06.08.2018

06.08.2018, श्रावणॖ (श्रावण/ सावन), गटॖ पछॖ (कृष्ण पक्ष), नवम (नवमी), च़न्द्रवार (सोमवार), श्री सप्तार्षि सम्वत 5094, राश वृष (चलान), ऋतु वर्षा (चलान)
*************************
जे के विचार मंचॖ तरफॖ छुस बॖ त्वहि सारिनीय यछ़ान
         ऒरज़ुव तॖ दॊरकॊठ
*************************
नमस्कार त्वहि सारिनीय माहरा म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: सोपूर्य माज़रथ
    अ: छ़ॊरुय व्यवहार
2. मु: सोसुन फेरुन
    अ:ब्यमार आसनॖ मूजूब बुथिस
         लॆदर्यार फेरुन
3. मु: शर्म बुज़िथ ख्यॆन्य
    अ: बे-शर्म आसुन
4. मु: श्वॊंगिथ शाहमार
    अ: अनज़ऻन्य पऻठ्य न्वकसान
         कऻन्सि वातनावुन
5. मु: मुजि ख्यथ सर्द गछ़ुन
    अ: तस्लाह गछ़ुन/कुनि कामि
          मंज़ नाकाम सप्दुन
*************************
1. ख़र....An ass
2. खॖर... Slip
3. खिर...Sweet dish made
              of rice and milk
4. ख़रबूज़....Melon
5. खरबोर...A donkey load
6. ख़राब.... Bad/Wretched/
                 Ruined/Poor/
                 Corrupt/Spoiled
7. ख़राश.... Scratch
8. खॊश..... Left-handed
9. ख्वश... Happy/Pleasure
10. खर-दिमाग...Pig-headed
                Foolish/Stupid/
                Silly/Senseless
*************************
गीता ज्ञान  :  अध्याय-5  :
         श्री भगवान वनान
भगवान वनान कर्मॖ यूग तॖ सन्यास
कल्यानकऻरी दॊनवय फर्क छे नॖ ख़ास
कर्मॖ यूग सादना किन्य कर्म छि आसान
वॊन भगॖवानन गीता ज्ञान
*************************
बॖ ओसुस च़्वन-पांच़न दॊहन पूने-हस मंज़ बिहित तॖ पताह लॊगुम ज़ि कऻशिर्य-बटन छु यि शहर यानि पूना रास आमुत तॖ हॆत्यमॖत्य छिन मुस्तकॖल पऻठ्य अति रोज़नि। अख ख़ास वजह छि तिहिन्द्य शुर्य यिम इन्जीन्यर या डाक्टर बनिथ अथ शहरस मंज़ नोकरी करान छि। दॊयिम वजह छु अत्युक मौसम युस बटस मन मुवऻफिक छु। पूने ति छु अख बॊड शहर तॖ कऻशिर्य-बटॖ छि रूज़िथ दूर दूर जायन तॖ छि नॖ ह्यकान वऻतिथ अख ॳकिस निश आसऻनी सान। बंगलोरॖ ति वुछ म्यॆ युथुय हालाह। कति बनन व्वंय तिम यार...गणपतयार/सूमयार/द्रऻब्ययार/मलॖयार/प्वरुषुयार/खरयार/बटॖयार...न रूद व्वंय सु बल यानि मानसबल/यारबल/गान्दरबल/छच़ॖबल/खनॖबल/अहरबल...व्वंय नेरि सऻन्य वऻन्स नव्यन वतनन मंज़ नवि नवि वति फीर्य फीर्य खति नेरान नेरान।
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नऺविव तॖ फोलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(koshursabak.blogspot.com ति वुछिव)