20.08.2018

20.08.2018, श्रावणॖ (श्रावण/ सावन) ज़ूनॖ पछॖ (शुक्ल पक्ष) दऺहम (दशमी), च़न्द्रवार (सोमवार),श्री सप्तार्षि सम्वत 5094, राश धनु (रऻच़ हॖन्ज़ॖ 9.40 बजि प्यठॖ), ऋतु वर्षा (चलान)
*************************
जे के विचार मंचॖ तरफॖ छुस बॖ त्वहि सारिनीय यछ़ान
     ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: ॳक्यसुन्द दज़ान आब तॖ
         ब्यॆयि सुन्द नॖ दज़ान तील
    अ: पनुन पनुन कॖस्मत
2. मु: त्रऻवमॖच़ थ्वख न्यंगलावॖन्य
    अ त्रावुन लायक़ चीज़ मजबूरी
        किन्य वापस रटुन
3. मु: त्रॖह गव ज़ि सॖह गव
    अ: नवजवान छु ताक़तवोल
         आसान
4. मु: तछान तछान नशान कॊह
    अ: लगातार कूशिश करनॖ
         सॗत्य छि मुश्किल कऻम ति
         अंद वातान
5. मु: तापॖ सॗत्य दऻर छऺच़रऻवमॖच़
    अ: वख्त ज़ायि कऺरिथ ति कॆंह
         हऻसिल नॖ सपदुमुत
*************************
1. खन......Treasure/To dig
2. खान..... Mine
3. ख़ाल.... Skin
4. ख़ानॖदार...Head of a fami
                 ly/Husband
5. ख़ानॖजंगी...Civil war
6. ख़ानॖ माजर...Giving much
                more love
7. ख़ानॖ शुमऻरी...Census/
                  House count
8. ख़ानॖ मोल....Only son/
                  Loving son
9. ख़ानॖ मऻज... Only daught
                  er/Loving
                  daughter
10. ख़ानॖकाह....A house
                  mosque where
                 prayers are held
*************************
गीता ज्ञान  : अध्याय-5 :
नॆबरॖ यिमन विशय बूग नॖ स्वरान
नॆबरय तिमन छु त्रऻविथ छ़ुनान
यऺन्द्रय मन तॖ ब्वद तिमय ज़ेनान
वॊन भगॖवानन गीता ज्ञान
*************************
जे के विचार मंचॖ छि अख संस्था यॆमिक सदस्य रोज़ान छि व्यच़ार करान ज़ि किथॖ पऻठ्य ह्यकव ॳस्य पनॖनि समाजिच सीवा कऺरिथ तिथॖ पऻठ्य ज़ि सऻन्य प्रज़नथ रोज़ि ज़िन्दॖ। अमि मूजूब छि यि संस्था रंगा-रंग कार्यक्रम करान रोज़ान विज़ि विज़ि। समाजॖक्यन शुर्यन गाशॖ तारख बनावनॖच कूशिश करान संगीतस मंज़, डानसस मंज़ या साज़ बजावनस मंज़। अमि अलावॖ छि यि संस्था कऻशिर्य ज़बान य्यॊस असि बटन हॖन्ज़ अख पहचान छि , ज़िन्दॖ थावनॖच कूशिश करान तॖ पनॖन ज़बान जान पऻठ्य ज़ाननवाल्यन, वनन-वाल्यन, लेखनवाल्यन नक्द यनामॖ दिथ तिहॖन्ज़ होस्लॖ-अफ्ज़ऻयी करान रोज़ान। चूंकि बॖति छुस अथ संस्थायि सॗत्य जुडिथ तॖ पनॖनि मोबायलॖ दऺस्य पनॖन्यन समाजक्यन बऻच़न ताम ज़बान ज़िन्दॖ थवनॖ म्वखॖ मुहावरॖ लेखान रोज़ान, कॆंह मज़मून लेखान रोज़ान, कॆंह अलफ़ाज़ लेखान रोज़ान ताकि असि गछ़ि नॖ मऺशिथ गछ़ॖन्य पनॖनीय माजि-ज़्यव तॖ रावव पानसॖय मंज़। कथ छि जऻरी
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
 नऺविव तॖ फोलिव
  भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(koshursabak.blogspot.com ति वुछिव)