13.08.2018

13.08.2018, श्रावणॖ (श्रावण/ सावन), ज़ूनॖ पछॖ (शुक्ल पक्ष) द्वय (त्रय छि रावान), (द्विती), च़न्द्रवार (सोमवार), श्री सप्तार्षि सम्वत 5094, राश कन्या (रऻच़ हॖन्ज़ॖ 12.38 बजि प्यठॖ), ऋतु वर्षा (चलान)...त्रॆयि हुन्द वॊहरवोद यी ॳज़्य यानि द्वॊयि द्वह ति क्याज़ि त्रय छि रावान (यानि त्रय छि लगान सुबहस 5.44 बजि)
*************************
जे के विचार मंचॖ तरफॖ छुस बॖ त्वहि सारिनीय यछ़ान
      ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: बालॖ नॖ छि लाल नेरान/
         ल्यॆम्बि मंज़ॖय छि पम्पोश
         फॊलान
   अ: ग़रीब गरॖ मंज़ॖ कांह जान
        नेरान
2. मु: बाब-आदमस ज़ॖ गबर
         ॳक्य रऺट आवर्यॆन तॖ
         ब्यॆय क़बर
   अ: मतलब छु ज़ि हॆन्द्य तॖ
        मुस्लमान छि बारॖन्य
3. मु: बान्दव कुस ज़ि चन्दॖ
    अ: द्यारॖव सॗती छु व्वपर ति
         पनॖन बनान
4. मु: बानॖ हतस दीज़ि ठानॖ हथ
         ज़्यॆवि हतस कऺर्यज़ि क्याह
   अ: यॆलि कथ लूकन अथि छि
         लगान पतॖ छु नॖ तथ चारॖ
         बनान
5. मु: बागि बोग नानि क्युथ टोक
    अ: बॆ-मंदछ लागुन/ज़्यादॖ
         लालॖच करुन
*************************
1. गाड.....Fish/Guard (of
               train, etc.)
2. गऻड्य...Motor car/Lorry/
                Coach
3. ग्वड..... Ankle/Base/To
                start/To begin
4. गूड......Deep (colour)
5. गारुन...To look for/To
                search
6. गाज़ॖर....Carrot
7. गाश......Light/Sunshine
                 Lustre
8. गासॖ..... Grass
9. गाशुर.... Elegant/Lovely
10. गागॖर... Metallic pitcher
*************************
गीता ज्ञान :  अध्याय-5  :
कर्मॖ यूगी कर्म फल त्यागान
भगवत रूप शऻन्ती प्राप्त सपदान
स्वकाम मनुश फल यछ़ाय वलनॖ यिवान
वॊन भगॖवानन गीता ज्ञान
*************************
रावुन लबुन द्वह छु असि तॆली ननान यॆलि ॳस्य जंत्री मंज़ वुछान छि। यॆमिस बऻयिस निश जंत्री आसि नॖ तऺमिस किथॖ पऻठ्य लगि पताह ज़ि कमि द्वह कुस द्वह छु रावान या हुर्रान। जंत्री ॴसिथ ति छे नॖ वारिहान तगान द्वह या तिथि वुछुन। जंत्री मंज़ तिथियन ब्रौंह कनि लीख्यमॖत्युक मतलब छु नॖ आम इन्सानस फिकिरी तरान ज़ि अम्युक मतलब क्याह छु । मसलन कॆह शब्द छि वुछान ॳस्य मगर माने क्याह छु तिमन शब्दन हुन्द ति छॆ नॖ पताह सु ज़न गव...."स्थिर:", "गण्डान्त", "मातंग", "क्षया", "त्र्यह:", "धोम्य:", "प्रवर्ध:", "गज:".....
ॳस्य छि अनज़ऻनी पऻठ्य वरुखा फिरान जंत्री हुन्द, वुछ अज़ क्वस वार छि, कच़म छि, तॖ पख पानस। मगर यिमन चीज़न हॖन्ज़ ज़ऻन्यकऻरी गऺछ़ सपदॖन्य असि मंज़। अगर पंडित जियस पृछ़व सु छु वनान ज़ि यि तरिवॖ नॖ त्वहि फिकिरी। यि कुस तारि फिकरी असि? सान्यन शुर्यन यिम नॖ परनॖ मूजूब पनॖन्यन गरन मंज़ छि रोज़ान, तिमन बिचार्यन छॆ नॖ अमिच ब्वदॖय। रावुन-लबुन छॆ नॖ तिमन पतहॗय। ॴठम, काह, च़्वदह, पुनिम मावस वगैरा क्याज़ि छि यिवान ख़ास मानॖनॖ यि छॆ नॖ वारिहान पताह तॖ न छु वननवोल कांह नज़रि यिवान। अथ मसलस प्यठ पज़ि असि ग़ोर करुन। हवनॖ-भवनॖ ख्वतॖ छु यिमन चीज़न प्यठ ध्यान द्युन ज़रुरी म्यॆ बासान।
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नविव तॖ फोलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(koshursabak.blogspot.com ति वुछिव)