03.09.2018

03.09.2018, बऻद्रप्यथ (भाद्र) गटॖ पछॖ (कृष्ण पक्ष), ॴठम (अष्टमी), च़न्द्रवार (सोमवार), श्री सप्तार्षि सम्वत 5094, राश वृष (चलान), ऋतु वर्षा (चलान)
*************************
जे के विचार मंचॖ तरफॖ छुस बॖ त्वहि सारिनीय यछ़ान
      ऒरज़ुव तॖ दॊरकॊठ
*************************
नमस्कार त्वहि सारिनीय माहरा म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: ॳदॖर ज़ऺट ह्यु अगादि
         गछ़ुन
   अ: ॳडयल लागुन /थफ न
         तुलनवोल
2. मु: अथस मंज़ ओंगजि पांछ़
         तिम नॖ हिशय
    अ: द्वन छि नॖ हिवीय आदत
         आसान
3. मु: अथॖ छ़ॊट तॖ ज़्यॆवि ज़्यूठ
    अ: युस वनि स्यठाह तॖ करि
          कम/अथव सॊत तॖ कथव
          तेज़
4. मु: अथवास गव मॊहरि सास
    अ: इतिफ़ाकस मंज़ छु ताक़त
5. मु; अथॖ दारुन गव पान कॖनुन
    अ: मंग-मंग करनॖ सॗत्य छु
         यज़थ वसान
*************************
1. वुगरॖ.....Watery rice/
                Cooked beaten
               rice/Unploughed
               land
2. वुगॖराय....Recovery of
                  loan
3. वकुर. Twisted/Widower
4. वुकरॖ..Not straight/
             Twisted/Widow
5. वलुन....To wrap/To
             cover (body) with
             sheet/dress
6. वलुन पलव...Cover cloth
               for the body
7. वऺलिथ-मऺलिथ... Wrapped/
                           Covered
8. वालुन....To bring down
9. वोलुन....Has brought
                 down/To talk
                 loud
10. वुल.....Hole/Gap/Open
                 ing
*************************
गीता ज्ञान  :  अध्याय-6  :
ब्रह्मचरिय व्रतस दऺरिथ रोज़ुन
निरबय शांत अंत:कर्न थऻविथ
मन रुकिथ म्योन ध्यान दारान
वॊन भगॖवानन गीता ज्ञान
*************************
ज़रमॖ-सतम या जन्माष्टमी छि असि कऻशिर्य-बटन कुनि-कुनि सातन ॴठम द्वह आसान। मगर असि तॖ बाकय हॆन्द्यन मंज़ छि हमेश अथ दॊहस फ़र्ख रोज़ान। यॆमि हिसाबॖ ॳस्य वनान छि ज़रमॖ सतम बासान छु ज़ि कृष्ण जी छु ज़ामुत सतम दुहॖय। ज़रम शब्द ति मा छु द्रामुत ज़न्म शब्दॖ प्यठॖ।
अमिच व्याख्या ह्यॆकि कऺरिथ कांह व्यदवानॖय यॆमिस अथ मुतलक पूरॖ ज़ऻन्यकऻरी आसि। हालस छि ॳस्य मनावान यि द्वह अमी नावॖ सॗत्य। म्यॆ छु बासान यिहऻय छु अख फ़ाकॖ द्वह असि बटन मंज़ यथ मंज़ ॳस्य यड-बऺरिथ ख्यवान छि दुह्यकिस-दॊहस रोज़ान छि मगर तोति छि दपान रोज़ान ज़ि अज़ छु ना फ़ाकॖ। कऺशीरि मंज़ ॴस ॳज़्यकि द्वह ह्यन्दव्यन्दन बडॖ मंगॖ-मंग रोज़ान, म्यवॖ ति गुतुल अनान। ततिकिस म्यवस ओस बदलय मज़ॖ आसान।ह्यन्दव्यन्दॖ मॊदुर कन्द ह्यु तॖ व्वज़ुल नार ह्यु आसान। कऻशिर्य वांगन ति ॴस्य आसान मज़ॖदार। दान ओस आसान चलान दुह्यकिस दॊहस। वॊसॖ-द्रॊस ॴस आसान। शुर्येन हुन्द शोरॖगुल आसनॖ सॗत्य ओस बासान ज़ि अज़ छु बॊड द्वह। ज़रमॖसतम द्वह ॴस नेरान जांकीय, ब्यॊन-ब्यॊन मंदरन प्यठॖ ॴस्य ॳक्यसॗय जायि समान तॖ तति प्यठॖ जॊलूसकिस रूपस मंज़ पकान गणपतॖयारॖ प्यठॖ कॆच़व बाज़रव मंज़्य फीरिथ ॴस्य ब्यॆयि वापस गणपतयार वऻतिथ पनॖन्यन पनॖन्यन गरन गछ़ान। जॊलूसस ब्रौंठॖ ब्रौंठॖ ओस अख नफ़र गुरिस प्यठ बिहिथ आसान। लूख ति ॴस्य आसान सॗत्य-सॗत्य। ज़नानॖ मर्द लडकॖ कोरि बऺड्य ल्वकॖट्य मंत्र, लीलायि, कृष्णॖसॖन्ज़ रास-लीला करान करान, परान परान आसान तॖ बासान ओस अज़ छि बटन ज़रमॖसतम। म्वकल्यव सु दौर, सु नज़ारॖ, सु यकुत, सु म्युल सॊति रूज़ अख कथा य्यॊस नॖ अज़ शुर्यॆन ह्यकान छि बोज़नऻविथ ति, तिक्याज़ि तिमन छि वख्तॖच कमी तॖ असि छि वननवाल्यन हॖन्ज़ कमी
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
  नऺविव तॖ फोलिव
     भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(koshursabak.blogspot.com ति वुछिव)