04.09.2018

04.09.2018, बऻद्रप्यथ (भाद्र),गटॖ पछॖ (कृष्ण पक्ष)नवम (नवमी), बॊम्वार (मंगलवार),श्री सप्तार्षि सम्वत 5094, राश मिथुन (दुहचि 7.31 बजि प्यठॖ), ऋतु वर्षा (चलान)
*************************
जे के विचार मंचॖ तरफॖ छुस बॖ त्वहि सारिनीय यछ़ान
         ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु:ॳनिस मुश हावॖन्य न छु
        ग्वनाह तॖ न छु सवाब
   अ: बॆवकूफस नसीहत करॖन्य
        छि फ़ज़ूल
2. मु: अथ कुलिस छि ज़ॖ म्यवॖ
    अ: ॳकिस ज़नानि ह्यॆकि कूर
          या न्यॆचुव ज़्यॆविथ
3. मु: अथॖ मल
    अ: मोमूली चीज़
4. मु: अथ शूबि ज़ुव कूताह लूबि
    अ: ख़राब कऻम छॆ नॖ तऻरीफ़न
         लायक़ आसान
5. मु: अथॖ शल्कॖ ख्वतॖ छु कथॖ
         शलख
  अ: बेज़ती छि लायनॖ ख्वतॖ सख
*************************
1. यज़थ.. Honour/Respect
               Dignity/Esteem/
               Reputation
2. यज़थ दार...Respectable
3. यज़थ रावुन...To lose
                         respect
4. यज़थ वालुन..To insult/To
               dishonour/To
               disgrace
5. यज़मन....Host/Father of
          bride or bridegroom
          One who offers
          money to Brahman
6. यज़मनबाय...Hostess/
          Mother of bride or
         bridegroom
7. यिज़ाह..... Trouble/Dis-
          tress/Pain/Agony/
          Hardship/Difficulty
8. यिज़ाह तुलुन...To face
          pain/Trouble/Hard-
          ship
9. यिज़ाह द्युन...To hurt/To
          trouble someone to
          harm/To annoy
10. येज़ाज़...Degree/Award
          Honour/Title
*************************
गीता ज्ञान  :  अध्याय-6  :
मन वश कऺरिथ यूगी लगातार
स्वरान ब्रह्म स्वरूपुक आकार
प्रेम आनन्द रूपॖ शऻन्ती प्रावान
वॊन भगवानन गीता ज्ञान
*************************
असि छि ॳकिस द्वन बड्यन दॊहन बडॖ दुच़्यॊत गछ़ान। ज़रमॖ सतम छि सऻरी कऻशिर्य बटॖ वनान मगर बाकय सऻरी हॆन्द्य छि वनान जन्माष्टमी। अकि दुहुक फेरॖ छु प्यवान वनॖनस वनॖनस मंज़ॖय। ॳस्य छि नॖ ह्यकान यि तय कऺरिथ ज़ि दुहुक असली नाव क्याह गछ़ि आसुन। यिथय पऻठ्य छि हेरच़ प्यठ असि गांगल गछ़ान। अज़ छा किनॖ पगाह। यि छि नॖ सऻन्य ब्रह्मन पनॖनि ब्रह्मन महामंडली मंज़ तय ह्यकान कऺरिथ। सऻन्य ॳज़िक शुर्य छि असि तानॖ कसान ज़ि त्वहि छयव नॖ पानस पताह तॖ असि क्याह ह्यॆछनऻविथ। असि छु ॴसस थॊप लगान। याम ॳस्य जंत्री मंज़ वुछान छि म्यान्यन वारियाहन बायन ब्यॆन्यन म्यॆ ह्यथ सॗत्य छॆ नॖ जंत्री मंज़ ल्यूखमुत सोरुय फिकरी तरान। याम कऻन्सि गुरु जियस कुनि चीज़स मुतलक प्रॖछ़ान छि सु छु असनऻनाह करान तॖ कनॖडोल दिवान। या छु वनान ज़ि असि क्याज़ि सनुन तिमन चीज़न। दपान यि छु ज्योतिष बापारॖ। अगर यि ज्योतिष्य बापारय छु, ॳस्य क्याज़ि रॊपियि अखतवुह खर्चऻविथ यि जंत्री अनान। तिक्याज़ि तिहॖन्दि हिसाबॖ छु असि सिरिफ़ वार तॖ तिथि योत वुछुन तॖ सु ह्यकव ॳस्य द्वन-वर्कन हॖन्ज़ नॆचपऺतॖरि प्यठ ति वुछिथ। बासान छु ज़ि ज्योतिष कार्यालय छु पनुन पौंसॖ कमावान तॖ ॳस्य छि ह्वॊखी रूज़िथ या यि दपिज़ि ति अज्ञानी रूज़िथ। सारे कामि यानि साथ वुछुन, टॆकिन्य मिलनावॖन्य,वगैरा छु गुरु जी करान असि जंत्री थऺविथ करुन क्याह छु। ल्यूखमुत ह्यॆछुन ति छु नॖ। न छि शुरीय ह्यॆछनावॖन्य या परनावॖन्य असिहे करुन छु तॖ क्याह करुन यीच़ि म्वचि किताबि। यिमन कथन प्यठ कुस करि ग़ोर
पकान क्युथ छु सोन यि दौर
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नऺविव तॖ फोलिव
  भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(koshursabak.blogspot.com ति वुछिव)