27.08.2018

27.08.2018, बऻद्रपथ (भाद्र) गटॖ पछॖ (कृष्ण पक्ष),ऒक्द्वह (प्रथमा/प्रतिपदा), च़न्दॖरवार (सोमवार), श्री सप्तार्षि सम्वत 5094, राश कुम्भ (चलान), ऋतु वर्षा (चलान), द्रठपऻन्च़ुक पंचक (चलान)
*************************
जे के विचार मंचॖ तरफॖ छुस बॖ त्वहि सारिनीय यछ़ान
        ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: ॳछरवालव सॗत्य कंड्य
         कडॖन्य
   अ: कऻन्सिहुन्द स्यठाह ख़याल
        करुन/कांह स्यठाह टोठ
        आसुन
2. मु: युथ कॊर तऺम्य त्युथ करस
         बॖति
    अ: नखॖ वालुन/बदलॖ ह्यॊन
3. मु: युथ वुछख त्युथ वुछय
    अ: अमलि मुतऻबिक सज़ा तॖ
         जज़ा/वरताव हिशर
4. मु: युथ व्वस्तादॖ त्युथ च़ाठ
    अ: ह्युविस ह्यु आसुन
5. मु: यॆति नॖ कुनि बलॖवीर तऺति
         क्याह करि वॖगरॖटीर
   अ: ताक़तुक इज़हार/कमज़ोर
         ह्यॆकि नॖ कऻम अंजाम दिथ
*************************
1. जिगर....Heart/Soul/
                 Courage
2. जागुर... Argument
3. जऻगीर.. Land/Estate/
        Rent free grant given 
        by govt. as a reward
        for some services
4. जऻहिल... Arrogant/Rude
         Illiterate/Uncultured
         Foolish/Brutal
5. जऻयिज़... Appropriate/
         Permissable/Lawful
         Legal/Right/Proper/
         Justified/Genuine/
         Suitable
6. जऻली..... False/Untruth/
         Illusion/Falsehood/
         Forgrey
7. जऻनी.... Fast/Very close
          Dear/Intimate
8. जानि मन....Own life/My
           dear/Dear friend
9. जानबाज़....Daring/Brave
                     Intrepid
10. जानपऻठ्य...Very well/
            Fit/Right/Settled
            Safe and sound
*************************
गीता ज्ञान  :  अध्याय-6 :
सर्द गर्म स्वख द्वख मान अपमान
ह्यु ज़ऻनिथ अंत:करन शांत आसान
तऺमिस ब्रह्मस रॊस नॖ कॆंह बासान
वॊन भगॖवानन गीता ज्ञान
*************************
रक्षाबंधन त्योहार छु यिवान व्वंय मनावनॖ बडॖ जोश खरोश सान। बोय करि ब्यॆनि रऻछ दऻदिस द्वखस मंज़। अज़कल कऻच़ाह दुर्गटनायि छि गछ़ान, कऻत्याह बलात्कार छि गछ़ान, ल्वकच्यन ल्वकच्यन मोसूम कोर्येन, बदसॊलूकी छि गछ़ान स्कूलन मंज़, दफ्तरन मंज़, कालिजन मंज़, वति पकवुन। कऻत्याह बऻय छि आमॖत्य रक्षा करनि यिथ्यन मोकन प्यठ पनॖन्यन ब्यॆन्यन। म्यॆ छे नॖ अख मिसाला ति नज़रि आमॖच़ अख़बारव दऺस्य, मैग्जज़ीनव दऺस्य, टी वी दऺस्य।यि त्योहार छु म्यॆ बासान अख हाव-बावुक त्योहार ब्येयि नॖ कॆंह। ब्यॆनि गन्डान बऻयिस राखी तॖ अख वऻद ह्यवान ज़ि सु बोय यी अकार बकार ॳमिस ब्यॆनि द्वखस दऻदिस मंज़। राखी हुन्द मतलब छु तीय। मोदी जी कपऻर्य बन्याव बोय ल्वकच्यन ल्वकच्यन कोर्यॆन हुन्द। टी वीयस प्यठ यिम शगूफॖ हावनुक मतलब क्याह छु।म्यॆ तॊर नॖ फिकिरी। कॆंह ब्यनि छि सोज़ान राखी बायन/मास्तॖर/पॊफ्तॖर्यॆन/पितर्यॆन/वितॖर्यॆन बज़ऺरिया डाक। कमिस कर छि वातान, वऻतिथ कुस कमिस राखी गन्डान, गन्डिथ पतॖ कऺमिस कॗच़ाह रऻछ छि वातान यि ज़ानि दय। म्यॆ बासान यि त्योहार अख मज़ाखा अख तॖ ब्यॆ नॖ कॆंह। म्यॆ गछ़ि मऻफी दिन्य अमि कलामॖ बापथ मगर हक़ीकथ छि यिहऻय।
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नऺविव तॖ फोलिव
  भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(koshursabak.blogspot.com ति वुछिव)
(सोज़-ए-दिल सी डी करिव बुक पनॖनि नावॖ)