24.08.2018

24.08.2018, श्रावणॖ (श्रावण/ सावन) ज़ूनॖ पछॖ (शुक्ल पक्ष), त्रुवाह (त्रयोदशी), शॊकुरवार (शुक्रवार/जुम्मा), श्री सप्तार्षि सम्वत 5094, राश मकर         (चलान), ऋतु वर्षा (चलान)
*************************
जे के विचार मंचॖ तरफॖ छुस बॖ त्वहि सारिनीय यछ़ान
        ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: ॳछ वछ़ॖ तॖ गाशॖ रॊस
    अ: वुछिथ ऒन लागुन
2. मु: योरॖ मॊन्य ओरॖ कऺन्य
    अ: लोलस बेज़ती
3. मु: यॊत ताम पॊज़ पज़ि तॊत
         ताम आलम दज़ि
   अ: पज़र ननॖनस मंज़ छु च़ेर
         लगान
4. मु: योरकुन ल्यॆज तोरकुन रेह
    अ: मतलबी/ख्वदगर्ज़ी/वाव
          वुछिथ नाव त्रावॖन्य
5. मु: य्यॊस गाव द्वद दी तसॖन्ज़
         लथ छि च़ालॖन्य
   अ: यस निश कॆंह फऻयदॖ वाति
         तऺम्यसुन्द शरारथ ति छु
         च़ालुन प्यवान
*************************
1.स़फ़ॖ ....Page/Line/Row/
              Prayer-mat for
            one row of congre
            gation
2. स़फ़ॖ-बन्दी..To sit in a row
                   To face in row
3. स़ाफ़ॖ/दसतार....Turban
4. स़फ़ा....... Clean
5. स़फ़ा शीन.....Clean/
                   Snow white/
              As white as snow
6. शीन........Snow/Ice
7. सलाह....Advice/Opinion
                 Counsel
8. सलाह ज़ानुन...To think it
                          proper
9. सलाह च़्वचि.. Celebration
              of a compromise
10. सलाह स़फ़ऻयी...Clarifica
              tion and compro-
              mise
*************************
गीता ज्ञान   : अध्याय-6  :
युस प्वरुष यूगॖ प्राप्ती छु यछ़ान
निष्काम कर्म अम्युक हीतू आसान
संकल्पव रॊस सपदि कल्यान
वॊन भगॖवानन गीता ज्ञान
*************************
इन्सऻनियत छे नॖ प्रथ ॳकिस मंज़ आसान यि छु वुन्युखताम वुछनॖ आमुत, परज़ॖनावनॖ आमुत परखावनॖ आमुत तॖ आज़मावनॖ आमुत। इन्सऻनियत छि ज़ऻच़ पऻच़ न्यबर आसान। इन्सान करि इन्सानस मदद द्वखस-स्वखस मंज़ युस तमिस मंज़ छि दपान ॳस्य छि आसान इन्सऻनियत। यि छे नॖ न्यॆबॖर्य बोज़नॖ यिवान बऺल्कि यि छि अन्त:कर्णी आसान। अगर हना ग़ोर करव, मददॖच तऺपिश छि नज़रि यिवान जानवरन मंज़, जानावारन मंज़, क्यमन-कृलन मंज़ ति। मगर तिमन मंज़ छि सिरफ़ अमि कॖस्मॖच हर्कथ नज़र यिवान कुनि-कुनि सातन। येमिस मंज़ नॖ इन्सऻनियत आसि तऺमिस तॖ ॳकिस हयवानस मंज़ छॆ नॖ कांह फर्ख आसान। यॆत्यन इन्सऻनियत आसान छॆ नॖ तत्यन छि मार-दाड, शोर-शराबॖ, ल्यकॖ-थ्वकॖ, लडऻय-जग्डॖ, क्रूद, मॊह, लूब रोज़ान तॖ अशऻन्ती फऻलान। यॆतिनस इन्सानियत आसि तत्यन छु स्वर्ग बासान, शऻन्ती आसान, स्वख तॖ समुत आसान। पान्यार बासान। माय-महोब्बत रोज़ान। कूशिश करव ॳस्य ति इन्सान बनॖनॖच, इन्सऻनियत थवनॖच, तॖ तपोवनस मंज़ रोज़नॖच।
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नऺविव तॖ फोलिव
  भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(koshursabak.blogspot.com ति वुछिव)