
8. शाहकार..... Masterpiece
9. शाहसवार..Joceky/Horse
                   man/Princely
10. शऻही.......Royal, Regal
*************************
गीता ज्ञान  :   अध्याय-6  :
जिसॖम कलॖ गर्दन हिवुय थऻविथ
नज़र नस्ति पनॖनि प्यठ जमऻविथ
ओर योर कुनि तरफस नॖ वुछान
वॊन भगॖवानन गीता ज्ञान
*************************
अज़ छि ज़रमॖसतम यानि अज़ छु भगवान कृष्णस वॊहरवोद। ज़रमॖसतम यानि जन्माष्टमी। यि द्वह छु हॆन्द्यन मंज़ बडॖ जोश-खरोश सान यिवान मनावनॖ। कशीरि मंज़ ॴस्य ॳज़्कि द्वह पनॖन्यन कुठ्यन मंज़ या ठोकुर कुठ्यन मंज़ जूलॖ बनावान यानि रज़ॖ च़ोर अलंज़ॖ त्रऻविथ तिमन मंज़ चूक्य यानि पीर थवान।रज़न अंद्य-अंद्य दोति गन्डान। चोकि प्यठ मेज़-पोश वाहरावान तॖ अख जूलुक आकार दिथ ॴस्य ॳस्य कृष्णॖ-भगवानसुन्द फोटू थवान तॖ अंद्य-पऺख्य ब्यॆयन दीवी-दीवताहन हॖन्द्य फोटू सजऻविथ थवान। अथ जूलस सॗत्य ॴस्य अख ज़ीठ रज़ गन्डान यॆमि सॗत्य जूलस ॴस्य गूरॖ-गूरॖ करान ति ज़न गव ज़ि कृष्णॖ बगवानस ल्वलॖमतॖ लाय करान रोज़ान। म्यवॖ यानि च़ूंठ्य, टंग, ॴर ॴस्य ॳकिस प्लेटस प्यठ थविथ अथ जूलस मंज़ थवान। धूप-दीप ॴस्य ज़ऻलिथ थवान, गारि आटिचि बनऻवमॖच़ॖ पकोरि, यानि ओलव पकोरि, च़ून्ठ्य पकोरि, वांगन तॖ मरच़ॖवांगन पकोरि ॴस्य थवान। तऺलिथ ओलव बेतरी यिम सऻरी चीज़ ॴस्य थवान अथ जूलस मंज़। अज़्युक द्वह ओस शुर्यॆन हुन्द खास द्वह आसान। ख्यनुक-च्यनुक द्वहा। ह्यन्दॖवन्दॖ ओस यिवान अनॖनॖ तॖ ख्यन तॖ अथ दुहकिस दॊहस ओस रोज़ान समा-गमा। ख्यवान ॴस्य अगनस द्वगन तोति ॴस्य दपान ज़ि अज़ छु ना फ़ाकॖ। कथ छि जऻरी
*************************
ज़ून खसि अज़ रऻच़हॖन्ज़ि 11.19 बजि तॖ ज़ानव तॖ मानव ज़ि कृष्णॖ बगवान ज़ाव दीवकी मातायि असि सारिनीय अनुग्रह करनॖ बापथ
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नऺविव तॖ फोलिव
   भूषण कौल"दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(koshursabak.blogspot.com ति वुछिव)