31.08.2018

31.08.2018, बऻद्रप्यथ (भाद्र),गटॖ पछॖ (कृष्ण पक्ष), पऻन्च़म (पंचमी), शॊकुरवार (शुक्रवार/जुम्मा), श्री सप्तार्षि सम्वत 5094 राश मेष (चलान), ऋतु वर्षा (चलान)
*************************
जे के विचार मंचॖ तरफॖ छुस बॖ त्वहि सारिनीय यछ़ान
         ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: ॳती शाह तॖ ॳती गदाह
    अ: कॖस्मत बदलनस छे नॖ तऻर
         लगान
2. मु: अथ अथ बुथिस सथ सथ
         चौब
   अ: यॆमिस यिछ़ ख़ऺस्लथ आसि
        तऺमिस त्युथुय पेश यिवान
3. मु: ॳत्य दऻद्य वुछिनय म्यानि
         ॳछ मॖ वुछिनय
   अ: अख वॊहव/मदद करनॖ
        बदलॖ सख़ती करॖन्य
4. मु: अथ पुरनि यिमय च़ॖरनि
    अ: युस यथ लायक़ आसि तस
          तिथी मेलान
5. मु: ॳछ क्रॆहनि तॖ बुथ सफ़ेद
    अ: रुत बुथ मगर बद कार
*************************
1. यूत/यूताह.....This much
2. यूतुय...........Only this
3. यिववुन...Coming/New
          comer/About to
          come
4. यॊततामथ...Until/As long
                      as
5. योर..........Here
6. यार.......Friend/Compa-
                nion/Supporter
7. यारानॖ.....Friendship/
                  Acquaintance
8. यारबल....Bank of river
9. याति......Either
10. याम.....When/As soon
                  as
*************************
गीता ज्ञान   :    अध्याय-6   :
श्रूच़ि जायि दर्बि-गासॖ त्रऻविथ
मृग-छाला ब्यॆयि वस्त्र वाहरऻविथ
न ज़्यादॖ थॊद न यछ़ कम आसान
वॊन भगॖवानन गीता ज्ञान
*************************
मशवरॖ दिनॖ बापथ छि मेलान दऺह दर दऺह मगर मशवरस अंजाम वातॖनावन्य वऻल्य छि नॖ मेलान सहल सहल। दोस्त बनावुन छु सहल मगर दोस्ती निभावॖन्य छे नॖ सहल कथा। ख्यनॖ-च्यनॖ यार छि मेलान बिसियार, ख्वद-गर्ज़ मॆथर छि ग्रन्दि रॊस मगर दऻदिस वातनवोल यार-दोस्त छि मेलान कॖस्मतवाल्यनॖय। दुश्मनन हॖन्ज़ कमी ति छे नॖ कॆंह। न्यॆबॖर्य दुश्मनुत हावुन छु बोज़नॖ यिवान मगर अंदॖर्य दुश्मनुत थावनवऻल्य छि नॖ लबॖनॖ यिवान यॊत ताम तिम पूरॖ वगुव निवान च़ऺटिथ छि अदॖ छि तिहन्ज़ दुश्मनी बास यिवान। यि दुश्मनुत छु प्रथ जायि मूजूद, गरस मंज़, परस मंज़, वॊथवुन, बॆहवुन, मगर यि दुश्मनुत नज़र यिवान यिवान छि अख वऻन्सा नीरिथ गछ़ान। यि छि शायद इन्सानसॖन्ज़ फितरत यॊस तमिस सॗत्य रोज़ान छि ग्वडॖ प्यठय। अमापॊज़ फिकिरी छु तॆली तरान यॆलि ज़ख वातान छु। संस्कारन हॖन्ज़ कमी यस आसि तऺस्य मंज़ दुश्मनुत ज़्यादॖ बासि। यि विषय छु स्यठाह ज़्यूठ मगर बॖ छ़ॊटॖरावॖ यूतुय वऺनिथ ज़ि असि पज़ि पनॖन्यन शुर्यॆन जान जान संस्कार दिन्य, अख-ॳकिस पज़ि मनॖ पलज़ुन, ब्यॆयिसुन्द दोद पनुन ज़ानुन। लालच त्रऻविथ, मॊह मऺशरऻविथ तॖ क्रूध त्रऻविथ पानॖवुन्य असान असान द्वह कडुन ति क्याज़ि ज़िन्दगी प्यठ छु नॖ बॊरूसॖ। कर कतिनस किथॖ पऻठ्य ह्यॆयि छ़्यफ कऻन्सि छे नॖ पताह। इस्लिये अथॖरॊट करान रोज़ुन तॖ दय सुन्द नाव स्वरान रोज़ुन।
************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नऺविव तॖ फोलिव
  भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(koshursabak.blogspot.com ति वुछिव)