15.08.2018

15.08.2018, श्रावणॖ (श्रावण/ सावन), ज़ूनॖ पछॖ (शुक्ल पक्ष) पऻन्च़म (पंचमी), ब्वदवार (बुधवार), श्री सप्तार्षि सम्वत 5094, राश तुला (रऻच़हॖन्ज़ि 3.54 बजि प्यठॖ), ऋतु वर्षा (चलान)....अज़ छि नाग पंचमी
*************************
जे के विचार मंचॖ तरफॖ छुस बॖ त्वहि सारिनीय यछ़ान
         ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: पान्यो पान्यो
    अ: ख्वदगर्ज़ी
2. मु: पानस पॖर-पॖर लूकन
         तबाबथ
   अ: पानॖ नाकारॖ कामि कऺरिथ
        लूकन रॖच़ॖ कामि करनॖच
        नऺसीहत करॖन्य
3. मु: पांच़ऻलिस रोज़ि नॖ दॊहय
         वाव
    अ: मुसीबथ छु नॖ अकी डंजि
         रोज़ान
4. मु: पांतॖछौकॖ न्वशन स्वख तॖ
         कोर्यॆन द्वख
    अ: ॳकिस जायि ॳकिस
         स्वख तॖ ॳकिस द्वख
5. मु: पऻन्सस निश छु पऻन्सॖ
         वातान
    अ: पऻन्सॖवऻलिस निश छु पऻन्सॖ
          वातान
*************************
1. गाव......Cow
2. गव...... Gone
3. ग्यव..... Ghee/To sing
4. गाहे..... Occasionally/
                At any time
5. गाह..... Light/Sunshine/
                Splendour
6. गाह बॆगाह..Occasionally
7. गुह...... Cow dung
8. गऻव-गान...Cow shed
9. गांगल.... Disturbance
10. गाम..... Village
*************************
गीता ज्ञान  :  अध्याय-5  :
सु मनॖ सॗत्य सऻरी कर्म त्यऻगिथ
नव-द्वार वोल शरीर रूप गरॖ प्रऻविथ
आनन्द सान ब्रह्मस मंज़ दऺरिथ रोज़ान
वॊन भगॖवानन गीता ज्ञान
*************************
दपान कुनवुहशथ तॖ सत्तऻज्यहस मंज़ पंदऻहिमि अगस्त गव सोन वतन भारत यानि हिन्दुस्तान यानि ईण्डिया अंग्रीज़ शासनकालॖ निशि आज़ाद यिम अर्दहशथ तॖ पंच़ाह प्यठॖ आमॖत्य ॴस्य सऻनिस वतनस प्यठ राज करान। अज़ ति छि ॳस्य सु द्वह मनावान ज़ि कम कम तीर कऺर्य सान्यव ज़िठ्यव खऻली अंग्रेज़न पनॖनि वतनॖ मंज़ॖ न्यबर कडनॖ बापथ। मगर यॊदवय ॳस्य गहरऻयी सान वुछव तॗ साम ह्यमव तॖ च़ेनव, क्याह पऺज़्यपऻठ्य छा असि आज़ऻदी मीज्यमिच़ अंग्रेज़न निशि। म्यॆ छु नॖ बासान। सिरिफ ह्वकुमरान बदलेयि मगर अंग्रीज़ छाप छि अज़ताम असि सॗत्य सॗत्य पकान। ख्यनस-च्यनस मंज़, प्वशाकस मंज़, व्वथनस-बॆहनस मंज़, कथि-बाथि मंज़, तुल-त्रावि मंज़, बोल-चालि मंज़, मेल-जोलस मंज़। कमिच आज़ऻदी तॖ कऺमिस निशि छि असि आज़ऻदी मीज्यमिच़। म्यॆ छु नॖ वुन्यख ताम तरान फिकिरी। सुबहस नॆन्द्रि वऺथित छि ॳस्य वुनि गुड मार्निंग करान, शॊंगनॖ विज़ि गुड नाईट करान, नेरनॖ विज़ि बय-बय करान, यिनॖ-विज़ि व्यलकम करान, डाईनिंग-टेब्लस प्यठ ख्यवान-च्यवान, अंग्रीज़स मंज़ॖय बोलान तॖ तोलान वगैरा-वगैरा। तिमव ह्वकुमरानव कॊर अकि रंग्य असि प्यठ ज़ुलुम, ॳज़िक्य ह्वकुमरान छि ब्यॆयि रंग्य असि प्यठ ज़ुलुम कऺरिथ। ख़बर छि सारिनी दफ अमापॊज़ ॴस छु बंद सारिनीय, ॳछ छि वऺटिथ सारिनीय, कन छि बंद सारिनीय
आज़ऻदी कति तॖ कमिच
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नऺविव तॖ फोलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(koshursabak.blogspot.com ति वुछिव)