05.09.2018

05.09.2018, बऻद्रप्यथ (भाद्र) गटॖ पछॖ (कृष्ण पक्ष), दऺहम (दशमी), ब्वदवार (बुधवार),श्री सप्तार्षि सम्वत 5094, राश मिथुन (चलान) ऋतु वर्षा (चलान)
*************************
जे के विचार मंचॖ तरफॖ छुस बॖ त्वहि सारिनीय यछ़ान ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: ॳनिस हावान सऻरी वथ बेक्लस नॖ कांह
   अ: बेक्लस छु नॖ सहल सहल फिकरी तरान

2. मु: अथॖ छॊल तॖ म्यॆतरुत च़ॊल
    अ: मतलबॖ द्राव तॖ यारज़ ति म्वकलॆयि

3. मु: अथॖच्यन पांच़न ओंगजन मंज़ छि किस ल्वकॖट
   अ: प्रथ कऻन्सि ल्वकटिस या बऺडिस छि पनॖन्य पनॖन्य अहमियत

4. मु: अथन फ्वख दिवान बचुन
    अ: मुश्किलन कुनि बलायि निशि बचुन/कऺह्य ताम कुनि बजि बलायि तलॖ म्वकलुन

5. मु:अथॖ हावुन गव अथॖ ख्यावुन
    अ: कऻन्सि कॆंह द्युन गव तस गरि गरि मंगनुक शीरॖ च़ानुन

*************************

1. सेथ.................Mischief
2. सेथ अनॖन्य.......To create mischief
3. सेथ आसॖन्य......Be mischievous
4. सेठ.................A business man / A rich person
5. स्यस................Bulbous / Gland / Rheumatism
6. स्यकलॖ.............A wooden lid
7. स्यख................Sand/An abuse
8. स्यॆकि डाफर.....A heap of sand
9. स्यॆकि शाठ........A field of sand/Desert
10. स्यख छ़ॖनॖन्य.....To destroy / To throw away / To betray the confidence

*************************

गीता ज्ञान   :  अध्याय-6  :
=================
न यछ़ि ज़्यादॖ न बिल्कुल कम
ख्यनॖवऻल्य सदा हुशयार
यिमय यूगी स्यॆदी छि प्रावान
वॊन भगॖवानन गीता ज्ञान

*************************

जंत्री मुतलक ॴस राथ कथ चलान। म्यॆ वोत वुछान ज़ि सानि पाठॖ-किताबॖ यिम कॆंह संस्थायि छापान छि तिमन मंज़ कुनुय पाठ छुनॖ ह्युवॖय आसान ब्यॊन-ब्यॊन किताबन मंज़। मिसालन इन्द्राक्षी, जंत्री मंज़ छु लीखित "आनंदा विजया पूर्णा मानस्तोकाs पराजिता"...मगर यिहऻय लऻन यॆलि परान छि ब्यॆयिस किताबि मंज़ तति छु लीखित "अनन्ता विजया पूर्णा मनस्तोषाs पराजिता"...परनवोल छु बिचोर दुच़्यॆतिस मंज़ गछ़ान ज़ि यि छा ठीख किनॖ हु छु ठीख। यूतुय योत नॖ ॳथ्य जंत्री मंज़ ॳथ्य इन्द्राक्षी पाठस मंज़ यॆलि अंतिम दॊन लऻनन कुन नज़र छि प्यवान "एतैनीम-पदे.....निवारणम", तॖ येलि कुनि संस्थायि मंज़ यि इन्द्रऻक्षी पाठ छि परान तति छि नॖ मंत्रुक यि हिसॖ परानॖय। मगर यॆलि ब्याख पाठॖ-किताब वुछान छि तथ मंज़ छि बॆयिस हिसस मंज़ परान "एतैर्नामपदैर्दिव्य: स्तुता....निवारकम्"। परनवोल छु नॖ ह्यकान फऻसलॖ कऺरिथ ज़ि यि छा परुन किनॖ छु नॖ परुन। यिथय पऻठ्य छु जंत्री मंज़ "श्री रुद्राष्टकम्" मंत्रकिस ग्वडनॖकिस श्वॊलूकॖ किस त्रेयिमि लऻनि मंज़ छु शब्द "अजं" लेखनॖ आमुत।यॆलि यि शब्द छि दॊयम्यन किताबन मंज़ वुछान छि तॖ यि शब्द छु लीखित "निजं" । परनवोल छु ॳछ वऺटिथ यिति परान तॖ हुति परान हालांकि माने छु दॊन ब्यॊन ब्यॊन। म्यानि वनुनुक मतलब छु ज़ि सऻन्य धर्म-गुरु ति छि नॖॴस मुच़ॖरावन तॖ वनान सही क्याह छु तॖ ग़लत क्याह छु। वारियाहन किताबन मंज़ वुछ म्यॆ ज़ि कुनुय पाठ मगर शब्दन हॖन्ज़ छपऻय ब्यॊन ब्यॊन। कथ जि जऻरी

*************************

कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव

*************************
नऺविव तॖ फोलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(koshursabak.blogspot.com ति वुछिव) छु