07.08.2018

07.08.2018, श्रावणॖ (श्रावण/ सावन) गटॖ पछॖ (कृष्ण पक्ष), दऺहम (दशमी)/काह (एकादशी), बॊम्वार (मंगलवार), श्री सप्तार्षि सम्वत 5094, राश मिथुन (रऻच़हॖन्ज़ि 11.48 बजि प्यठॖ), ऋतु वर्षा (चलान)....चूंकि काह छि रावान, कऻश हुन्द वॊहरवोद यी ॳज़्य....काह छि लगान प्रात: 5.15 बजि प्यठॖ...
*************************
जे के विचार मंचॖ तरफॖ छुस बॖ त्वहि सारिनीय यछ़ान
    ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु:अबख छानस सबक़ रूद
    अ: अडॖ-ह्यॆछॖलिस छु वख्तॖ
        विज़ि सबक़ मशान
2. मु: अबॖन्य द्रॖय बबन द्रॖय
    अ: नाहकय क़स्मॖ-कसम/
         हीलॖ तय बहानॖ/पछ़
         अनॖनावनॖ बापथ हु क्या
         यि क्या वऺनिथ टाल-मटोल
         करुन
3. मु: अब ति टोठ तॖ बब ति टोठ
    अ: दॊयव मंज़ॖ नॖ कांह चीज़
         त्रावनस तयार आसुन/हु
         ति गॊछ़ुम तॖ यि ति गॊछ़ुम
4. मु: अबख छानस तबक़ यड
    अ:बेवक़ूफस छु ब्वछर आसान
        अडॖह्यॆछलस छु ब्वछर
5. मु: अपुज़ छु तुलॖकतुर तॖ पॊज़
         छु आफ़ताब
    अ: अपुज़ छु नॖ दऺरिथ ह्यकान
         पऺज़िस निश
*************************
1. प्वफ.... Father's sister
2. प्वफू.... Father's sister's
                husband
3. मास.... Mother's sister
4. मासू.... Mother's sister's
                husband
5. पॆतॖर.... Uncle
6. पॆचन्य.. Aunt
7. पितुर-बोय.. Cousin broth
                      -er
8. पितॖर-ब्यॆनि....Cousin
                         sister
9. बॖड्यबब.....Grand father
10. नान्य ..... Grand-mother
*************************
गीता ज्ञान  :   अध्याय-5  :
यस नॖ कऻन्सि हॖन्ज़ दॖय नॖ छि कामना
सु कर्मॖ-यूगी छु सन्यऻस्य सदा
सु रागॖ लीशॖ बंदनॖ मुक्तॖ आसान
वॊन भगॖवानन गीता ज्ञान
*************************
सऻरी रिश्तॖदार छि असि मोबायलस मंज़ थऻवमॖत्य। यान्य ख्वदा-नखास्ता कुनि विज़ि मोबायलस हॊरॖ-योर गछ़ान छु  दफ ज़ि रिश्तस छि दॖनन लगान, दूर्यर लगान। ॳकिस-ब्यॆयिस पृछ़्य-पृछ़्य ॳमिस रिश्तॖदार सुन्द नम्बर छु वारियाह समय ख्यवान। कुनि-कुनि सातन छु रिश्तॖदारॖय मऺशिथ गछ़ान। अमापॊज़ ज़ऻनुन तॖ मानुन प्यॆयि ज़ि अज़कलुक रिश्तॖदार छु असि कनस मंज़ ज़्यादॖ तॖ दिलस मंज़ कम। दूर्यर आसनॖ मूजूब गव अख-ॳकिस निश युन-गछ़ुन ति कम। ओत्ताम ओस आसान पॊछ़। पॊछ़ यानि अतिथि यानि युस कुनि सातॖ ति पॆयिहे गरॖ वऻतिथ। अज़कल म्वकल्यव अतिथि सुन्द अर्थ यानि मानेयि।बिना ख़बर कऺरिथ कऻन्सि हुन्द गरॖ अतिथि बनिथ गछ़ुन छु बडॖ ख़तरनाक ति ज़न गव ज़ि ज़्यूठ सफ़र कडिथ यॊदवय कऻन्सि हुन्द गर गछ़व तॖ सु तति मेलॖ नॖ, दिलस छि थफ़ हिश लगान तति दरवाज़स कुलुफ वुछिथ। दुबारॖ यिनुक छु नॖ सवालॖ। इस्लिये छु ज़रूरी ज़ि ग्वडॖ फोन कऺरिथ वख्त मंगुन, वार वुछिन्य तॖ अदॖ अख-ॳकिस मेलुन। समयिच रफ़्तार छि तेज़ पकान तॖ ॳस्य ति छि अमी समयिक्य गुलाम। म्यॆ छु बासान ज़ि कऺशीरि मंज़ रूज़िथ ॴस असि वारियाह राहत। गरॖ ॴस्य वख्तॖ-अकि ऒरुत तॖ बॊरुत आसान। दारि-बर ॴस्य यलॖ आसान। कऻन्ह ति यीहे कुनि सातॖ ति तॖ कांह न तॖ कांह ओसुस मेलानॖय। छ़ॊर ओस नॖ नेरान। न ॴस वख्तॖच पाबंदी। न ओस यिनस-गछ़नस थख। पॊछ़-लॊछ़ यीहे तॖ बासान ओस ज़ि भगवान च़ाव गरॖ। ख्यावुन-च्यावुन ओस धर्म बासान। व्वंय छु सोरुय फिरिथ। पॊछ़ रूद नॖ पॊछ़, पॊछ़ यिवान तॖ जायिहॖन्ज़ व्यछ़य प्यवान। पऺछ़िस प्यठॖ यॊदवय ब्याख पॊछ़ यी तॖ तॆलि पऺछ़िस पॊछ़ खरान, खानॖदारस दॊनॖवय तॖ खानॖदारिनि त्र्यनवय।
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नऺविव तॖ फोलिव
  भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(koshursabak.blogspot.com ति वुछिव)