01.08.2018

01.08.2018, श्रावणॖ (श्रावण/ सावन), गटॖ पछॖ (कृष्ण पक्ष), च़ोरम (चुतुर्थी), ब्वदवार (बुधवार), श्री सप्तार्षि सम्वत 5094, राश मीन (चलान), ऋतु ग्रीष्म (चलान), द्रठॖपऻन्च़ुक (पंचक) (चलान)
*************************
जे के विचार मंचॖ तरफॖ छुस बॖ त्वहि सारिनीय यछ़ान
          ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: प्राच़न द्वद लऻरिथ
    अ: मोसूम/नाबालेग
2. मु: त्रुकिस कथा मुडस लोरि
         हथा
   अ: ॴक्लस इशारय तॖ बेकल्स
         नॖ पली प्यॊन
3. मु: होन्यन अथि ओट मान्डना
        वुन
   अ: नाकऻबिलस अथि कांह
         कऻम करनावॖन्य
4. मु: हून्य लॊट
    अ: वुटुकुर/युस नॖ ज़ांह
         स्यदान
5. मु: हल्यन बानन वुकॖर्य ठानॖ
         हिव्यन हिवि समखान
   अ: युस युथ आसान तऺमिस
        त्युथुय ब्रौंठॖ यिवान
*****************"*******
1. फऺल्य-सॖच़न...Paper-pin
2. सॖच़न.......... Needle
3. सॖच़............Tailor
4. फऻतिर........ Mad
5. फल........... Fruit/Result
6. फऺल्य..........Grain/Corn/
                       Seed
7. फ्यॊक........ Shoulder
8. फ्यॊर......... A drop
9. फ्यॆरि-फ्यॆरि. Drop by drop
10. फ्यारुन... To take water
              out of boiled rice
*************************
गीता ज्ञान :  अध्याय-5  :
        अर्ज़न दीव वनान
कर्मॖ सन्यास छिवॖ स्रेष्ठ मानान
कर्म यूगॖकक्य ति तऻरीफ करान
दॊयव मंज़ॖ कमि सॗत्य गछ़ि म्यॆ कल्याण
वॊन भगॖवानन गीता ज्ञान
*************************
कऺशीरि मंज़ अज़ त्रॖह वऺरी ब्रौंठ ॴस्य सऻन्य पीर-फ़कीर, साद-संत, ग्वर बेतरी ब्यॊन-ब्यॊन अलाकन मंज़ तॖ ततिकी अंद्य-पऺख्य बख्त ॴस्य तिमन आदर-सत्कार करान, ल्वलॖमतॖलाय करान, गऺज्यगाह तॖ मोरछलॖ करान, गाह-बॆगाह ॴस्य होरॖक्य-योरॖक्य लूख ति यिमन निश वातान तॖ युहुन्द ॴशिर्वाद मंगान। मगर यनॖ ॳस्य कऺशीरि प्यठॖ च़ऺलिथ आयि, यिम साद-संत फऻलऻव्य असि जायि-जायि तॖ यिहन्दिस फऻलावस मंज़ लऺज्य मान-मान। यि ख़बर छि सारिनॖय अलग-अलग नाव ह्यनुक ज़ॊरूरत छु नॖ म्यॆ बासान। यिमन जायन ब्यॊन-ब्यॊन हवन कऺर्य-कऺर्य छु नॖ म्यॆ बासान कांह फऻयदॖ  नेरान। अमि ख्वतॖ छु ना जान ज़ि अख बॊड हवना कॊर अक्यसॖय जायि लूकन हॖन्दि कल्याणॖ बापथ। ॳस्य बटॖ गऺयि मऻल्य ति जऻन्य ति कऺशीरि नीरिथ। ज़मीन-ज़िरात त्रोव तती, गरॖ रूद्य तती अल्बतॖ सानि कऺशीरि प्यठॖ च़लनॖ सॗत्य आव कॆंच़न बकाया ज़ऻच़न फऻयदय फऻयदॖ मगर ॳस्य डऺल्य नॖ पनॖहेनॖ निश। अगर अख नज़र पथकुन त्रावव ज्यॆमिस मंज़ यॆति बटन हुन्द गड छु, तति रोज़न वाल्यव डूगरव बनऻव्य ग्रन्दि-रॊस बौक्यट-हाल सान्यव पौंसव सॗत्य, मैटाडोर वाल्यन गव दऺह गनॖ हुर्यॆर तिहन्ज़न गाड्यन मंज़, दुकानदारन बड्यव कारोबार अगनस-द्वगन सान्य पौंसॖ सॗत्य, ज़मीनस कॗमत बड्यव वगैरा वगैरा। कऻतिहऻव कऻशिर्यव बनऻव्य बैंक्यट-हाल, कऻत्यहऻन कऻशर्य बटन छि मैटाडोरॖ या बजि गाडि। कऻत्याह बटॖ छि दुकानदऻरी करान। असि मंज़ क्याज़ि छु नॖ यिवान अमिकॖस्मुक बदलाव। कारस मंज़ बारस मंज़। ॳस्य क्याज़ि लऺग्य सिरिफ हवननॖय पतॖ। कऻत्याह तऻलीमी इदारॖ बनऻव्य असि, कऻत्याह हस्पताल बनऻव्य कऻशिर्य-बटव। कऻच़ाह कामि छि बकाया मगर ॳस्य छि ख्वश ज़ि सोन शुर बन्यव इन्जीन्यर वोत व्यलायत तॖ च़ॖ नॖ कांह तॖ बॖ नॖ कांह। यिमन म्यान्यन बेकॖल कथन प्यठ कर्याह कांह ग़ोर। म्यॆ छु नॖ बासान
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नऺविव तॖ फोलिव
   भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(koshursabak.blogspot.com ति वुछिव)