29.08.2018

29.08.2018, बऻद्रप्यथ (भाद्र), गटॖ पछॖ (कृष्ण पक्ष) त्रय (तृतीय), ब्वदवार(बुधवार),श्री सप्तार्षि सम्वत 5094, राश मीन (चलान),ऋतु वर्षा (चलान),द्रठॖपऻन्च़ुक (पंचक)(चलान)
*************************
जे के विचार मंचॖ तरफॖ छुस बॖ त्वहि सारिनीय यछ़ान
        ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: ॳड्य दऺद्य यॆछ़ि तॖ ॳड्य
         दऺद्य रॆछ़ि
    अ:अड्यन म्यूल पनॖनि कॖस्मतॖ
          तॖ ॳड्यन रोव पनॖनि नीच़
2. मु: यूत वीरि टख दिख त्यूत
         छुस यावुन यिवान
  अ: जान शख्सस यीतन कऻच़ाह
         ति सख्ती सु छु फॊलान
3. मु: यूत नॖ ब्रऻर्य-सॖन्दि ग्यव
         ख्यनॖ गछ़ान त्यूत छु गछ़ान
         तऺम्यसॖन्दि लॊट गिलॖवनॖ
   अ: न्वक्सानॖ ख्वतॖ छु न्वक्सान
        करनवऻल्य सॖन्ज़ि बेशर्मी
        प्यठ अफ़सूस गछ़ान/अख
       ब्यमार पावुन पतॖ ख़बरि युन
4. मु: योकुन लुख तोकुन दय
    अ: अवामुक फ़ऻसलॖ छु रोज़ान
          बरक़रार
5. मु: युन-गछ़ुन रोज़ुन मूजूद
    अ: कारॖवऻयी जऻरी रोज़ॖन्य
*************************
1. नफ़ा....Gain/Profit
2. नफ़र... Person/Indivi-
               dual
3. नफ़रत...Dislike/Hatred/
            Disgust/Contempt
4. नफ़री...Staff/Group of
               persons
5. न्यामत...Grace/Divine/
               Blessing/Good
               thing/Delicacy
6. नग़मॖ... Song/Melody/
          Dance performance
7. नफ़ीस...Nice/Good
8. नफ़ासत...Nicely/Refine-
         ment/Exquisiteness
          Delicacy
9. निफ़ाक...Difference/
           Enmity/Hostility
10. निफ़ाक़ प्यॊन...To have
                  differences
*************************
गीता ज्ञान   : अध्याय-6  :
हमदर्द हऻसिद दोस्त दुश्मन
पनॖन्यन व्वपरन दर्मियन पऻपियन
हिवुय ज़ाननवऻल्य स्रेष्ठ आसान
वॊन भगॖवानन गीता ज्ञान
*************************
च़ॖ छुख हॆरि बॖ छुसय ब्वनॖ, स्वनो च़ॖ कर पनॖन कऻम। यि छु बन्योमुत व्वन्य अख मुहावरॖ। दरासल छु यि अख हऻदिसॖ सपद्योमुत।कऺशीरि च़ायि ॳकिस गरस च़ूर। तिमय ॴस्य दपान ज़ॖ ज़ऺन्य। तिमव वुछ ज़ि गरिक सऻरीय बऻच़ ब्वनॖ वटिस मंज़ टी वी वुछनस मंज़ मस्त। दॊयव च़ूरव मंज़ॖ ख्वत अख हॆरमिस कुठिस तॖ वॊटुन सोरुय माल तॖ दॊयिम छु ब्वन रऻछ बऻच़न तॖ हॆरमिस वनान ज़ि बॖ छुसय यिमन रऻछ तॖ च़ॖ म्वकलाव पनॖन कऻम कऺरिथ। यॊतताम तिमव न्यू सोरुय गरॖ लुटऻविथ तॊतताम छॆ नॖ बऺन्यम्यन ख़बरॖय। यि मुहावरॖ प्यव म्यॆ अमि बापथ वनुन ज़ि असि कऻशिर्य बटन छु सुय हालाह वुन्यक्यनस। ॳस्य छि व्हाटसापस प्यठ ज़िख-ज़िख दिनस मंज़ मश्गूल तॖ सरकार छु पनॖन सरकार चलावान पनॖनि आयि तॖ त्रायि। यॊताम असि द्रायि त्रॖह वऺरी। त्रॖह वऺरी। अख समया अख। यॆतिक्यन तिमन बच्चन यिम नमतॖ पतॖ कऺशीरि न्यबर ज़ायि छॆ नॖ ख़बर ज़ि कऺशीर्य कथ छि वनान तॖ कऺशीरि मंज़ यिम मुसलमान बच्चॖ नमतॖ पतॖ ज़ायि तिमन छॆ नॖ ख़बर ज़ि बटॖ कुस गव। तिम छि पनॖन आज़ऻदी छ़ान्डान तॖ ॳस्य पनॖन कऺशीर्य छ़ान्डान तॖ सरकार लऺगिथ पनॖन वोट छ़ान्डनस मंज़। कारोबार छु चलान, द्वह-द्वह छु नेरान। कस कोताह कऺम्यसुन्द क्याह छु फेरान दय ज़ानान। हालस पकव ॳस्य च़्वदहऻमिस सित्मबरस कुन यि फऻसलॖ करान करान ज़ि त्रुवऻहमि दिमवा श्रदांजली किनॖ च़्वदऻहमि, बी के गन्जू पार्कि मंज़ा किनॖ जंत्र-मंत्रस मंज़, जलसॖच लाकम कुस रटि, च़ॖ-हा किनॖ बॖ। ॳस्य छि वुन्यक्यनस ॳथ्य कशमॖकशस मंज़। वुछव क्वस संस्था क्वत वाति, त्रुवऻहमि वात्या किनॖ च़्वदाहमि तॖ कुस क्वत वाति।हालस करव ॳस्य ॳथ्य फ़ऻसलॖ।
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नऺविव तॖ फोलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(koshursabak.blogspot.com ति वुछिव)
(सोज़-ए-दिल सी डी छि जलदॖय यिनॖ वाज्यन बाज़रस मंज़ तॊह्य ति करिव पनॖनि नावॖ अख बुक)