18.08.2018

18.08.2018, श्रावणॖ (श्रावण/ सावन),ज़ूनॖ पछॖ (शुक्ल पक्ष),ॴठम (अष्टमी), बटॖवार (शनिवार/शनिश्चरवार),श्री सप्तार्षि सम्वत 5094, राश वृश्चिक (दुहचि 10.58 बजि प्यठॖ), ऋतु वर्षा (चलान)
*************************
जे के विचार मंचॖ तरफॖ छुस बॖ त्वहि सारिनीय यछ़ान
        ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: ॳक्य छ़ोंड दुनिया तॖ ब्यॆयि
         ॳक्य यीमान
   अ: स्यठाह मुश्किल या
        नामुम्किन कऻम करनॖच
        कूशिश करॖन्य
2. मु: हारॖच गॊगॖज तॖ लारॖच
        गुनस गऺयि बराबर
    अ: हारॖच गॊगॖज गऺयि ज़हरस
        बराबर
3. मु: हापथ यारज़
    अ: जऻहिल सॖन्ज़ दोस्ती/मुडॖ
         सॖन्ज़ यारज़
4. मु: हऻन्ज़स ग्वबेयि ल्वलि
         दिच़ॖन दऻरिथ क्वलि
   अ: पनॖन कूर स्यठाह वऺसिथ
         गरस मंज़ दिन्य
5. मु: हापतस नम कासॖन्य
    अ: ज़ऻलिम हॊमरावुन
*************************
1. क़ऻबिल.....Able/Capable
                    Qualified/
                    Competent
2. क़ऻतिल.... Murderer/
                   Assasin/Homi
                   cide
3. क़ऻसिद.... Messenger/
               Courier/Envoy
4. क़ऻसिब....Artist/Artisan
5. क़ऻफिलॖ... Multitude of
             travellers/Carvan
6. क़ऻयदॖ... Regulation/
             Order/System/
             Formula/Primer/
             Maxim
7. क़ऻश.....Slice/Piece (of)
8. काश...Wish/How I wish
9. कश...  To throw
10. क़ऻलिब....Mould/Frame
*************************
गीता ज्ञान :  अध्याय-5  :
सम्सऻर्य विशयन मंज़ यिम नॖ ब्वडान
आत्माहस मंज़ दऺरिथ ध्यान दारान
ब्रह्म रूप परम आनन्द छि प्रावान
वॊन भगॖवानन गीता ज्ञान
*************************
ग्वनवान प्वरषन छि सऻरी पूज़ान।जान ग्वन आसनॖ सॗत्य छु इन्सान जान-जान काम्यन अंद वातॖनावान। प्रथ ज़ऻच़ मंज़ छि आसान ग्वनवान तॖ महाप्वरुष यिहन्दि दऺस्य असि कल्याण छु सपदान। यिम ग्वनवान छि हमेशॖ रॖच़ वथ हावान रोज़ान। बस रटन-बानॖ गछ़ि आसुन। तगुन गछ़ि यिथ्यन ग्वनवानन हॖन्द्यन क़दमन प्यठ पकुन। ज़नम छु सफल गछ़ान। ज़िन्दगी हुन्द छु क्याह सार म्यॆ वनतम, कवॖ यि आदम छु बे-क़रार म्यॆ वनतम। क्याह सौंचान, स्वरान यिवान छु सु ज़नॖमस, क्याह छु अमलान यॆति मा छय ख़बर तस। कथ प्यठ छुस यख्तियार म्यॆ वनतम। युस योर आव तस वापस गछ़ुन, मौतस क्याह करि सोन पशुन। आख अगर कह कऺर्यथॖय गछ़, कॆंह नय तगी लूकन हॖन्द्यन दिलन मंज़ प्रेम बाव बऺर्यथॖय गछ़। नेरान अकि फिरि फेरान नॖ वापस, फेरान मगर तम्यकुय कॆंह कालस। नम गछ़ान ॳछ, फ्युर लगान यॆलि खयालस दमफुट्य गछ़ान लगान ब्यॆयि यथ जंजालस। कॗत्य आयि कॗत्य गऺयि क्याह क्याह कऺर्यथॖय गऺयि मगर तोति छु असि मंज़ अपुज़ुय तॆह,बऺल्य अहंकार, क्रूध, ईर्शा, हसद, लालच, यिमव चीज़व निशि यॆमिस नजात मॆलि सु छु यूगी, सुय छु ग्वनवान तम्यसॖय मंज़ ह्यकव वुछिथ भगवान। असि छि पनॖन शुर्य ग्वनवान बनावॖन्य, अवग्वनन निशि दूर थवॖन्य। अटल जियिन पऻठ्य गीतकार बनावॖन्य,कथाकार बनावॖन्य,  साहित्यकार बनावॖन्य, कलाकार बनावॖन्य,  सियास्तदान बनावॖन, समजदार बनावॖन्य, संस्कऻरी बनावॖन्य, सलहकार बनावॖन्य, पनॖनि वतनॖक्य पहरदार बनावॖन्य।
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
  नऺविव तॖ फोलिव
    भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(koshursabak.blogspot.com ति वुछिव)